زواج سوداناس

المباراة في النيلين زي الزول القاعد بكشف للنظر



شارك الموضوع :

زي الزول الما جاك في بكا ابوك ..يقوم يلاقيك صدفة في مناسبة ..يقول ليك ما شايفك في عرس اخوي

كمان عاوزين تعملوا ليكم (نيلين) تانية انتوا (ترعة) كتيرة عليكم في السخانة دي

والعندو صدمة عصبية ..بقول ليك ناس النيلين قالوا ناقلين مباراة الهلال والاهلي شندي جابوا لينا (جو هندي)

واللـه ترددكم البتعلنوا عنه في التلفزيون القومي لقناة النيلين التانية دا لو جبتوا لينا معاهو (طرد رمضان) ما بننزلوا

· استوقفني في تلفزيون السودان القومي (زمان) هسع بقى لا قومي ولا حاجة.. تلفزيون السودان هسع بقى زي الزول البياكل ليه في (نبق) وقدامو تفاح واناناس وبرتقال ومشمش.

· او زي الزول البكد ليه في (دومة) وقدامو (عنب).

· تلفزيون السودان هسع بقى زي (عنبر العظام).

· حليل زمن حمدي بدرالدين ومتوكل كمال وليلي المغربي.

· استوقفني اعلان في الشريط (البجري تحت) عن بشرى للمشاهد السوداني عن انطلاق بث قناة النيلين2.

· ابوس ايدكم..ما تعملوا فينا كدا.

· نحن الدنيا دي عملنا فيها شنو؟..عشان تعملوا لينا قناة تانية للنيلين.

· نيلين تاني.

· لا لا لا دي كتيرة علينا شديد.

· نحن لا بنستحمل حاجات زي دي ولا حاجة.

· الاعلان في تلفزيون السودان فيه القمر وتردد قناة النيلين الجديدة.

· تخيلوا الحتة دي.

· زول يكون عاوز منك قروش …تلاقيه بعد (45) يوم ..عشان يدينك تاني.

· ممكن الزول عاوز منك قروش ..يدينك.

· ناس النيلين عاوزين يعملوها.

· او زي الزول الما جاك في بكا ابوك ..يقوم يلاقيك صدفة في مناسبة ..يقول ليك ما شايفك في عرس اخوي.

· عرس اخوك في عينك.

· النيلين …عاوزين يعملوها.

· عاوزين يعملوا ليهم قناة تانية.

· فالحين شديد واللـه.

· انتوا القناة الاساسية عملتوا فيها شنو؟..عشان تعملوا ليكم قناة تانية بنفس الاسم والتخصص.

· اكيد لقوا قناة النيلين الاولى ما كلفت معاهم في شيء.

· ما خسرانة.

· يعني وقت قناة النيلين الاولى تفشل في نقل المباراة …تقوم القناة التانية للنيلين برضو تفشل.

· الفشل ما عاوز ليه مجهود.

· ما عاوز ليه تعب.

· ممكن بي كل بساطة تعتذروا في قناة النيلين الاولى عن نقل المباراة ..تقوموا تعملوا نفس الشيء في القناة التانية للنيلين.

· تعتذروا بنفس الطريقة.

· يعني ح يكلفكم شنو (الاعتذار)؟.

· ونحن ذاتو في الجرايد ..نقوم نهاجم قناة النيلين الاولى …وفي نفس الوقت نهاجم قناة النيلين التانية.

· الموضوع ما بكلفنا شيء.

· عليكم اللـه نجاحات النيلين شنو عشان تعملوا ليكم قناة تانية للنيلين؟.

· نحن ناقصين.

· واللـه ترددكم البتعلنوا عنه في تلفزيون القومي لقناة النيلين التانية دا لو جبتوا لينا معاهو (طرد رمضان) ما بننزلوا.

· لو جبتوا لينا معاه (خروف) ما بنشتغل بيه.

· لو معاهو في رمضان دا (شوال سكر) ولوح تلج …وقفة ليمون ..ما بننزلوا في جهازنا.

· ولا بنلف ليه (الطبق).

· ولا بنكضب.

· ولا بنجامل فيها تاني (لفة) الطبق دا.

· كباية ما بنلفها ليه.

· تاني نحن بندقس.

· تاني نحن بنتمقلب.

· كفاية المقلب الاتمقلبناهو في (اللفة) الفاتت.

· لفينا الطبق ..ما شفنا حاجة غير (عجاجة وكتاحة).

· الموضوع دا ما عاوز ليه لفة طبق.

· خليتونا ساكت نلف الطبق.

· غلطنا غلطة عمرنا.

· حلتنا نصها راقد في (العناية المركزة) بسبب قناة النيلين.

· العندو فشل كلوي ..يقول ليك من لفة الطبق.

· والعندو مصران بقول ليك ..الطبق.

· والعندو فقر دم ..يقول ليك ..النيلين.

· العملتها فينا (النيلين) حملة الدفتردار الانتقامية ما عملتوا فينا.

· والعندو صدمة عصبية ..بقول ليك ناس النيلين قالوا ناقلين مباراة الهلال والاهلي شندي جابوا لينا (جو هندي).

· كمان الشغيل الدخلوا مع ناس فيصل احمد سعد شنو؟.

· نيلين واحدة جابت لينا (ضغط) وخربت لينا علاقتنا في الحلة كلها..اي واحد في الحلة طالع في رأس البيت بقلب في (الطبق).

· يعني ناس (النيلين) ما كفاهم البعملوا فيه دا ..قاموا قالوا يعملوا قناة تانية.

· يا ربي ح ينلف الطبق على وين تاني؟.

· ح نلفو كم مرة.

· عاوز قناة النيلين الاولى تلف الطبق شرق بمقدار 20 درجة.

· عاوز قناة النيلين التانية تلف الطبق غرب بمقدار 27 درجة.

· ح نبطل شغلنا.

· ونخلي بي ان سبورت.

· ونخلي ام بي سي.

· ونخلي الحياة ودريم…ونقعد (نلفلف) في الطبق.

· مرة عندنا زول صعب شوية.

· واللـه ما شوية..صعب عديل كدا.

· صاحبكم طلع التلفزيون من بدري في الحوش ..(الواطة سخنة)..وقال يتابع مباراة الهلال والاهلي شندي.

· جاب الموية الباردة ..وقال للبنت اعملي الشاي.

· عندو (كيس) تسالي داسيه في الدولاب من المباراة الفاتت طلعو من الدولاب وقال يقعد يتابع المباراة.

· ناس النيلين المباراة يجيبوه ليك زي الزول العاوز يكشف على نظرو.

· موش لمن يكون عندك مشكلة في النظر الدكتور بيضع قدامك لوحة فيها علامات ..دوائر صغيرة وكبيرة ومثلثات وبقوم الدكتور يسألك منها.

· وانت تجتهد ليه.

· هسع ناس النيلين في مباراة الهلال والاهلي شندي عملوا لينا نفس العملية.

· جابوا لينا الشاشة ووضعوا لينا فيها علامات.

· الكورة شيء تشوفها ..وشيء ما تشوفها.

· اللاعب تشوفو زي (الشولة).

· وتجتهد عشان تعرف الكورة من الما كورة.

· واللاعب من الحكم.

· والشغيل من عماري.

· ما بتفهم اي حاجة في الكورة.

· زولكم قاعد يتابع في المباراة بالصورة دي..في واحد قال ليه اسمع يا حاج ..انت الظاهر الطبق ما لفيتو كويس ..عشان الصورة توضح ليك.

· عمك قال ليه ..طبق شنو العاوز ليه (لفة)؟…واللـه ناس النيلين ديل إلّا تلف ليهم حاجة تانية عشان تقدر تتباع ليهم مباراة.

· زولكم لقط الكلام قال ليه انت قاصد شنو؟..تلف شنو يعني؟.

· قال ليه يعني ح تلف ليهم (باسطة)….مالك انت عاوز تطلعنا من النص في رمضان.

· لكن في السخانة دي ..وبعد الفشل الكبير الذي حققته القناة النيلين في نقل المباراة اصلو ما في داعي ينزلوا اعلان لقناة تانية للنيلين.

· كان يخلوا الاعلان دا بعد توقف النشاط الرياضي..عشان ما في زول يعمل مقارنات.

· عشان ما في زول يقول حاجة.

· او كانوا يخلوا موضوع القناة التانية للنيلين ..قناة سرية ..اصلو ما كان في داعي ينزلوا ليهم تردد في السخانة دي.

· عشان شنو؟.

· التردد نعمل بيه شنو؟.

· يمين تاني (التردد) دا لو كتبوا لينا دكتور باطنية ..ما بنزلو.

· لو صرفوا لينا في (روشتة) ما بنعاين ليه.

· حاجة غريبة بعملوا فيها السودانيين ..قوة عين زي دي اصلو ما شفتها.

· الناس كلها قايمة في قناة النيلين الاولى …قاموا عملوا ليهم قناة تانية للنيلين.

· شفتوا السودانيين ديل.

· في السودان …الحاجة الناجحة ..ما بتمشي لي قدام ..بقفلوها ..وبحفروا ليها.

· والحاجة الفاشلة في السودان بعملوا ليها فروع …وبطلعوا منها اجزاء تانية.

· في داعي لقناة تانية للنيلين في ظل فشل الاولى.

· عاوزين تجيبوا فيها شنو؟.

· إلّا توزعوا فيها (لحمة).

· كورة تاني في النيلين ما نبقبل عليها.

· ولا بنكضب.

· قناة النيلين تعرض الدوري الممتاز بصورة منفرة.

· يعني دورينا دا لو بلعب فيه (ميسي)…ح يجبوه لينا (بلة جابر).

· الكورة العندو ح تطير.

· بي صراحة الشركة الراعية للممتاز مفروض تنسحب ..ما معقول تعرض وتسوق لنفسها من خلال قناة تضعف المعلن عنه.

· امس جاء في موقع سودانا فوق (اعلنت شركة سوداني للاتصالات بشكل شبه رسمي امس الثلاثاء عن نيتها فسخ عقد رعايتها للدوري الممتاز مع اتحاد الكرة وعلمت (سودانا فوق) ان الدكتور هاشم البدري مدير الاتصال المؤسسي بسوداني يرتب مع مجموعة من ادارته لصياغة مذكرة قانونية لاتحاد الكرة تفسخ العقد من جهة واحدة اعتمادا علي نص الفقرة ٢٠ من العقد الذي يتيح للشركة الراعية ذلك تجيء هذه الخطوة في أعقاب تعثر البث التلفزيوني وفشل قناة النيلين في نقل اهم مباريات بداية الدورة الثانية).

· بي صراحة من حق (سوداني) ان ترفع يدها من الدوري الممتاز..خلوا معتصم جعفر يشوف ليه صرفة لي دوريه دا.

· التجاوزات التى تحدث في الممتاز مع هذا النقل يفرض على شركة سوداني ان تلغى عقدها مع الاتحاد العام.

· الشركة تسييء لنفسها بهذه الرعاية من خلال تلفزة منفرة ..ودوري (ماسخ).

· ….

· ملحوظة : انسحبوا.

هوامش

· ناس النيلين ديل (ترعة) كتيرة عليهم.

· مفروض تسموها قناة الترعة.

· او قناة الخور.

· نيلين شنو كمان.

· مدير قناة النيلين جابر علي قال في اذاعة هوى السودان عن إيقاف المذيع زهير عبادي ان السبب يرجع ﻻنه لم يحترم زملاءه ففي الوقت الذي يعمل زملاؤه من اجل إيصال الصورة والصوت للمشاهد كان هو يهاجم فيهم بدون اي معنى..وهو جزء ﻻ يتجزأ من قناة النيلين كان يجب ان يحترم زملاءه ويقف بجانبهم ونرفض هجومه عليهم.

· يعني يحترم الزملاء وما يحترم المشاهد.

· لو يعلم مدير قناة النيلين ..ان احترام المشاهد اولى ..طالما القناة ملتزمة بالنقل وفشلت في ذلك.

· يحترم الزملاء في شنو؟.

· الزملاء دا شغلهم.

· زهير عبادي اصلو ما غلطان.

· البلد دي ما عاوزة ليها زول يقول الحقيقة.

· ما في شفافية ولا في امانة.

· يتحمل الزملاء في قناة النيلين الفشل في نقل المباراة ..والمدير يفترض ان يكون المسؤول الاول عن ذلك القصور.

· لكن مدير القناة بعد هذا الاخفاق ..بطلع في الاذاعة بعين قوية.

· ………….

· عاجل : غايتو لو عملتوا ليكم قناة تانية إلّا نخلي ليكم البلد.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *