منوعات

أحمد دكتور (ضباح) يعرف تفاصيل (الخراف) قبل ذبحها .. فاقت حجوزاته حجوزات الفنانين


* أحمد محمد عمر من مواليد مدينة تندلتي يعتبر من أشهر من إمتهنوا مهنة ذبح البهائم في العاصمة وبات لا يستطيع ملاحقة طلبات الأسر عليه عبر الهاتف فهو كما يقول: (ضباح ديلفري).. (السياسي) جلست إليه في دردشة خفيفة وخرجت منه بإفادات لطيفة وجميلة وتطرقت معه لمعرفة سر لقب (الدكتور).. فمعاً نطالع حديثه:
* الإتجاه لهذه المهنة؟
– طبعاً الظروف هي السبب الأساسي.. زمان كنت شغال في المرور 8 سنوات ونزلت معاش وقبلها كنت شغال في البوليس وأنا عندي أسرة وما بقول لزول أديني قروش أو ديني قروش.

* قالوا بقيت مشهور؟
– الحمد لله تلفوني ده فيهو (العميد، العقيد، الوزير) وأنا بشتغل للناس المحترمة وشغلي شغل نضيف ما فيهو لف ودوران شغلي مية مية والناس كلها بتعرفني.
* زبائنك من وين؟
– كل أحياء أم درمان وبحري والقيادة العامة وفي بعض الأولياء وناس كتار مسئولين.

* كسبت ثقة الناس ليك كيف؟
– بالنضافة (الشغل النضيف) والأمانة ما في ولا قطعة لحمة بتدخل عليّ.
* قالوا إنت ضباح ديلفري؟
– أيوه بتصل عليّ الزبون وبطلب مني أجيب ليهو ضبيحة وفعلاً بجيب (الخروف) وبضبحو وبسلمو ليهو كامل وجاهز وأنا المسئول منو وأمانة في رقبتي.
* الإقبال على (الضبيحة) رغم إرتفاع الأسعار؟
– والله زبايني كتار والحمد لله وبحجزوني من قبل ثلاثة أربعة أيام وشغال بإستمرار والحمد لله.

* أسعار الخرفان كيف؟
-على حسب الخروف الخروف الكبير بـ1.700 و1.500 وفي خرفان صغيرة في حدود (900- 800- 700) وأسعارها كويسة ومناسبة.
* ناس الخرفان البتتعامل معاهم بتشيل منهم الخروف وبعد تستلم قروشك بترجع ليهم؟
– لا بشتري منهم الخروف بالكاش أولاً بأول، لأنك لما تشيل منهم خروف بالدين واحد إتنين بختو ليك فيهو (50 أو 100ج) لكن لما تشيل كاش بحقك بتشيل الحاجة العايزاها إنت والبتعجبك إنت.

* لقب الدكتور جا من وين؟
– مرة في السوق جاني زبون وطلب مني أشتري ليهو (بهيمة) في أثناء الكلام قلت ليهو: أنا (الدكتور).. قال: أنا ذاتي دكتور.. قلت ليهو: خلاص نتلاقى هناك في البيت، مشينا البيت وإشتغلت ليهو لخروف وظبطت ليهو اللحمة ونضفت مكان الضبيحة زي الما ضبحت فيها وجاني سيد البيت الدكتور قال لي: فعلاً إنت الدكتور، بكشف على الخروف بعاين ليهو بعيني بس بعرفها كويسة ولا عندها (علة) بفتح عين وبغمض التانية بعرف جوة بطنها في شنو وكرشها سوداء ولا بيضاء.
* بتعرفها كيف.
– لا دي خبرتي أنا وده سر المهنة.

* المهنة دي بتأكل عيش؟
– والله ما بتأكل عيش لكن ماشي الحال الحمد لله ساتراني والحمد لله.
* في الضيحة بتلاحق الزباين ديل كلهم؟
– والله أنا من أسي محجوز من أول يوم لحدي تالت يوم لأنو أي واحد فيهم عندو أربعة خرفان وأنهم زبائني من زمان ليهم 14 سنة.
* ما فكرت تعمل ليك محل جزارة؟
– لا أبداً.. لأنو الشغل ده بدخل السجن.

* كيف؟
– لأنو لازم تشتغل شغل بتاع لف ودوران وتلبس طاقية ده في ده.. ما بنفع معاي كلام زي ده.. أنا زول دوغري لا في زول طالبني قرش ولا تعريفة.
* الخرفان الصعبة البتعبك في الضبيحة شنو؟
– أصعب خرفان في الشغل هي خرفان (أم برروا) ما بقدر أطلع الجلد بسهولة لأنو جلدها قوي وبتأكل الطين وبتجي ماشية مسافات بعيدة، لكن أنضف بهيمة هي (الحمرية والكباشية) ديل البهائم النضاف السمحات لحمهم طري وحلو وطاعم.

حاورته: سندس الناظر
صحيفة السياسي


‫10 تعليقات

  1. ((((( أنا بشتغل للناس المحترمة ))))) !!!!

    يعنى الباقين ما محترمين !!

    هسا لو واحد (ما محترم !) قال ليك تعال لي أول يوم في العيد، و ح أديك 3 أضعاف اللي ح يدوك ليهو كل زباينك (المحترمين) ديل .. ح تعمل شنو !

    أظن الاجابة ح تكون عند الخروف : بااااااااع !!!

    1. هل كل الناس محترمة؟؟؟
      ياخ افهم بعدين تعال اكتب__دة زمن اغبر مليان نشالين ومحتاين وحرامية وامثالك من البلهاء

      1. هو الناس المحترمة القاصدهم ديل في زمننا هذا للأسف ياهم ذاتهم الذكرتهم إنت المحتالين والحرامية والولاة والوزراء والمعتمدين وهلم جرا، أما البلهاء اللي ذكرتهم انت فهم أمثالك

  2. الحمد لله تلفوني ده فيهو (العميد، العقيد، الوزير) وأنا بشتغل للناس المحترمة وشغلي شغل نضيف ما فيهو لف ودوران شغلي مية مية والناس كلها بتعرفني.
    هههههههههه واحنا نستفيد شنو قوم لف كدا ولاكدا

  3. والله ياشباب الليلة مزاجكم رايق وتعليقاتكم ظريفة، بدون بذاءة وبدون انصراف جانبي، ام ان مزاجي انا الرايق! ماعارف، كلو سوا.

  4. والله الشعب السودانى شعب غريب ، الزول قال بيتشغل للناس المحترمة ، ما فيها شىء الزول عارف من أين تؤكل الكتف تحسدوا القرد على …………………………………………..