زواج سوداناس

الكهرباء جات



شارك الموضوع :

الكهرباء.. أصبحت حاجة مهمة في حياة البشرية العصرية.. الاعتماد عليها بقى كبير.. ولما تقطع أي زول يحس إنو حياتو وقفت.. ويقعد ينتظر ويقلق متين تجي؟.. الاكتشف الكهرباء راجل ما هين وما ساهل.. وخدم البشرية كتير.. زيو وزي أخوانو الاكتشفو العلاجات.. زي البنسلين.. وبقينا نحن مهمتنا كلها نتعالج ونجبجب ونغني: “البنسلين يا تمرجي نادوا الحكيم يا تمرجي”.. ونحسدو ونتلفت جاي وجاي وعشان نرتاح ونطمن ونحس بالتفوق نقول “أمـ.. كافر وح يخش النار”..
كبقية البشر في العصر الماثل.. اعتمادنا على الكهرباء أثر في كل جوانب حياتنا.. ونجد أنها بدأت حتى تشكل خريطتنا النفسية.. تلقى زول لو قطعت الكهرباء يقعد يداعي في ناس الكهرباء بدون ما يعرف السبب شنو؟.. وممكن جدا يكون سبب خارج عن ارادتهم.. لكن برضو يداعيهم بان “الله يقطع رقابكم” فهذا شخص شرير.. وقد يكون هذا الشرير له مشاكل خاصة وقطعة الكهرباء خلتو يتفشى فيها وفي أهلها.. ومنا المتفائل والصبور تقطع يحك راسو ويقول “حسي بي تجي” وتجي الكهرباء بعد ستة ساعات ويقول للجماعة “أنا قلت ليكم شنو؟ مش قلت ليكم حسي بتجي؟”.. ومنا من هو مفكر جاد يهاجر وداير يقنع نفسو ويبرر ليها أسباب الهجرة: “والله الكهرباء دي كرهتنا البلد دي”.. ومنا من هو لابد للحكومة في أقل غلط ويلخبط ويجوط
الأمور مع بعض.. أول ما تقطع يقول: “بالله دي بلد دي؟.. مافيها ديمقراطية ولا حرية راي.. وكل دقيقة الكهرباء قاطعة؟”..!!
قبل يوم قطعت الكهرباء في محل سكني.. قلت كدي أجرب اتصل بيهم.. اتصلت.. جاني رد آلي.. مرحبا بك في ناس الكهرباء أصبر شوية ونحولك لي زول تنضم معاهو.. وقالوا لي خلي بالك مكالمتك دي مسجلة.. يعني أي نضم اعوج ممكن يوديك في داهية.. ومزيكا “كررو كررو” ويقولوا لي مكالمتك رقم تلاتة وخمسين”.. وأنا خاتي التلفون في اضاني “مزيكا ” كررو كررو” مكالمتك رقم خمسة وتلاتين.. وبقيت بعد كل مزيكة اتوقع براي يا ربي مكالمتي تكون بقت رقم كم؟.. وشغال أتوقع واحسب معاهم.. غايتو بعد ما أضاني صنت من التلفون.. ردوا علي.. حدثتهم بالحاصل.. أخدوا اسمي والولاية الأنا فيها وموقع الحي وبيتنا.. في النهاية قالوا لي خلاص خلي التلفون فاتح لانو ح نتصل بيك.. صراحة أنا قلت دي مكنة منهم ساكت.. لكن اتصلوا علي “أها الكهرباء جات؟”.. رديت لا.. بعد خمسة دقائق الكهرباء جات وفرحت أنا وسكان الحي.. وسمعت الرجال والنساء والاطفال يتباشروا: “الكهرباء جات.. الكهرباء جات”.. واتصلوا بي ناس الكهرباء تاني “اها الكهرباء جات؟”.. بكل أمانة كان تعامل ناس الكهرباء تعامل راقي.. ولمست منهم اهتمام شديد.. حتى انهم بعد وصول التيار الكهربائي اتصلوا تاني وسألوني.. جات واللا ما جات؟.. من اهتماهم خفت يسووني شغلة وكل مرة يتصلوا ويقولوا لي أها.. الكهرباء نعل ما متلومة فيك.؟؟؟
تحية لكل العاملين بالكهرباء..!!!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *