رأي ومقالات

رندا الكاروري: يلا… شفتو الزول البي هيبتو دي؟؟!! تسلم البطن الجابتك


ده باختصار شدييييييد سوداني أصيل… يلا.. هو شغال في جوازات العلاقات البينية.. مامهم اسمو.. ومامهم مركزو.. المهم انو (بي فخامتو).. مابقعد في مكتبو ولا خمسة دقايق… بدخل أي مكتب فجأة.. وبشرف على سير العمل بي نفسو… وكل الاصطاف عامل ليهو ألف حساب… وبرتب صفوف المواطنين قدام شبابيك الخدمة بي نفسو.. ويقدم كبار السن والمرضى ويرجع الشباب بي ورى بي جملة سودانية بسيطة (ياشباب قدموا أبوكم دا)….

لأ.. والشي الخلاني أفرح من قلبي.. شوف عيني في ناس شكلهم (عندهم فيتامين (و)…(واسطة يعني)… جو داخلين توووووش في المكتب… ونحن الغلابا واقفين في الصفوف… بس زولنا ده جا خاشي المكتب فجأة وطردهم ليك برا.. وقدر ماحاولوا يتفاهمو معاهو قطعها معاهم ناشف.. وقال ليهم (أنا هنا مابعرف أبوي.. أمشوا بيوتكم وتعالوا بكرة من صلاة الصبح هناك في صف الشباك)…

وحمر عيونو للناس الشغالين في المكتب وقال ليهم (نهاية اليوم.. حضور في مكتبي)… طبعا أنا -وكالعادة- مشاعري دايما مفضوحة… فشنو… قمت ضحكت بي صوت… وعاينت بي نظرات شماتة (للناس المهمين).. طبعا شموني شدييييد… ههههههه…

وبعدين بقيت متابعة (هذا الرجل) في كل حركاتو… وبعدما انتهيت من اجراءاتي مشيت عليهو وقلت ليهو (سعادتك… يااااخ تسلم البطن الجابتك).. قام ضحك وقال لي (ليه؟! أنا ماعملت غير واجبي)… قلت ليهو (ممكن أصورك؟!)… قال لي (ماتكبري الموضوع.. أنا زول بيأدي في واجبو وبس) وطنش فكرة النجومية دي…!
يااااااااااخ…. التحية ليك… ولكل سوداني أصيل… شهم… مخلص… بديك احساس انو السودان -رغم كل شي- لسة بخيييييييير!!!!

بقلم: رندا الكاروري


‫42 تعليقات

  1. جزاه الله خيرا،وجزاك أنت على إظهار هذه الصورة المشرقة والتي أصبحت نادرة

  2. قصة انا هنا أبوي مابعرفو دي ،، في بلاد العم سام عادي جداً يكون الأب واقف في الصف والابن في الكاونتر يكمل في الإجراءات ، كأنو ما بيناتهم معرفة

    1. يا امريكي …. انظر للموضوع بعيون قبل اقناء الجواز الامريكي … الزول ده راجل عديل كدة وفي شغله ما بجامل …. و الاخت رندا ما اظن عندها بيه سابق معرفة عشان تتملق .. قاعدة فى الصالة وتراقب فى الحضور ولفت انتباهها تصرفات رجل شرطة لا يشبه كثير من تصرفات رجال الشرطة …… وزي ما قالت ليك ما في فيتامين واو (واسطة) بمشي معاه

      العم سام و العم حام و العم قام جاري ديل ليهم عقود علي هذا السلوك و النظام لا نجده فى دول العالم الثالث …… فما تقارن
      رمضان كريم … تصوم وتفطر علي خير ..

      1. يا منفي حكاية ” ما تقارن ” و ما “تتعب نفسك ” دي اسوأ عبارات اصبحت تجري على لسان الناس في السودان ، انا و انت وغيرنا لازم نقارن و لازم نتعب عشان نتعلم من غيرنا و نتصلح عشان نحصل ناس العم سام و حام و غيرهم … رمضان كريم و الله يكتر امثال هذا الضابط الهمام.

  3. البطل ود الرجال ماوريتينا اسمه. علا اي حال معتقليه ونعتز باي سوداني مخلص

  4. والله يا جماعة الخير .. قضيت أسوأ يومين في إجازتي وأنا بحاول أطلع رقمي الوطني في العلاقات البينية في الخرطوم جمب عفراء .. زحمه وإساءه وموظفين ما عايزين يشتغلوا بحجة أن المكتب غير نظيف ومعاهم حق وجاء عامل النظافة حوالي الساعة 9 ينضف في المكتب وهنا كانت الساعة 9:25 والشغل ما بدأ .. و
    شئ كان غايه في السوء والله على ما أقول شهيد

  5. بعرفو وبعرف صورته وشفتو كم مرة واتكلمت معاه زول كتوم قليل الكلام كثير العمل ويجبرك علي احترامه ……….. زول اخو اخوان ويستحيل تلقاه بعمل فى حركات الضباط الفطور بتاع التلات ساعات و الشاي وونسة جانبية وووووووو …. ومعاه رائد كمان بس داك شوية كدة صعب ……
    لهم التحية ….. و لو عملو مظلة خارجية مكيفة يكونو ما قصرو لانه المحل مزدحم شديد واصلا هو ما مهيأ لاستقبال هذه الاعداد من البشر وخاصة بعد اضافة الرقم الوطني …. بقت الشغلانة جايطة شديد

  6. الله يكثر من امثالو و يوسع في رزقه و لك اختنا رندا مركز الرصد المتنقل لك الف تحيه ودا السودان اللي كلنا بنحلم بيه

  7. السلام عليكم صباح جميل مشرق صراحة أصبحنا نخاف من الشرطة أكثر من المجرمين وكدنا نفقد الأمل فيهم لكن اليوم فرحنا شديد والله لهذا البطل فله التحية والتقدير والاحترام في شخصة رجعت الهيبة والقدسية لمهنة الشرطة ولانبالغ لكن من الحال الوصل بينا نتشبث ببارقة الأمل على يد الضابط المحترم وهذه الصحفية المخلصة الجريئة وان شاء الله تعود الشرطة شارة أمن وأمان لكل الغلابة وتكن في ظل الرحمن بحراستها في سبيله بعيدا عن استغلال المناصب وحفظ الله البلاد والعباد

  8. رجل شهم أو كان غير شهم يؤدي في مهامه ….. أهم شيء نريد أن نعرفه هو كيف يتم استخراج الجواز الممغنط لغير السودانيين ……وهو الحاصل اليوم …. هناك العديد من الناس يحملون جواز السفر السوداني الممغنط وهم غير سودانيين … كيف هذا ؟

  9. تحية ليك يا رندة وتحية للضابط المثالي والذي صرنا نفتقد مثل هذا الضابط السوداني الاصيل
    اتمني له التوفيق واتمني لك النجاح والمواصلة علي نقل مثل هذه الامثلة من المواطنين التي تثلج الصدر

  10. والله ياجماعة نرجو ان نظهر كل جميل فى الصفات السودانية ولا ننسا ان الوسايل الاجتماعية فى التواصل بقت مفتوحة ويقراها غير السودانيين لذا يجب علينا ان نقلل من نقد الذات ونظهر كل جميل وخصوصا اخوانا المغتربين . لانو بى كل بساطة لمن تسى للسودان او السودانى انتو اول ناس حتتاذو لانو الاجنبى لما يلقى السودانى وصف شعبو بى صفة تانى بتكون معلقة فى ذهنو وبعمما على كل السودانيين . والله ازعل جدا لما القا واحد عامل فيها فاهم وهو بره السودان يكيل الشتايم وينقص من قدر السودان والسودانيين وحتى الحكومة اساتها قدام الاجانب لايجوز لانو برضو بنعكس على سمعتك . ذى الزول البنبز ناس بيتو فى الحلة الناس تانى بحترمو كيف وبحترمو ناس بيتو كيف . ولاحظو معى لاتجد اى فرد من باقى الشعوب يسى لبلدة . حتى الحبشى الخدام عندنا والبنقلاديشى الذين لم تقدم لهم بلدهم شى لايمكن ان يقبل ان ينتقد بلدة قدام اى اجنبى

    1. احييك اخي على تعليقك .. ولكن اخي حال المغتربين في سفاراتنا يتحدث عن نفسه ولا يحتاج الى وسائل التواصل .. فالكل يرى امام السفارات حال الناس التي يرثى لها وهم جلوس في الطرقات امام السفارات من بعد او قبل صلاة الفجر إلى آخر اليوم .. فالذي ينقصنا هو التنظيم اكثر من اي شيء آخر ..

      تحياتي ورمضان كريم

  11. صبحكم الله بالخير والصحة والعافية

    التحية والتقدير له ونأمل أن يحذوا حذوه بقية الضباط والجنود حتى يستقيم العمل .

    إذا كل منا إلتزم بواجباته فى أى موقع كان بجد سوف يكون للسودان شأن عظيم .

    التحية لشرطة السودان ممثله فى هذا الصبابط

    والتحية لكل من يخلص فى عمله

    وكل عام والسودان وأهل السودان بخير ونسأل ان يبلغنا جميعا رمضان ويعييننا على الصيام والقيام ويتقبله منا

  12. يا سلام علي جنابو ،،،،،،، والتحية لك رندا لإظهار الجتنب المشرق من الموظفين اللذين صرنا نجزم بأنهم 1000% حرامية…

    بس ياريت لو حددتي أين هذا المقر لنتوجه إلية لأنه بدون فيتامين (و)

  13. تسلم ياخال وهذا هو ديدنك وهذا هو طبعك وحقاً تسلم البطن الجابتك والبلد إذا كان به امثالك من بيدهم السلطة والقرارا لتغير حال السودان واصبحنا من الدول العظمة والشرطة رقم الفساد البها ولكن به اناس صالجين
    نتمني ان يكون هذا هو ديدن كل المرافق الحكومية التي تقدم الخدمات بأن يكون التعامل للغني والفقير فقط من خلال الشباك لأنه حقاً عملية مستفذة حينما يأتي شخص في الصباح الباكر وينتظر إلي نهاية اليوم وفي المقابل يأتي شخص بعد العاشرة وربما منتصف النهار ويقضي أمره في دقائق فقط لأنه يملك الواسطة …………!؟

  14. الناس النضاف زى الزول دا ما بيستمر بعد شويه لمن يرفض تنفيذ تعليمات واحد اعلى منو حينقلوهو للاقاليم او نسمع بيهو طلعو على المعاش هو دا السودان الزول الرسمى والجاد والنضيف يرسلوهو بيتو ويجيبو لينا الحراميه والمرتشين آه يابلد آه

  15. قطعتى عيشو ياخ بكره بطفشوا مالك وماله ياخ طالما بيمشى فى امور الناس فى داعى للنشر خلاص شكرتيهو وانتهينا

  16. يا اخوان الحق يقال كمان فى مقدم ايضا فى جوازات دار الأطباء بنفس القدر من الإجتهاد والصبر والتعامل الراقي نوفيه قدره من الشكر الجميل …………. وقل اعملو فسيري الله عملكم ورسولة والمؤمنين ………..

  17. اولا رمضان كريم علي الجميع و خاصه الاخت رندا
    و اقسم بالله في ضابط ف المغتربين لا يقل عن هذا قامه و شموخ و عزه و بشوش بشكل غريب بالرغم من كبر رتبته الا انه يتعامل مع الصغير و الكبير بي منتهي الادب و الذوق فكل ما اريد ان اقول عنه انه انســـــــــــــــــــــــــــــــــــــــــــان

  18. انشغل الناس في بلدي بالبحث عن السيئين ولم ينتبهوا المخلصين فشكرا علي نشرك لهذا الخير

  19. رمضان كريم على الجميع

    بجد …. يستحق …..جنايو نميري كل التقدير والاحترام على كل ما يقدمه …. بفرع العلاقات البينية … له التحية والتقدير

  20. والله ماقادره اتابع كل التعليقات .. لكن على حسب تجربتى فى البينيه .. كل الناس البتعرف بعض امورها بتنقضى بسرعه بعنى العندهم علاقات بالمسؤولين الجوه . انا واختى قضينا اليوم باكمله هناك ولما اتققلت علينا كل الابواب ومازاد الطين بله ان اتت احد الموظفات اتت وبكل ” بجاحه ” وطردت المواطنين الغلابه الذين من حقهم استخراج مسنتداتهم الرسميه بكل حريه وكرامه وعدم تمييز لاتهم مواطنين سودانيين ، فى هذا الوطن الذى لاتحنرم فيه الانسانيه ، هؤلاء المواطنين الذين كانوا جالسين على الارض لانه لاخيارات لديهم غير ذلك .. لانوجد كراسى والعدد كبير ـ قالت هذه الموظفه اذهبوا من هنا فهذه ليست مستشقى .. فثارت ثائرتى انا واخنى . فاتى هذا النميرى .. هو شخص مهذب ومحترم وحاول ان يهدأنا وطلب هذه الموظفه ولسوء الحظ لم تنال جزاءها ويعدـ ذلك قام الضابط بتنظيم العمل .. فانا اتساءل هل هذه طبيعته .. أم خلف كل ثوره .. تنظيم وترتيب للعمل .

  21. دا احنا قبل شهر عملنا ثورة كبيرة جدا في البينية بسبب الواسطات ولكلام الفارغ دا لمن اخدنا حقنا والضابط دا جا وشاف الحاصل شنو وفي ثواني الامو ر مشت ونظم القصة لكن البلد دي لو خلو الواسطات دي الامور ح تمشي وح ننعم بالخير وسبب ثورتنا استفزتنا واحدة منهم عندها دبورة وعاوزة تطلع فوق راسنا لكن ورينا الله كم وبستفناها لمن خافت ونادها الضابط دا زاتو واتكلم معاها لكن احنا اخدنا حقنا ب ايدنا وشديدنا ولكن فعلا دا واجبهم ومفروض يؤدوهو ع اكمل وجه

    1. كل الموضوع وما فيهو عدم التنظيم لو الناس نظّمت نفسها وأدت كل واحد الفرصة حسب دوره ما حدثت الفوضى وياريت وزارة الداخلية تتعامل بالحجز الإلكتروني للمواعيد وهو نظام بسيط لو طبق لإختفت الصفوف والزحام..

  22. الله اكتر من امثالك المقدم نميري
    والتحية ايضا ابعثها لانسان اخر العقيد يس بجهاز المغتربين له نفس الصفات

  23. شوف الزمن بقى يخلينا نبرز أشياء كانت حتى القريب عاديه وبسيطة وليس بغريبة على الشعب السودانى أصبحت الان الناس يفتشوها ويتم تداولها ونحن اصبحنا نفرح بيها شديد
    هل اندثرت اخلاقنا الحميدة وتعملنا الراقى واصبحنا نتفاجأ للواجب من المسئولين
    ربنا يوفقك ذلك الضابط في عمله ويجعله في ميزان حسناته وان يحزو حذوة زملائه ونحن أيضا السودانين

  24. يا أخوانا والله في ناس عندهم حساسية ساكت كدا من الكاكي وناس الشرطة .. والله أغلب الضباط عندهم نخوه وشهامة .. يعني زي الأخت دي لو ما شافت الراجل دا .. كان ممكن يكون رأيها سيّء عن الشرطة .. يعني كمان لازم بتاع الشرطة يكون عندو حبة شفتنه لأنو بيتعامل مع نوعية عنيفة في المجتمع .. يقول ناس الشرطة عندهم مشية كدا بتاعت شماسة . ودا كلام ما صحيح .. الداير يغير رأيه في ناس الشرطة يحوم بالليل ويمشي أقسام الشرطة عشان يشوف البلاوي الماسكنها من الناس

  25. من لايشكر الناس لايشكر الله اتقدم بالشكر الجزيل لطاقم السفارة السودانية بدولة الإمارات العربية المتحدة ابتداء من السفير للعقيد والمقدم وجميع العاملين بالسفارة على حرصهم وخدمتهتم للجالية السودانية بأبوظبي واخص بالشكر الاخ ادم والاخ امير والاخ طارق والاخت امال والاخ الزبير وبقيه العقد الفريد تم استخراج الرقم الوطني والجواز بصورة جميلة ومشرفة شكرا” شباب وزارة الداخلية للقيام بواجبكم وسعة صدركم فلكم الشكر وجزاكم الله الف خيرا ورمضان كريم وكل عام وانتم بخير

    اخوكم/الياس علي مكي أبوورقة

  26. نعم مازال السوداني بخير شأنه شأن بقية الامة، ويتجلى ذلك ايضا في المواصلات،
    لكن خلونا نزوغ شوية، حمر للجماعة وبسم ليك؟ سؤال خبيث طبعا.

  27. يابتاع العم سام انت، مالقيت مثل اسلامي؟ المساواة بين الجميع بدأها الحبيب عليه الصلاة والسلام بأن كشف بطنه ليقتص الاعرابي”الذي بادر بتقبيلها”،
    واتبعه الصديق اخذ ما يلزمه صبيحة خلافته وذهب للسوق ليعمل كما يعمل العامة حتي ارجعه الفاروق الذي وهو امير المؤمنين وقف مع اليهودي امام القاضي كفرد عادي، ورفض مناداته من قبل القاضي بأبي الحسن، والكثير لو رجعنا له لما احتجنا للانجاس.

  28. يابتاع العم سام انت، مالقيت مثل اسلامي؟ المساواة بين الجميع بدأها الحبيب عليه الصلاة والسلام بأن كشف بطنه ليقتص الاعرابي”الذي بادر بتقبيلها”،
    واتبعه الصديق اخذ ما يلزمه صبيحة خلافته وذهب للسوق ليعمل كما يعمل العامة حتي ارجعه الفاروق الذي وهو امير المؤمنين وقف مع اليهودي امام القاضي كفرد عادي، ورفض مناداته من قبل القاضي بأبي الحسن، والكثير لو رجعنا له لما احتجنا للانجاس.لماذا كل ماهو جيد غربي؟؟؟؟؟؟.

  29. الكلام الفوق دا كلو حقيقة في سعادتو ،،،رغم عن أن اليوم الثالث أتردد على البينية لاستلام جوازي والرد ما جاء من المصنع لسة ،،،لكن لما شفت هذا السعادة بقوم بدور كبير نسيت مصيبتي،،،وياريت كل استطاف العلاقات البينية يشتبه بهذا الأسد ،،،حفظك الله

  30. فعلا تسلم البطن الجابتو ولو كان عندنا في كل مركز شرطة او اي مرفق شخص يقدم خدمات للمواطنيين بمثل ماقام به هذا الرجل الجميل والذي حاز علي اعجابنا جميعا لكان السودان السودان وشكرا له وشكرا لك رندا الكاروري

  31. هذا حال كل الشعب السوداني لولا ضيق العيش
    فلا يجب ان نمجد هذا ونلعن ذاك
    لا احد يعلم ما بداخل البيوت
    ولا احد يعلم بحاجات الناس
    ولا احد يعلم لم سرق السارق
    لكل دزافعه
    انا لا اداقع علي المحسوبيه والرشوه ولكني ادافع عن السوداني الاصيل الذي حوله ضيق العيش والضنك الي اله جمع اموال .
    وسؤالي لكم” لو كنا نعيش في رخاء هل يمكن لاي سوداني مد يده؟”

    انا ارفع القبعه احتراما واجلالا لهذا القامه الذي عاش نظيفا رغم مقدرته علي الكسب الحرام ولكنه رفض
    يارب ارفع عتا الغلاء والبلاء يارب

  32. الاخ ahmed fahad حسن ظنك في خلق الله هل انت تعلم ما في القلوب حتي تقول لمجرد الرياء اللهم انقذ هذا البلد واجعل اهله منعمين مترفين