في رمضان

*الصيام في السودان:- من شروق الشمش الى مغيبها “الامتناع عن شهوتي البطن والفرج”.
ومن مغيب الشمش إلى شروقها “الجبجبة مع القنوات الفضائية السودانية بعد يفتروا من الجبجبة.. يقعدو يساككو في القنوات العربية ويكوسوا المسلسلات ويبحلقو فيها”… في إحصائية لرمضان هذا العام سوف تقدم القنوات العربية تمانية وتلاتين مسلسل… يعني ح يجهجهونا جهجهة من أمها…. ما تعرف تتابع ياتو وتخلي ياتو…. كما ح يجهجهونا ناس قنواتنا ببرامج الهجيج ما نعرف بعد الميات نرقص مع منو ونخلي منو…. والله يقدرنا على الرقيص معاهن كلهن وما نتلوم في قناة فيهن… أصبح رمضان “بالنهار صيام.. وبالليل جبجبة تمام”!!!!!!
*رمضان في السودان.. شهر التوبة والغفران.. وشهر أغاني وأغاني….!!!!!
*في رمضان كل الفضائيات السودانية تحاول أن تجوّد برامجها… بأن تشف برامج القنوات التانية وتلفحها وتهري المشاهد…. وللمشاهد في ميزان حسناتو… يجودوا ويتنافسوا كأنها بتشتغل في رمضان بس… مالو لو طوالي حاولوا يجتهدوا ويصلحوا برامجهم؟؟؟؟ بس ما بطريقة شيلني وأشيلك. شففني وأشففك…. ممكن لو خلوا الكسل الإبداعي يعملوا برامج جديدة بطريقة جديدة وتنافس…. صحيح رمضان ليهو خصوصيتو لكن برضو ما بيعفيهم باقي السنة….
*في رمضان تجتهد جمعيات وجماعات المجتمع المدني والأفراد الفناجرة في أن يفطروا صايم ويوزعوا الأكل يابس واللا متبوخ…. وناسين إنو الناس ديل بياكلوا باقي السنة…. يعني دايرين أكل طول العام والأكل مافي رمضان بس…..!!!!
*في رمضان…. الولايات والمحليات والجهات الحكومية…. تتصدق على الأسر المتعففة. مع شيل الحال… وباقي السنة يخلوهم لي تعففهم.. ومافي زول جايب خبرهم…. كأنو الفقر والحاجة بتنزل عليهم في الشهر الفضيل….. في ناس من غير رمضان بياكلوا وجبة واحدة.. متعففين برضو…..!!! ويمكن لي باكر ما يلقوا شي…. الصدقة والتصدق ما تربطوها برمضان ما تبقى موسمية…. لو محننكم وقلبكم عليهم يا ريت توفروا ليهم مصدر دخل وتساعدوهم وتعفوهم من الحرج “والدخول في الضفور” وشيل الحال في كل رمضان… ويا ريت تعفوا المساكين الحايمين في الشمش والهجاير الكايسين للقمة العيش الفارشين في الواطة وبتاعين الأورنيش والرابطين للعربيات في إشارات المرور دي شمش وهجيرة ما بيقيف فيها واللا يصنقر فيها إلا زولا محتاج ومصروم… وستات الشاي.. يا ريت تعفوهن من المساككة ولمليم العدة وقطع الرزق.. وفروا ليهم البديل قبال ما تمنعوهم.. ما تمنعوهم وتقولوا لكل واحد يلا امشي أكل نارك….!!!
*في رمضان..في كل التجمعات “المؤسسات الحكومية – الشركات”… كرتونة حاجات رمضان.. بالأقساط للعاملين… من يفوت رمضان يقعدوا يحلوا فيها لرمضان الجايي.. ويبدوا كرتونة جديدة….. في ناس بيشيلوها تعففا برضو…..!!!!. تسعين في المية من الشعب السوداني متعفف…. يصارع ويلاوي في المعايش رجالة وحُمرة عين!!!!