اللهم إني صائم
(اللهم إني صائم)
قالها صلاح وهو يرد عينيه بعد مدة طويلة عن ظهر امرأة كانت تسير أمامه.
(اللهم إني صائم)
قالها صلاح بعد أن قال لصديقه الفاتح.. شفت إنتصار لابسة العباية في رمضان ومنتقبة البشوفها هسي ما يشوفها قبل يوم من رمضان.. ياخي دي صايمة على شنو والا من شنو ما عارف.
(اللهم إني صائم)
قالها صلاح بعد أن ألمح لمتعامل معه أن يعطيه عمولة وصلاح موظف حكومة.. صلاح وضع العمولة في جيبه وأخرج من ذات الجيب مسبحته.
(اللهم إني صائم)
قالها صلاح بعد (شكلة ليها ضل) ذكر فيها من الألفاظ الفاحشة ما لم يذكره سكارى في خمارة.
(اللهم إني صائم)
أمر صلاح زوجته أن لا تعطي جارهم فؤاد ثلجا.. ناس السوق ديل يبيعوا لمنو؟.. ثم ثانيا نحن محتاجين للتلج ده يا إنتصار شوفي الزمن من الإفطار للسحور الواحد بيستهلك موية قدر شنو.. وبعدين فؤاد ده بيكون شحد الحلة كلها.. عاوز يجمد فراخ هو.
(اللهم إني صائم)
تراجع بها صلاح عن سرد طويل لما رأى عربة تنزل ثلاجة لجارته حاجة بخيتة.. المرة دي السنة كلها عاملة نفسها فقرانة وكل ما يجي عيد أو مناسبة تطلع هوايل.. تقول ليك أولادي مغتربين.. لا بالله نحن الاغتراب ما عارفنو… المرة دي بتكون بتبيع بنقو والا…
(اللهم إني صائم)
ختم بها صلاح حديثه عن إمام المسجد وكيف أنه لا يصلي التراويح لأن هذا الإمام فاسق بمعنى الكلمة ومخارج الحروف ذاتها عنده (مكعوجة) ياخي ده يوم قرأ لينا سورة الزلزلة قلنا جانا زلزال.
(اللهم إني صائم)
قالها صلاح وهو ينهر شيخا كبيرا يقف شماعة بجوار كرسيه لأنه اتكأ عليه مع حركة العربة.. شنو يا حاج كل ما ساعة متلصق فينا كده.. عاوزين نغمض شوية…لا عليك الله نوم فوقي أحسن.
(اللهم إني صائم)
قالها صلاح وهو يجلس على السجادة في انتظار الأذان…..
تبسم صلاح وكرع كوب عصير.
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة