زواج سوداناس

الهلال ينقذ (أغاني وأغاني)



شارك الموضوع :

يعني بكري المدينة وعمر بخيت والمعز محجوب وتراوري وعبده جابر والباشا وفييرا ما براهم ..انضم ليهم عاصم البنا ايضا
“””””””””””””””””””””””””””””””””””””””””””
انتوا يا فيصل أحمد سعد سافرتوا الهند وقطعتوا تذاكر ..عشان (تتدردقوا لينا في النجيلة)
“””””””””””””””””””””””””””””””””””””
طه سليمان قاعد مطرف براهو ..وما عاوز يتكلم مع زول – وفوق دا لابس ليه (نضارة سوداء) في نص الليل
“”””””””””””””””””””””””””””””””
مكارم بشير تغني باريحية عالية ..وتمنح الاغنيات التى تغنيها مساحات للبراح ..والتمدد في فضاءات بعيدة
“””””””””””””””””””””””””””””””””””””
• لولا اغنيات (الهلال) التى قدمها برنامج (اغاني واغاني) امس لاصبح البرنامج مثل نشرة عشرة في التلفزيون القومي – ما فيها اي حاجة.
• اخبار بايتة وقديمة ..وطريقة مملة وثقيلة يقدم بها (الخبر)..الخبر يقدموه ليك زي (الجنازة).
• او زي كباية الشاي الباردة.
• البرنامج اصبح مثل حملة التطعيم..مساخة مبالغ فيها.
• اي فنان في البرنامج زعلان ومكشر …وفوق الزعلة دي ..عاوز يستعرض.
• اغنيات الهلال الرائعة والجميلة التى قدمت في البرنامج انقذته من حالة الملل التى بدأ يعاني منها البرنامج.
• ومن التكرار الذي اصبحنا نشهده في البرنامج ..وكأننا نشاهد في (اعادة) للبرنامج ولا نشاهد في حلقات جديدة.
• امس خرج البرنامج من ملله هذا بفضل روائع اغنيات الهلال …وكميات الفرح والتفاؤل في كل الاغنيات التى تغني للقمر والهلال.
• وان كانت اغنيات (النجوم) التى قدمت في البرنامج خصمت منه كثيرا ..فكل الاغاني المحتشدة بالنجوم فيها فراق وسهر ووجع وفراق..سواء كان ذلك في (يا نجيمات) عصام محمد نور او (نجمة – نجمة الليل نعدو) التى قدمتها مكارم بشير او (يا نجوم الليل اشهدي على بكاي وتسهدي) التى تغني بها الهلالي عاصم البنا.
• حتى في دي يا ناس طه وحسين الصادق ما قادرين تقدموا اغنياتكم …غناكم يقدموه ليكم الهلالي عاصم البنا.
• انتوا فاضيين لي من (الخناقات).
• يعني بكري المدينة وعمر بخيت والمعز محجوب وتراوري وعبده جابر والباشا وفييرا ما براهم ..انضم ليهم عاصم البنا ايضا.
• برنامج اغاني واغاني بدأ امس الاول في صورة باهتة جدا ..(14) فنان وفنانة مرصوصين تقول منتظرين ليهم (فحص).
• والسر أحمد قدور في (النص) تقول سائق ليه (بانطون).
• استديو شركة (مداد) الذي تم فيه تصوير البرنامج لم يضف للبرنامج شيء ..سواء اضاءة سيئة ..(وصرة) على كل المشاركين في البرنامج.
• الجماعة ديل وقت قالوا في خلافات بينهم نكروا ، وعندما نشرت الصحف اخبار عن الخلافات التى حدثت بين الفنانين المشاركين في البرنامج والموسيقيين قلنا الامر عادي لا يخرج من المنافسة الشرعية.
• لكن الحلقة الاولى التى قدمت من البرامج اثبتت ان الخلافات والصراعات اكبر مما نشر.
• الموضوع دا فيه (كرري) عديل كدا.
• ممكن يجيب ليه دم للركب.
• طه سليمان قاعد مطرف براهو ..وما عاوز يتكلم مع زول – وفوق دا لابس ليه (نضارة سوداء) في نص الليل.
• فيلم اجنبي بس.
• طه سيلمان امس الاول لو البرنامج كان على الهواء كان ح قوم يضارب ..اكيد مع (صرتو) دي بتكون (مضاربتو) تم حذفها عبر المونتاج.
• النضارة السوداء دي اصلو ما نضارة عادية.
• دي مشكلة جاهزة.
• كان يمكن ابعاد طه سليمان من الحلقة الاولى طالما دخلها بنفسيات تعبانة كدا ونضارة سوداء كمان.
• واضح ان البرنامج ما فيها (ادارة).
• خاصة ان طه سليمان لم يقدم في تلك الحلقة اي حاجة غير (الصرة) والنضارة.
• الغريب في الامر ان طه سليمان امس ايضا لم يقدم شيئا ..لكن خرج من (الحالة) التى كان فيها في الحلقة الاولى.
• ضعف البرنامج وتراجعه ..اثبته طه سليمان الذي فقد القدرة على ان يلفت النظر اليه بالاغنيات فصار يستعرض بما يأتي به في البرنامج من (لبس) غريب او (تسريحة) جديدة.
• الغنا ما نضارة سوداء يا طه سليمان.
• والناس تطلع بعد البرنامج لتعلق عن نضارة طه سليمان السوداء (نص الليل) او (بنطلونه) بتاع (الصيد )الذي ظهر به على شاشة قناة النيل الازرق.
• نحن في رحلة صيد يا طه.
• قايل نفسك في قناة هندية!!.
• بي حالتك دي كان تمشي مع ناس (جو هندي) عشان تاخد راحتك.
• في الماضي كان الحديث كله ينصب نحو (الاغنيات) ..والمعلومات التى يقدمها السر أحمد قدور.
• • الآن اصبح الحديث عن ( صرة) طه ..ونضارة (طه)…وتسريحة (طه)..وبنطلون (طه).
• وطه مالو الليلة؟.
• وطه زعلان.
• ثم بعض المشاغبات والضحكات التى يظهر بها عاصم البنا.
• الحديث عن الاغنيات اصبح في حدود …وان كانت الفنانة مكارم بشير تستحق التقدير وهي اضافة حقيقية للبرنامج.
• مكارم بشير تغني باريحية عالية ..وتمنح الاغنيات التى تغنيها مساحات للبراح ..والتمدد في فضاءات بعيدة.
• الحسنة الوحيدة في البرنامج (مكارم بشير)..فهي تقدم الاغنيات بثقافتها هي وتضع فيها بصمتها الخاصة.
• ما دون ذلك فقد كان هناك تراجع في البرنامج منذ الوهلة الاولى.
• هذا التراجع نرده للاستديو المظلم الذي ظهر فيه افراد البرنامج اضافة لضعف الصوت.
• اما الاسوأ من هذا ..فهي المقاعد (المشاترة) التى يجلس عليها المشاركون في البرنامج.
• تقول قاعدين ليهم في عيادة خارجية.
• هذا لا ينفى المشاهدة العالية للبرنامج ..لكن هذا ايضا لا يعني جودة البرنامج.
• قناة ام درمان في نفس التوقيت تقدم حلقات رائعة …جديرة بالمتابعة.
• وكذلك تقدم قناة الشروق برنامج (بغنيلك) ..وقد كانت مشاركة معتز صباحي (رغم لبسته الغريبة) امس في البرنامج مميزة.
• قدم معتز صباحي اغنية (قلبي مالو اليوم) بصورة غاية في الابداع.
• معتز يغني بطريقته ويبدع في خصوصيته لذلك طربه العالي يصل للذين يستمعون له.
• امر آخر ..نستوقف عنده في قناة النيل الازرق ..ونحن ننظر لبرمجتها في اليوم الاول في رمضان.
• دراما (جو هندي) للاسف الشديد كانت عبارة عن (عبط).
• او استنكاح واستغفال للقناة والشركات الراعية.
• انتوا قايلين الهنود ديل بيدردقوا في النجيلة.
• دا فهمنا للهنود.
• (جو هندي) حاولت الاستثمار في ظهارة (الخطف) في الافلام الهندية ..وقد فات عليها ان الافلام الهندية تجاوزت هذه المرحلة.
• الخطف في الافلام الهندية في الافلام القديمة (ابيض واسود).
• بعدين انتوا يا فيصل أحمد سعد سافرتوا الهند وقطعتوا تذاكر ..عشان (تتدردقوا لينا في النجيلة).
• كان على (الدردقة) شارع النيل دا كلو (نجيلة).
• خسارة قروش ساكت.
• قاطعين ليك تذاكر للهند ..ونازلين ليكم في فنادق ..ومالين لينا الجرايد تصريحات عشان تتدرقوا لينا في النجيلة.
• (جو هندي) خصم على الدراما السودانية …وهو خط رجعة تجعل المشاهد السوداني ينفر عنها…ونقطة سوداء كمان فيها.
• الكارثة الاكبر في قناة النيل الازرق هذا العام برنامج (شق الديار)…برنامج يخلو من الفكرة.
• او يملك الفكرة لكن يقدمها بصورة باهتة وممللة.
• شنو يعني تقعدوا تغنوا لينا في (العربية)؟.
• والصوت ما واضح.
• والصورة ملخبطة.
• العبقرية هنا وين؟.
• او تنزلوا في احد الكافتريات عشان تتحلقوا حول (صاج الشية) وتغني نانسي عجاج (قالوا قالوا علي شقي ومجنون).
• انتوا جنيتوا يا ناس قناة النيل الازرق؟.
• على العموم سوء البرنامج ليس غريبا عليه طالما (الطاهر حسن التوم) مشرف على البرنامج.
• يا الطاهر خليك في (حتى تكتمل الصورة) اصلو ما في زول بيشاهدك..ما تنط لينا في (شق الديار) و (اغاني واغاني).
• القناة استقلت اسم المذيع الكبير سعد الدين ابراهيم وتاجرت باسم المطربة القديرة نانسي عجاج من اجل ان تحشد اكبر كمية من الشركات الراعية دون ان يكون للبرنامج قيمة او مستوى.
• اخطر من كل هذا ان قناة النيل الازرق تستنسخ ضيوفها في كل برامجها على امتداد اليوم بصورة مملة لا تراعى ادنى حدود حقوق المشاهدة.
• عصام محمد نور وعوض احمودي يشاركان بصورة ثابتة في (اغاني واغاني)..سوف يجدهما المشاهد ايضا في (شق الديار).
• الفاتح جبرا في (شق الديار) وفي برنامج (انسان في رمضان).
• فيصل أحمد سعد في (شق الديار) وفي (جو هندي).
• هذه ملاحظات خرجت بها فقط من اليوم الاول …ترى كيف سوف تكون الاوضاع بعد ان يمضى الشهر الكريم.
• اذا كان في اليوم الاول يحدث مثل هذا التكرير …كيف تكون الايام الاخرى.
• خاصة وان القنوات تحرص ان تقدم في يومها الاول افضل ما عندها.
• سوف نعود بشيء من (التقييم) لنكتب عن قناة النيل الازرق و (اغاني واغاني)..وسوف نكتب كذلك عن قناة الشروق وام درمان والخرطوم.
• القنوات السودانية محتاجة تعرف ان رمضان دا ما شهر الغنا.
• رمضان شهر الصوم.
• افتح اي قناة سودانية بعد الافطار بتلقاهم قاعدين يغنوا.
• …………….
• ملحوظة : سوف نعود.
هوامش
• القنوات السودانية مع كثرتها ومع صرفها الخرافي في برامج غنائية ..ترفع يدها عن مباريات الممتاز وكأس السودان.
• لو نقلتوا مباراة الهلال والاهلي شندي بصورة جميلة وباستديو راقي احسن من الغنا البتنقلوا لينا فيه دا.
• الهلال يلعب اليوم مباراة صعبة امام الاهلي شندي.
• والاهلي شندي من منطلق راعيه صلاح ادريس سوف يلعب بدوافع قوية امام الهلال اليوم.
• لكن ان شاءالله الهلال قادر على الانتصار في هذه الامسية الرمضانية الجميلة.
• امشوا شوفوا ناس اندرزينهو..وجوليام.
• تعالوا شوفوا وليد علاءالدين ووليد الشعلة.
• اكيد ما ح تخسروا.
• على الاقل ح تتفكوا شوية من (عبث) الفضائيات السودانية.
• ……………
• عاجل : برنامج اغاني واغاني بقى زي (الجزارة) البتبيع موية فول…تقول ليهم عاوز (لحمة) يقولوا ليك في (موية فول) بس.

شارك الموضوع :

تعليقات الفيسبوك

تعليقات


1 التعليقات

      1. 1
        سوداني__لا حزبي__لا انفصالي _وحدوي

        والله حرام على قناة النيل الازرق ان تقدم برنامج باهت في كل شي مثل شق الديار_الربنامج يخلو من كل شي __فكرة ومضمون _عباطة وهبالة وكلام فارغ _تصوير ضعيف داخل السيارة ____ مالفائدة من البرنامج __جوانب سياحية ضعيفة ولاترقى للمشاهدة __غناء اقل مايوصف بالهبالة ووضاعة الفكرة

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *