زواج سوداناس

المشكلة كوادر ما كوابل



شارك الموضوع :

> الاحباط الذي تسببه قناة النيلين لجماهير الرياضه
> احباط فاق الاحباط الناجم عن اهمال المنتخب من قبل الدوله
> قناة ابجديات العمل الفني عندها معدومه
> والمشكله ليست مشكلة معدات وكوابل
> المشكله مشكلة كوادر
> لأن شغل الوظائف عندنا اضحى بالخيار والفقوس
> لذا تكثر الاخفاقات في التعيينات
> ويخسر العمل
> ولكن لا احد يهمه العمل بقدر ما يهمه الانتماء للبدور العمل
> شاشه غشاشه
> وصوت مبحوح ومتقطع
> بل يجيك مرات بي حشرجه
> ومرات مبحوح
> وقمة الاستفزاز
> الترويج
> قناة متخصصه ومتفرده
> ايها الناس
> اخفاقات قناة النيلين كترت شديد
> واذا مافي زول بسأل
> حقو نعرف انو الله بسأل
> الله بسأل الزول المفروض يسأل
> وبسأل من قبض الأجر عن جودة العمل
> وبسأل من حق الناس الانكوت باخفاقات قناة النيلتين
> ايها الناس
> الاستاذ زهير عبادي
> كان شجاعاً جداً في حديثه عن القناة
> ومن داخل استوديو القناه
> لم يجامل ولم يتجمل
> فزهير اعلامي كبير ومهول
> لا يعرف المداهنه ولا غطغطة الكرور
> احييك اخي زهير
> ولكن لك ان تعلم
> من يقول الحق في هذا الوطن
> يدفع الثمن غالياً
> ولكن يبقى له الموقف
> يحفظه التاريخ والاجيال
> شد حيلك يا ابو الزوز
> بلا نيلين بلا نيله
> ايها الناس
> حقو الاتحاد يشترط على التلفزيون القومي عند التعاقد
> يقول ليهو لو داير تنقل الممتاز بالنيلين
> اختانا يا اخوي
> بننقلوا بالكارو وبصل الناس اخير من نيلتكم دي
> المهم
> البلد كلها سخانه
> مع الصيام وقطعة الكهربا الناس انشوت
> الا في كوستي
> كوستي ضربها الهمبريب
> فتح شبابيك الحبيب
> وحال اهل كوستي الطيب يطيب
> سهرة رائعه قدمها اولاد غارزيتو بكوستي
> وانا لو محل ناس المريخ
> كلو خمس دقائق بلعبها في حي بكوستي
> زي السينما المتجوله
> عشان الناس كلها تشوف العجب
> تستمتع بالروائع
> وبزيد فترة العرض تلاته يوم تاني
> عشان ناس الحلال والقرى يتفرجوا
> برضك ناس الحلال ديل ناس
> وبحسوا وبشعروا
> ومن حقهم ان يستمتعوا
> ايها الناس
> نناشد الاتحاد بدل يضيع زمنو في كورة الامل تتعاد ولا ما تتعاد
> حقو يجتمعوا وينظروا في زيادة عروض المريخ بالولايات
> المريخ لما يمشي ولايه
> يكون العرض تلاته يوم
> يلعب مع فريق الولايه تلاته أيام على التوالي
> عشان كلو يوم يستمتع فيهو جمهور غير
> والمريخ يستطيع ان يعيد العرض تلاته يوم بدقه متناهيه
> فالمخرج غرزا قادر على ذلك
> وحقو مباريات المريخ في الولايات
> نعملها كورسات
> البحضرها يشيل شهادة معتمده وموثقه
> المريخ كبير ما زناطير ساي
> واقترح على مجلس المريخ
> ان يطلب من الاتحاد ان يبرمج لنا مباريات الولايات
> كلو كورتين في نفس الوكت في ولايتين مختلفتين
> يعني نلعب في كسلا وفي نفس الوكت في الفاشر
> يومنا الولائي بسته نقاط وتمنيه أهداف
> انه رمضان
> حيث يربط الشيطان
> يظهر كلو شيء علي حقيقتو ويبان
> المهم
> مستوى الهلال الشفناهو ضد النسور
> وضد اشبال اشبال النجم بتونس
> وضد الأمل وضد اهلي شندي
> لا يؤهله لمنازلة مازيمبي نهار رمضان
> كان صامو ووووب
> وكان فطروا يكونوا ضيعوا النتيجه والصيام
> ايها الاهله الشرفاء
> الهلال كبير
> لكن كمان ما بنرضي ليهو يتغلب كتير
> لذا ولذلك وكذلك
> نرى ان ينسحب الاخوه الاهله من التنافس هذا العام
> والانسحاب ما مشكله
> قبل كده انسحبوا من وفاق سطيف
> الحصل شنو يعني
> ونرى ان الانسحاب فيه حفظ لكرامة الهلال
> وانقاذ له من التهلكه
> فالمواسير التي خلط صديقي عماد بينها وبين مواسير المغلق
> لن تستطيع ان تقف امام مازيمبي ربع ساعه
> لن تستطيع ولو احضر كبسور الفيفا وادخلها الملعب
> الموضوع كبير
> ستذهب المواسير
> وتبقي الهزيمه الثقيله في جبين الهلال
> وجبين الهلال ما ناقص
> كفايه ما قاله الراحل البابا
> عن ان تغيير اتنين لي اطناشر وصمة عار في جبين الهلال
> الجبين نديان بالعمايل
> مافي حته لعمليه جديده
> انسحب يا كبسور واشتكي
> قول ناس مازيمبي ما صايمين
> والهلال ما بلعب مع زول فاطر
> قولوا اي شيء
> برغم ان ماكسيم وسيسيه وأتير وكيبي وجوز مواسير البرازيل ونيلسون والكاردينال
> الكاردينال ما معاهم ده لقب ساي
> كردنه بصوم
> برغم انو ديل كلهم جالدين
> لكن فطور ناس مازيمبي ما فطور نصاح
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> الكهربا اساساً ما بتجينا
> الكلام ده عارفنو دستوريينا؟
> ولا ما جايبين خبر قاعدين في كندشة مكاتب محرمه علينا
> ومافي زول مصدق انو في ناس شغلتهم يجيبوها لينا
> كان غلبكم توفروها لينا يا والينا
> زحوا لينا
> برانا بنقتسم سلطتنا وثروتنا ونجيب كهربتنا لينا
> وبنعمل في المدارس مجانية التعليم والزامية الترميم ونظافة الشوارع والزينه
> وبندعم السلع الضروريه ما ضروريه ونساوي بين الناس امام الوظيفه العامه يا والينا
> ونقعد نغني باعلى اصوات فينا
> تاااااااااتي السودان مشى
> تااااااااتي مجاني مدرسه
> تااااااتي عز وحنكشه
> تااااااتي كهربا وكندشه
> تااااااتي مانا ملطشه
> تااااتي مافي غشغشه
> بنقدر يا والينا
> دي سلطة وثروة موش لعب يا اخينا
سلك كهربا
ننساك كيف وتااااتي بقينا ملطشه
والى لقاء
سلك

شارك الموضوع :

تعليقات الفيسبوك

تعليقات


3 التعليقات

      1. 1
        ابو لواء

        اللهم اني صائم

        الرد
      2. 2
        omar

        والله ياحمبرة نفسي اعرف الغشاك وقال ليك انت صحفي وكمان عامل فيها دمك خفيف.

        الرد
      3. 3
        ود عز القبيلة

        > تاااااااااتي السودان مشى
        > تااااااااتي مجاني مدرسه
        > تااااااتي عز وحنكشه
        > تااااااتي كهربا وكندشه
        > تااااااتي مانا ملطشه
        > تااااتي مافي غشغشه

        خليك مع الوطن وسيب الكورة احلي واجمل

        > تاااااااتي اهدى وروق
        > تاااااااتي الصحافة تفوق
        > تااااااااتي الكتابة بزوق
        > تااااااااتي سودانا فوق

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *