زواج سوداناس

(المباراة) في قناة النيلين زي (شليل وين راح)



شارك الموضوع :

ناس قناة النيلين جابوا لينا مباراة في (كورة) القدم تقول المباراة دي سنة 1897م

يا ناس قناة النيلين ..عدم صرف مرتباتكم ما تعكسوه لينا في (التصوير)

الكارثة الكبرى أن نقل المباريات أصبحت تحدده الضغوط السياسية …وهذا شيء يجعلنا نطالب قيادات الاتحاد بالرحيل

طلعتونا من القنوات الكبيرة في رمضان دا – عشان نقعد نتابع لينا مباراة في قناة النيلين زي (الكلمات المتقاطعة)

· مرة قاعدين ..فاتحين (الشبابيك) الكهربة كانت قاطعة.

· قاعدين نحضر في مباراة في قناة النيلين.

· طبعاً ح تقولوا لي بتحضر فيها كيف في قناة النيلين؟ ..أنت براك ما قلت الكهربة كانت قاطعة.

· ح أقول ليكم : أول قناة النيلين دي عاوزة ليها (كهربة).

· بي (حجر بطارية) واحد ممكن القناة تشتغل.

· قناة النيلين دي ..(شمعة) كتيرة عليها.

· ناس قناة النيلين جابوا لينا مباراة في (كورة) القدم تقول المباراة دي سنة 1897م.

· المباراة تقول معركة (كرري).

· الضرب الحاصل دا – ما عارفنو في المباراة ولّا من القناة؟.

· الكعة الحاصلة دي وين؟.

· ناس جارية ساكت.

· الكورة في حتة.

· والكاميرا في حتة.

· الحكم ذاتو تقول من رجال قوات الإمام المهدي.

· الحكم حسب النقل التلفزيوني للقناة كان لابس ليه (جبة مرقعة).

· أنا ما عارف (الجبة) دي من الحكم – ولّا من القناة؟.

· بقينا نشك.

· ما بقدر أحدد ليكم…حكامنا ديل – في قنوات أخرى مرات بشعر بأنهم بحكموا بي لائحة من لوائح الدولة المهدية.

· مخالفة تكون في (المحمية) شمال شندي وجنوب عطبرة يحسبوها ليك (ضربة جزاء).

· عادي في مباريات المريخ.

· الجمهور يجدع ليه رجل بوليس.

· الحكم يقوم يطلّع رجال الشرطة كلهم من الملعب.

· غلطانة الشرطة.

· طبيعي في مباريات المريخ.

· في حاجات غريبة بتحصل.

· الكلام دا من القناة ولّا من الاتحاد ما عارف؟.

· غايتو ناس قناة النيلين ديل ..المباراة عندهم تقول ناقلنها بي (حبل).

· تقول ناقلنها في (عمود) من طاسة واحدة.

· عمود شنو؟.

· تقول ناقلنها في (كورية).

· اللاعبين بنشوفهم في الملعب زي رسومات أولاد الروضة.

· أو زي رسومات ناس نزيه وفارس.

· مباراة كاريكاتيرية.

· غشونا ساكت – قالوا لينا لفوا الطبق.

· نحن نحول الطبق للمغصة دي.

· طلعتونا من القنوات الكبيرة في رمضان دا – عشان نقعد نتابع لينا مباراة في قناة النيلين زي الكلمات المتقاطعة.

· مبارياتكم دي الحمدلله بتجيبوها بعد الفطور.

· مبارياتكم دي تفطر.

· تعطش.

· المباراة تكون بين الهلال والأهلي شندي ..لمن تنتهي ما بتعرف طرفي المباراة.

· الهلال والأهلي شندي يجيبوا ليك مباراتهم تحلف تقول بين العباسية والأحرار.

· ما في أي علاقة بين الهلال والأهلي والنقل الذي تقدمه قناة النيلين.

· الماعارف المشكلة وين؟.

· في الهلال ولّا في القناة؟.

· المباراة تكون في إستاد الهلال …الإستاد يبقى ليك زي إستاد (النقعة) في الفاشر.

· المشكلة وين؟.

· في القناة ولّا في الإستاد؟.

· النتيجة تكون 3 / 0.

· يجيبوها ليك 0 / 0.

· ما بتعرف التلاتة راحت وين؟.

· الخلل من القناة ولّا من الحكم؟.

· سيف الدين مساوي في قناة النيلين تشوفو (بله جابر).

· ومدثر كاريكا ..تقول محمد موسى.

· البرزايلي جوليام ذاتو جابوا لينا (بكري المدينة).

· انتوا قايلين إضاعة ضربة الجزاء دي من جوليام.

· أبداً.

· الإضاعة دي من قناة النيلين.

· ما في برازيلي بضيّع ليه ضربة جزاء.

· الجماعة ديل تصويرهم كعب.

· الكورة تكون دخلت في المرمى ..يجيبوها ليك في الكشافات.

· المشكلة في المهاجم ولّا في القناة.

· بقينا ما فاهمين أي حاجة.

· الشغيل يكون عمل ليهو مخالفة في (السنتر) ..يجيبوا ليك (الوالي) قاعد في المقصورة بشرب في الموية.

· والمخالفة ما في.

· أصلوا ما بتفهم حاجة..

· عليكم اللـه يا ناس قناة النيلين ..عدم صرف مرتباتكم ما تعكسوه لينا في (التصوير).

· تصوريكم دا أحسن منو تصوير مستندات.

· لو جبتوا ليكم ماكينة تصوير ..كان أحسن من الكاميرات البتنقلوا لينا بيها الكورة.

· الكورة عندكم يا ناس قناة النيلين زي (شليل وين راح).

· رجعتوا ناس بشه تاني لي شليل وين راح؟.

· طيب قول بشه بعرف (شليل)…جوليام دا ذنبو شنو؟.

· جايبنو من البرازيل عشان تلعبوه (شليل).

· تصوريكم بشغلب أي حاجة.

· مرة قاعدين نحضر في المباراة ….قلنا بكره صيام ..نقزقز شوية بي سندوتشات شاورما فراخ.

· جبنا السندوتشات من الكافتريا السوري.

· السوريين ديل عندهم (شاورما) خطيرة.

· دخلنا ليك في الشاورما – بدون ما نشعر لقينا ليك نفسنا بناكل في (بامية مفروكة).

· قلنا دي شنو اللخبطة دي؟.

· في واحد فينا مفتح ..قال انتوا حولتوا (الطبق) شديد.

· قلنا ليه – قول حولناهو شديييييد يجيب لينا (بامية مفروكة).

· نحن الشاورما دي لو ما جبناها من بره ..كان شكينا في ناس البيت.

· واحد تاني قال لينا ..ناس قناة النيلين ديل بي (طبقهم) دا – ممكن يعملوا أي شيء.

· إذا كانت كورتهم بالشكل دا ..طبيعي الشاورما حقتهم تبقى (بامية مفروكة).

· أكلناها نعمل شنو؟.

· واحد عاوز يتظارف ..قال واللـه السوريين ديل عندهم بامية مفروكة خطيرة شديد.

· قلنا ليه كمان السوريين شن خبرهم بالبامية المفروكة ..لو ما شلاقة ناس قناة النيلين ديل.

· أقول ليكم حاجة.

· أطبق ليكم نظرية تاني – عشان ما تطلعوني غلطان.

· عشان براكم تحكمو.

· مرة كدا – برضو قاعدين نحضر لينا في مباراة في قناة النيلين ..قام جات (كديسة) فايتة.

· التلفزيون كان قدامو في (حلة لبن)….مجهزنها للسحور.

· حلة لبن بارد …مفور ومسكر.

· الكديسة جاءت فتحت الحلة وبدأت تشرب في اللبن.

· في واحد عاوز ينهر الكديسة …واحد فينا ثبتوا ..قال ليه خليها ..الكديسة دي في التلفزيون.

· رجع خلاها.

· بعد شوية زولكم الكان عاوز ينهر الكديسة ..قال ليه لكن الكديسة الفي التلفزيون بتشرب اللبن البرة دا.

· صاحبكم قال ليه واللـه كدايس قناة النيلين دي ممكن تعمل أي شيء.

· لو بقت على اللبن هينة.

· كدايس قناة النيلين دي (سجائر) ممكن تشربها.

· طول ما دي كورتكم ..أصلو ما غريبة على كدايسكم.

· المباراة يا انقولها زي الناس ..يا خلوها.

· تخلونا نحول (الطبق)..وتجيبوا لينا (المغصة).

· أمس قرأت في موقع (كفر ووتر) هذا الخبر …الذي يكشف فساد الاتحاد العام وكيفية تعامله مع الأمور.

· محمد سيد أحمد في إذاعة الخرطوم كشف أي حاجة ..وقال الحقيقة مجردة.

· اقرأوا الخبر حسب ما جاء في الموقع.

· (شن الأستاذ محمد سيد أحمد مساعد رئيس الاتحاد السوداني لكرة القدم هجوماً شرساً عبر برنامج “ملاعب الخرطوم” بإذاعة الخرطوم والذي يعده ويقدمه الزميل الأستاذ عبده محمد الحسن، على الاتحاد العام وقادة هذا الاتحاد وقال: إن الاتحاد هو الفاشل، بل هو الفشل بعينه وليس قناة النيلين الرياضية وتلفزيون السودان ومن الأول حينما اجتمعنا كمجلس إدارة للاتحاد العام في بداية الموسم وناقشنا موضوع التلفزة وهذا الملف الكبير والقنوات التي تقدمت للفوز بحق النقل الحصري للدوري الممتاز كان من ضمن العروض عرض جيد لقناة (قوون) وعرض وهمي ومضلل لبي ان اسبورت وكان من المفترض أن نعطي حق النقل الحصري لقناة قووون الرياضيه وليس لتلفزيون السودان ولكن الأغلبية في مجلس إدارة الاتحاد العام ارتضت هذا الهوان وهذا الذل وبضغوطات سياسية اعطوا حق النقل الحصري لتلفزيون السودان وقناة النيلين وضاعت 5 مليار جنيه ويجب أن يكون هناك تحقيق ومحاسبة فورية للمقصرين في هذا الملف حتى يعطي كل ذي حق حقه والشركة الراعية تضررت كثيراً من هذا الملف والاتحاد هو السبب وفسخ العقد مع تلفزيون السودان قادم لا محاله).

· أخطر ما في كلام محمد سيد أحمد قوله إن عرض قنوات بي ان سبورت عرض (وهمي).

· هذا فساد يجب أن يحاسب عليه الاتحاد العام.

· الكارثة الثانية أن نقل المباريات تحدده الضغوط السياسية …وهذا شيء يجعلنا نطالب قيادات الاتحاد بالرحيل.

· ليس غريباً من الاتحاد هذا ..فهو أصبح جزءاً من العملية السياسية في البلد.

· اتحاد قياداته كلها في البرلمان بما في ذلك المدير الفني للمنتخب – منتظرين منو شنو؟.

· إذا كان هناك أعضاء في هذا الاتحاد ..يجب أن يحاسبوا القيادات ..وأن ينصفوا الأندية التى ضاعت حقوقها.

· وقبل ذلك أن ينصف المواطن السوداني الذي من حقه أن يتابع المنافسة الأولى في بلاده.

· وكمان يقولوا ليك حولوا الطبق.

· ………..

· ملحوظة : نحن عرفنا الناس في السودان مرض السكري بجيهم من وين؟.

هوامش

· ناس المريخ فرحانين على الانتصار على الرابطة كوستي.

· مباراة حاكمها الفاضل أبو شنب ..وبديرها برهان ما عاوزين تنتصروا فيها.

· عادي الانتصار.

· لو انتصرتوا عشرة على الرابطة عادي.

· ما في حاجة غريبة.

· الكوكي قال: مباراة الهلال أمام الأهلي أفضل مبارياته.

· اللـه يستر.

· إذا كان أفضل مباريات الهلال مع الكوكي مباراة انتهت بالتعادل.

· غايتو لو ما الصيام ..كلامك دا ما بنخليه يفوت ساكت.

· لكن الدنيا رمضان.

· وما عاوزين نقول شيء.

· ومباراة مازيمبي ننتظر انتصار الهلال.

· ما بنقبل غير الانتصار.

· لا بنعرف مازيمبي ..ولا بنعرف برشلونة.

· تجونا منتصرين.

· من هسع ما تقولوا لينا الصيام أثر على أداء اللاعبين.

· ………

· عاجل : يا مزمل لو عندكم (رديف) ما بتفرحوا لعواجزكم ديل.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *