بابكر سلك

ضابحين منقة


* اليوم تقابل صقور الجديان سيراليون أفريقياً
* المجموعة صعبه
* ويمكن خصمنا اليوم هو أقل منتخبات المجموعه خطورةً علينا
* برغم ان لهم محترفين كتاااااااااار
* ومستعدين شديييييييييييييييد
* وبرغم أننا كالعادة
* نعتمد فى إعدادنا على إعداد المريخ والهلال
* نسأل الله أن تكون تونس فأل خير للصقور
* فالقمة إستعدت هناك
* وثمار إعداد القمه يجنيه الصقور
* أيها الناس
* علوق الشدة هو ديدن الإعداد للمنتخب
* ومجاهدات أسامه عطا المنان
* هى مخرج المنتخب من مطبات الفلس الكثيرة
* والإتحاد قاعد
* والوزارة قاعدة
* بل والمنتخب منتخب دولة
* والله العظيم منتخب دولة
* دوله تهز وترز
* وفيها حكومة
* حكومه هزازة ورزازة ومنتخبه
* أى والله
* فقط نسأل الله ان تفوز الخرمجه على المنهجيه
* ان تتخطى العشوائية والقصور إعداد الخصم الجاد
* أن يفوز الصقور
*وبعدها حايكون فى الف حديث
* لأن الحال المايل سيستمر
* ونعود لعلوق الشدة إعداداً لمجابهة أعتى المنتخبات
* نحنا كمان بنخاف
* نلقط الأولاد قبل أسبوع من أى مواجهة
* ولو كانت ضد المنتخب البرازيلى ذاتو
* الغريب شنو؟
* كورتنا لازم تشبهنا
* وطالما بنركب ستاير العيد بعد يذيعوا العيد
* وبنفتح الخيران بعدما المطر يطمبجنا
* وبنذاكر بعد يعلقوا جدول الإمتحان
* يبقى نلملم المنتخب قبل الكورة بيوم
* مافى شئ غريب
* الخريف يفاجئنا
* رمضان يفاجئنا
* العيد يفاجئنا
* بل يوم تلتين رمضان ما بننضف إلا يذيعوا العيد
* بعد الناس تفطر يوم تلتين رمضان
* فى ناس يقولوا ليك العيد ذاعوهوا؟
* أصلنا كده
* ولن يتغير حالنا مالم نغير حالنا
* ياخ نحن تكون عندنا مواعيد الساعه سبعه
* نتحرك عليها الساعه سبعه ونص
* ياخ العريس بمشى الحلاق يوم العرس الساعه سبعه مساء
* ومواعيد العروس فى الكوافير الساعه سته ونص
* ياخ نحنا فينا ناس
* صلاة الجمعه دى
* يقوموا على الوضوء لما يسمعوا الإقامه
* لا بنقرا البقره
* ولا بنحرص على الصفوف الأماميه
* أصلنا كده
* ياخ نحنا شافعنا بيتبول فى السرير
* بنقلب ليهو المرتبة يبول فى السايد التانى
* أصلنا كده
* ياخ نحنا بنوقف العلاج قبل يكمل كورس الحبوب
* أصلنا كده
* ونحزن إذا خسرنا
* شئ غريب جداً
* لكل مجتهد نصيب
* وما دايرين نجتهد
* ودايرين كل النصيب
* أيها الناس
* مانبقى زى الدولة
* ونتخلى عن المنتخب
* تعالوا لتتعالى هتافاتنا لمنتخبنا
* إذا الدولة نطت منو
* نركز أنحنا
* نسوى العلينا
* نساند منتخبنا
* بشدة
* ونجد العذر لأولادنا إن أخفقوا لاقدر الله
* أما مازدا
* فوالله مدرب غيرو ما يشتغل فى ظروف زى دى أبداً
* له التحية
* الراجل مضحى شديد
* بس المطلوب منو
* ان يبعد عن محاولة الزج به فى قصة محاربة أخطر وأشهر مهاجم سودانى
* بكرى بوعقرب
* بكرينا
* لأنو لو فى نصر
* بالتأكيد بجى من بكرى بعد مجهودات أخوانه
* الليله اللون واحد
* علم البلد
* والبلد بلد البنت والولد
* هكذا علمونا
* وهكذا كانت
* وهكذا يجب ان تكون
* أيها الناس
* كلنا صوب الإستاد
* لتنطلق من حناجرنا ثلاثه نقاط لمنتخبنا
* وبعدها يحلها الف حلال
* أيها الناس
* يفترض ان يكون الحبيب المنتظر قد رجع البلد
* وقصة نجاح من فشل معسكر تونس دى بنرجع ليها
* جماعة يحقدون من باب ينتقدون
* لابعجبهم العجب
* ولا الصيام فى رمضان ذاتو خليهو رجب
* المهم
* جبت قطعتين منقة فضلة خيركم
* ياهو الفضل من المرتب بعد المدارس
* عملت منها لى ست الكل سلطة فواكه
* وعصير
* وأديتها الكدويات تكدهن
* ضابحين منقه
* بس المراره دى الماسويناها منها
* الخير باسط
* قطعتين منقه
* الوالدة أطال الله فى عمرها
* بعد ضربت كباية عصير المنقه
* قالت لى شوف لى ناس التبرع بالدم ديل وين
* لله درك ايها الشعب العينو مليانه
* شعب قنوع
* كباية منقه واحده ودايرة تتبرع بالدم
* شعب يحس بالآخر
* قلت ليها يمه
* كفانا الدم البنتبرع بيهو للباعوضه يوماتى
* أيها الناس
* رمضان جايينا
* والبحب رمضان وبعرف قيمتو
* بتمنى ان لاينتهى هذا الشهر العظيم
* ونهاية الشهر العظيم هى يوم الوقفه
* فى ناس بتمنوا الوقفه ما تجى
* عشان يكتروا من الإستغفار والعبادات وينعموا بالرحمة
* هو رمضان ذاتو يا حليلو
* فضل فيهو شنو؟
* الخميس الجاى ببدا
* الخميس البعدو سيبو
* الخميس داك ليهو خمسطاشر يوم
* إنقسم عديل
* فضل فوقو شنو؟
* يا حليلو
* المهم
* الجمهور عليهو الحضور باكراً اليوم
* منتخبنا ينادينا والإهمال لا يقاوينا
* أيها الناس
* إن تنصروا الله ينصركم
* أها نجى لى شمارات والى الخرتوم
* أكان شفت يا والينا
* السحاب إتلملم وساكت بعاين لينا
* ونحنا يا والينا
* ماعاملين شى غير نعاين بى عينينا
* وكان صبت المطيره لينا فى عينينا
* عينينا ما فيها خيران تصرفها لينا
* ونرجع لى مفاجئة الخريف لينا
* ويا دوبك إستلمنا الولاية يومين لينا
* سلفنا ما سلمنا الخيران مجهزة لينا
* وغرفة طوارئ تتعمل لينا
* والضبان والباعوض فى رمضان كتار علينا
* يبقى يا والينا
* من أسى
* عديل كده أحفر لينا
* متعودين نحنا على الحفر يا والينا
* أحفروا لينا
ﺳﻠﻚ ﻛﻬﺮﺑﺎ
** ﻧﻨﺴﺎﻙ ﻛﻴﻒ ﻭكان حفروا لينا ووووب،وكان ما حفروا لينا بنغرق؟!!
والي لقاء
سلللللللك


تعليق واحد

  1. ياهبنقة.ماهو نوعك دا الكره بتشديد الراء الناس المنتخب والسودان