زواج سوداناس

الصيام في (جوليام) ظهر


محمد عبد الماجد 2

شارك الموضوع :

ازهري محمد علي : (اقول لكم بصدق إن أولئك أجمعين يجب أن تمرَّ تجربتهم على منصَّة حِمَّيْد، ويخلعون قبعاتهم احتراماً وتقديراً لتجربته)

درسونا الحتة دي (عصرت على طرف الطريق – وعقدت سفنجتا بي دلق – ينشافن الاتنين خُدر)

لا جبت لينا برازيلي زي الناس يا الكاردينال ..لا حسمت لينا موضوع بكري المدينة

زول قاعد في استاد الهلال – لابس ليه (سفنجة) قديمة كل فردة من بلد…مشققة من الارضية حقتها.

· الدنيا حر.

· واحدة في (السفنجات) مقطوعة – زي ما إلتقط محمد الحسن سالم حميد لمن شاف براهو بعيونو (الشوّافة) حالة (الضياع) دي (عصرت على طرف الطريق – وعقدت سفنجتا بي دلق – ينشافن الاتنين خُدر).

· ما في فقر اكبر من (عقدت سفنجتا بي دلق).

· ربما هي قناعة …وحيلة ذكية لمجابهة صعوبة الزمن وقسوته.

· وكمان عشان حميّد يثبت (الحرفنة)..او عشان ما يحرج ليه زول قال : (ينشافن الاتنين خدر).

· قصة (السفنجة) دي ..تصلح تدرس في مقررات الشهادة السودانية – بدل ما تملونا بي حالات (رسوم) ساكت.

· وحصص فاضية – ما قاعدين نستفيد منها اي شيء.

· درسونا الحتة دي (عصرت على طرف الطريق – وعقدت سفنجتا بي دلق – ينشافن الاتنين خُدر).

· وخلونا برانا بعد كدا بنشق طريقنا.

· برانا بنشوف مستقبلنا.

· اذكر مرة مع الزميل (خالد فتحي) في احدى سنوات ذكرى رحيل (حميد) حاورنا الشاعر الحاذق (ازهري محمد علي) الذي قال لنا عن هذا المقطع :

· (من يقوى على (تأبيد) اللحظة بتلك الذاكرة الفوتوغرافية العالية الحساسية كما فعل حِمَّيْد..؟!! وعصرت على طرف الطريقة مقطع ذو دلالة عميقة، فالمرأة في الريف لا تمشي بمنتصف الطريق ، لأنه يعتبر في عُرفهم (قِلَّة إدب)، وأيضاً دليل على أنه لم يتبق ثمَّة طريق (إلا تزح بالحيط) ، لأن كل المنافذ غُمرت بالماء، وأنا اعتقد أن عظمة حِمَّيْد تكمُن في الالتقاط ، وقدرته في (تأبيد) اللحظة. وأزيدكم أنني جلست إلى شعراء كبار، وحاورتهم من لدن، عبدالرحمن الأبنودي، وأحمد فؤاد نجم، وتتبعت آثار آخرين اتهموا أيضاً بالشعر العامي، امثال، بيرم التونسي ، اقول لكم بصدق إن أولئك أجمعين يجب أن تمرَّ تجربتهم على منصَّة حِمَّيْد، ويخلعون قبعاتهم احتراماً وتقديراً لتجربته).

· المهم – عشان (حميد) ما يطلعني من الحتة القاصدها.

· عشان ما اطلع ليكم من الموضوع.

· وبعدين ما اعرف ارجع.

· واحد في استاد الهلال لابس ليه (سفنجة).

· قاعد وبعلق على الاشياء.

· عيونو الاتنين فاتحات شرق.

· طبعا بتكون في مفارقات عجيبة جدا – لمن تكون لابس ليك (سفنجة) وقاعد تعلق على اي حدث في العالم.

· ما بتخلي شيء.

· وانت لابس ليك (سفنجة) وعندك رأي في اي شيء.

· اي حاجة عاوز (تنظر) فيها.

· ما في حاجة في الدنيا بتعجبك.

· الزول دا بي (سفنجتو) دي بعد ان اضاع البرازيلي (جوليام) ضربة جزاء في مباراة الهلال والاهلي شندي امس الاول – انت تعرف (الصيام) ظهر في (جوليام).

· في برازيلي بضيّع ليه ضربة جزاء.

· يكون برازيلي ما عندو (رقم وطني).

· يكون ما طلع (الجنسية).

· يا الكاردينال الزول دا جايبو لينا من وين؟.

· كان على اضاعة ضربات الجزاء …(بكري المدينة) ممكن يضيعها.

· اصلو ما في داعي لي برازيلي.

· ومحترف كمان.

· الزول دا محترف في (مطعم).

· اوعك.

· نحن ما عندنا برازيلي بضيّع ليه ضربة جزاء.

· خليت شنو لي بكري المدينة.

· وقت (جوليام) بضيّع – بكري المدينة يعمل شنو؟…عاوز اعرف بس.

· اشرحوا لي الحتة دي.

· لا جبت لينا برازيلي زي الناس يا الكاردينال ..لا حسمت لينا موضوع بكري المدينة.

· وقت ما عاوز تجيب لينا محترف صاقعة ..احسم لينا موضوع بكري المدينة دا يا الكاردينال.

· بكري المدينة ما يقعد ينطط لينا كدا.

· البلد ما فيها قانون.

· قول البلد ما فيها قانون.

· قول ناس اسامة عطا المنان ديل شغالين بي قانون (المصلحة الخاصة)..لوزان ما فيها قانون.

· الزول بي (سفنجتو) طلع ما ساهل.

· لسانو فصيح.

· حاولت اقنعو.

· قعدت معاهو في الواطة دي …قلت ليه يا ود الناس (جوليام) دا ما عندو علاقة بالصيام.

· الزول دا ما مسلم.

· يعني ما صايم…وروني الصيام ظهر فيه كيف؟.

· صاحبكم قال لي ..يا زول الصيام السنة دي صعب.

· الصيام السنة دي سخّن عديل كدا.

· والـلـه نحن من تاني يوم في رمضان قعدنا نفتش في (هلال العيد).

· في واحد جانا جاري ساعة الفطور ..تقول فاكنو بالتقسيط المريّح.

· قلنا ليه الحاصل شنو؟.

· قال لينا شفت هلال العيد.

· قلنا ليه شفتو وين؟.

· قال لينا شفتوا في (المجموعات).

· قلنا ليه الفي المجموعات دا هلال السودان – ما هلال شوال ، ما تلخبط لينا ساكت.

· كمان عاوزين تعيدوا من تاني في رمضان.

· الزول قال لي : والـلـه اول يوم في رمضان دي بي تلاتين يوم ..عشان كدا من تاني يوم قعدنا نفتش عن هلال العيد.

· وعندنا ناس في الحلة خبزوا عديل كدا للعيد.

· وفي ناس علقوا السائر.

· وفرشوا الملايات.

· رمضان صعب.

· قلت ليه يا زول صعب او ما صعب ..(جوليام) ما عندو علاقة بالموضوع دا..ما تقعدوا تفتشوا ليكم في (تبريرات) ساكت يا ناس الهلال.

· اصلو انتوا يا ناس الهلال الحاجات العاوزين تصلحوها ما بتغلبكم.

· ما بتتحيروا.

· ما بتتلفتوا.

· حاجاتكم بتصلحوها.

· قلت ليه يا زول والـلـه انت (السفنجة) اللابسها دي ما خاطية عليك.

· ليها حق تتقطع.

· ورينا علاقة الكلام البتقول فيه دي بي (اهدار) جوليام لي ضربة جزاء شنو؟.

· اشرح لي المسألة.

· اثبت لينا.

· زولكم طلع عندو (منطق).

· انا ساكت كنت بستصغرو.

· صاحبكم ابو سفنجة قال لي …الصيام اثر في (كاريكا) وإلّا ما اثر؟.

· قلت ليه اثر طبعا.

· قال لي الصيام دا اثر في (بشه) وإلّا ما اثر؟.

· قلت ليه اثر.

· قال لي طبيب ..(جوليام) دا البصنع ليه اللعب منو؟.

· قلت ليه كاريكا وبشه.

· قال لي وقت بشه وكاريكا بصنعوا لي جوليام ..كدا (الصيام) بكون اثر في جوليام وإلّا ما اثر.

· قلت ليه اثر طبعا.

· قال لي طيب من الصباح مالك؟.

· ما دا الكلام البقول ليك فيه من بداية العمود.

· رجعت اتذكرت.

· وقلت امنطق ليكم الزول (ابوسفنجة) مقطوعة دي.

· فكرت كدا وقلت ليه يا فالح علاقة اضاعة ضربة الجزاء بالصيام شنو؟.

· الكلام البتقول فيه ممكن نقبلو من حارس مرمى الاهلي شندي (يس يوسف)…عاوزنا بعد العمر دا كلو نقبلو من جوليام.

· ونحن في الاساس – من البداية جايبنو (برازيلي) ليه؟…وقت بضيّع لينا في ضربات الجزاء.

· صاحبكم (ابو سفنجة) ما عرف يمشي وين؟…عاين لي سمح ..وقال لي انت (مريخابي) …وحاقد كمان.

· قلت ليه اصلا ما في مريخابي عادي.

· كلهم حاقدين.

· زولكم فقد المنطق..شال سفنجتو وطلع من الاستاد.

· عصر على البوابة الشمالية واتخارج.

· ضيعتوا لينا (نقطتين).

· ومن منو؟.

· من الاهلي شندي.

· ناس الاهلي شندي ديل بقوموا يصدقوا.

· صلاح ادريس بصدق.

· فتشوا القصور وين؟.

· شوفوا السبب شنو؟.

· حاسبوا المقصر.

· ما في اصلو سبب يخليكم تتعادلوا مع الاهلي شندي.

· يعني الاهلي شندي دا بطل شغلتو ..وقاصد الهلال.

· مفروض عشان الحركة دي تغلبوه سبعة.

· …………

ملحوظة : بقينا نفكر في العيد.

هوامش

· اندرزينهو وين؟.

· ما قلتوا ما مصاب.

· والاصابة اتعالجت.

· قاعد في الكنبة يعمل شنو؟.

· بصور (مستندات).

· مباراة مازمبي حقت اللاعبين.

· يتفاهموا فيها بي طريقتكم.

· يعملوا ليهم نتيجة كويسة براهم.

· على مسؤوليتهم.

· ما اظن في شيء بعوض جماهير الهلال غير الانتصار على مازمبي.

· التعادل دا ما في شيء بمسحو غير الانتصار على مازمبي.

· ناس الاهلي شندي امام الهلال برضو كانوا صايمين.

· يعني ما تعملوا لينا الصيام سبب.

· لو عملتوا لينا الصيام سبب امام الاهلي شندي في استادكم امام مازمبي تقولوا لينا شنو؟.

· اذا كان في قصور في تسجيلات مايو ..المسؤول الاول الكاردينال.

· المرة دي لا لجنة فنية …ولا في محمد حسين كسلا.

· الاهلي المصري تعاقد مع انطوي مهاجم الشباب السعودي بقيمة فاقت المليون دولار.

· والاهلي بيلعب في الكونفدرالية.

· وقطع الزمالك خطوات بعيدة في التعاقد مع مهاجم الوداد المغربي ايفونا…بقيمة مادية اوشكت من 2 مليون دولار.

· دي التسجيلات.

· وديل اللاعبين البعملوا فروقات.

· ….

· عاجل : احسن تشتروا حلاوة العيد من بدري.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *