د/ عادل الصادق المكي

إنت.. ماك.. نصيح


وانا ماشي في الشارع.. مريت بعندهم بيتناقشو.. واحد أقروب “ماشي كداري”.. وواحد سايق عربية أتوس..

قال سيد العربية لسيد الكداري: ماشي في نص الشارع كدي أصلك عربية؟.. عربية إنت؟.. “قالها وهو يعضي علي سنونو”

رد سيد الكداري وبرضو عاضي سنونو: أنا محظوظ عشان أبقى عربية؟.. يا ريت..

ملاحظة جديرة بالتسجيل: لاحظت إنو نحن أكتر شعب يعضي سنونو وشلوفتو التحتانية حين شكلة..

ضحك سائق الأتوس وهزّ راسو.. مستعجبا.. مستنكرا.. ثم تاورتني شلاقتي.. والتي أتيقن منها تمام اليقين أنه في يوم من الايام حتجيبها لي ضقلها يكركب.. وحتدخلني في حيص بيص. تاورتني شلاقتي فسلمت على الرجل الذي يتمنى أن يكون عربية:

(أزيك)

“عليكم السلام”

(يا اخي الناس دي والله عجيبة خلاص.. المشي في شارع الله دا، ما دايرننا نمشيهو؟.. خلي بالك سمعت نضمك مع سواق الاتوس داك)

“آآآي.. بالله شفت كيف؟..”

(لكن يا اخوي كدي كلام بيني وبينك كلام اخوان في الله.. انت داير تتقلب عربية لي شنو؟؟؟..)

عاين لي شديد.. حمّر فيني

“ها.. إنت ماك نصيح؟.. حسي الاتوس دي.. سعرها كم؟”

قلت ليهو..

(يمكن.. مية وعشرين مليون)

بأطراف أصابعين إيدو الشمال لزاني في سدري وقال لي:

“انت دا حسي لو طصتّك عربية ومتّ.. ديتك كم؟”

وانا في سري: “إن شاء الله تطُصك انت دا.. عامل إضنيك الدايرات يطيرّن من راسك ديل”.. ثم بالخاطر مقارنة سريعة بين إضنيهو ومريات الاتوس قلت ليهو: (إنت لو طصتك عربية ديتك تلاتين مليون بس..)

“أها ما قلت لك؟.. جاك نضمي.. عان العربية بي كم، وإنت بي كم؟..”

قلت ليهو فعلا العربية اغلى منك.. ثم كربّت كراعي ومشيت بسرعة من الزول البداية معرفتي بيهو صدمة عربية دا..

وانا ماشي قعدت أحسب.. والله نضمو صاح.. يعني الأتوس المستعملة تساوي اربعة سودانيين ضكور.. أو تمانية أناتي.. الغريبة فيهن واحدة تكون لابسة دهب يساوي سعرها في سوق الدية مرتين.. وممكن تساوي سبعة تياب مطبقاهن وخاتاهن في الدولاب.. لكن غايتو الضكر يا الله يكابس ويساوي سعر ركشة.. وانتايتين بركشة واحدة وما فيها مسجل كمان.. الغريبة نحن سعرنا بالقطاعي أغلى.. كليوة واحدة تجيب خمسين مليون.. ولو نضيفة وما اشتغلت كتير بتجيب الستين مليون براااحة.. وبالجملة رخاااااص.. غايتو البلد دي اقتصادها مخلبط جنس لخبطة!!!.. نصيحة لوجه الله، الحاسي إنو المغسة ح تقتلو، يبيع ليهو كليوة واحدة ويهيّص باقي أيامو في الدنيا دي.. وبعدين الكلوة الباقية مقضياهو.. هو أصلو قاعد يشرب شنو؟ مو جغيمة الموية دي؟.. مكفياهو.. يا قول المرا القالت لي راجلا كدي، لما عاوزة تغيّر عفش البيت والراجل قال لها مفلس، قالت لو ما بتشوف في الرجال البي يبيعو في كلاويهم ديل؟..

أتمنى إعادة النظر في قيمة الدية.. لإنو يا جماعة بأمانة كدا الدية دي بقيمتها دي خسرانة معانا.. تكاليف الفراش والبِكا ما بتغطيها!!!!