بابكر سلك

هو والقون


> عاد الحبيب المنتظر
> عاد عاد عاد
> عاد الأستاذ الرشيد بدوي معافى بحمد الله
> ربنا مرقوا بفضل دعوات المحبين
> مرقوا من الخطأ الطبي والخطأ الهندسي البموت بيهن نص الشعب السوداني
> عاد الرشيد
> وعادت معه عبارة هو والقون
> ولانفعال الرشيد الرياضي
> الزول يكون في دائرة السنتر
> فتخرج من حنجرته المحببه العباره المشهوره
> هو والقون
> الرشيد ذاتو كان هو والقون
> لكن ربنا لطف
> الموضع اتضح انو بسيط جدا في مصر المؤمنة باهل الله
> والمؤمنة باطباء يجيدون التشخيص
> ويجيدون اختيار العلاج المناسب
> الرشيد شخصيه رياضيه محبوبه
> برغم هلاليته التي لم يخفها يوماً
> الا انه امام المايكرفون كان دائما يرتدي جلباب القوميه الانيق
> وكم من مرة انفعل الرشيد مع تابلوهات العجب
> فكان يعجبه العجب والصيام في رجب
> وكم مرة انفعل مع اهداف المريخ بالذات الافريقيه
> لذا احب مجتمع الرياضه الرشيد القومي
> وللرشيد عبارات حقتو براهو
> بعرفها براهو
> وبيتعرف بيها
> وبنفهمها نحنا
> وبفوت واحد واتنين وتلاته
> ويا راااااااجل
> يا راجل دي بتشبه يا راااااجل بتاعت الاستاذ محمد سليمان
> قالوا في برنامج جراب الحاوي الذي كان يقدمه استاذنا محمد سليمان
> سأل سؤال
> قال رئيس دولة افريقي مثقف يتحدث سته لغات
> واحد جاوب وقال
> نميري
> محمد سليمان قال ليهو يا راااااجل
> دي كانت آخر حلقه في برنامج جراب الحاوي الناجح جداً
> الزمن ده لو مذيع قال يا راجل
> ما بلغوا البرنامج بس
> بقفلوا الاذاعه كلها
> المهم
> ومن عبارات الرشيد الجميله
> الثبات الانفعالي
> وصاروخ ارض ارض جو
> الرشيد ما قلد غيرو من المعلقين الرياضيين
> لذا جاءت حاجاتو مميزه ليهو
> عوداً حميداً استاذنا الرشيد
> وحمد لله الف على السلامه
> المهم
> قلنا انو القروبات الجماهيريه تستطيع ان تضيف الكثير
> ولن ننسى مساهمات القروبات الكتيره والفعاله
> آخرها كان دعم احباب حول المريخ الكبير
> قاموا بإعادة تهيئة غرف اللاعبين والحكام
> سبعين مليون دفعوها نقداً واكتمل العمل
> وفي الخاطر مبادرة صفوه بلا حدود الكبيره
> مبادره تضم جميع القروبات
> تهدف لإعادة تأهيل نادي المريخ بما يلائم الاسم الكبير
> دايرين يعملوا النادي زي روتانا
> زي الهيلتون
> واعدوا الخطط والخرائط
> التكلفه قد تصل إلى نصف مليار جنيه
> ولكن الثقه في القروبات كبيره
> وهناك مبادرة مريخاب اوفياء
> قدموا بالأمس عربه محملة بالفواكه والمشروبات والمياه
> هديه للمريخ
> قروب مريخاب اوفياء يشمل اعضاء الداخل والخارج
> ومنهم على سبيل المثال
> الأستاذ حسن حمد ونائب الرئيس ابو صالح العالمي والنيل يوسف وسيد فضل
> وصفوة مجلس الولايات
> البرتكان اسمو نيرتتي
> برتكان الجبل الاصلي
> قال ليك برتكانه واحده ياكلها بكري
> طيارات عاصفة الحزم ما تلحقو
> وتفاح جنوب افريقيا الاصلي
> وحكم كورة ابو الهل ضد مازيمبي برضو من اهل تفاحنا
> من جنوب افريقيا
> ايها الناس
> الروابط المريخيه اعدت العدة لقتال العلمه
> ومريخاب الدويم جايين كلهم
> بحسب افادة محمد لعوته
> جايين ومقررين الواحد يقطع تذكرتين
> واحده يدخل بيها
> والتانيه تبرع للزعيم
> انهم الشفوت
> ومن قال الشفوت غلب
> ايها الناس
> بفضل الله ومن بعده الشفوت
> سنتقابل بالمطار
> صدقوني
> ايام معدودات ونتأهل لدور الاربعه
> وبقليل من الاهتمام والالتفاف حول الفريق
> نصل المباراه الختاميه
> وبالتركيز تحت شعار من عزام ولي قدام
> سنتلقي حتماً بالمطار
> وان شاء الله الطياره تتأخر
> عشان نستمتع بوقت اطول مع الشفوت واهازيجهم الرائعه
> ايها الناس
> يوم الجمعه كلنا من عصراً بدري
> نفطر في الاستاد
> لنكون في الميعاد
> بوعقرب حالف
> وكوفي في الموعد
> علولو رجع
> وامير الأمير مستعد
> راجي دخل الفورمه
> ايمن وجابسون قاعدين
> اما عمر بخيت
> فانه النصر الافريقي الاول له معنا
> ان شاء الله
> من ناحية ريحة المطار
> حانوديك المطار يا عمر يا ولدنا
> المهم
> في الهلال قالوا لما كردنه قال نحنا القوة الماليه الضاربه في البلد دي
> واحد قال يا راااااجل
> لي اسي ماعارفنو وين
> عشان كده روشا اخوي ما بقول لي كردنه يا رااااجل اصلو
> يسمع ويسكت
> وروشا بقول الحق
> بس ما كل الحق
> ما بقول يا راااااجل
> يا روشا
> ان لم تستطع قول الحق فلا تصفق للزيف
> اها
> من ناحية ريحة المطار
> > شاميها
> شوفوا ليكم بلد تانيه عاد
> واقترح على الاهله
> من منطلق وطني
> يسوقوا الفاتح النقر يخندق ليهم في الكنغو
> الدنيا رمضان
> مشية فوزي ما بتجيب حقها
> سوقوا الفاتح النقر يخندق
> يمكن تنتهي تلاته بس
> برضك ابو الهل جارنا وقلبنا عليهو
> ايها الناس
> الجمعه من عصراً بدري
> عشان العلمه يعرف عصراً صاااااح
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> يحفروا الخيران لينا
> والتراب جمبها يكوموه لينا
> يا رجع الخيران من جديد ردمها لينا
> يا انفرش في الزلط غطاهو علينا
> وكان شفت يا والينا
> الكلب اكتر مخلوق مواعيدو مظبوطه فينا
> بجي قبل عربة النفايات يا والينا
> ويكشحها لينا
> وكان شفت يا والينا
> اليومين دي من أجمل الاغاني لينا
> الكهربا جات أملو الباغات اسي بتقطع يا جعفر
> اقصد يا والينا
> وبتقطع قبل نملي الباغات والمويه تجينا
سلك كهربا
ننساك كيف وسنة تلاته الف مشاكلنا مويه وكهربا ووساخه
والى لقاء
سلك


‫2 تعليقات

  1. وانت يا كلب الوالي.. وطبعا كلب هذه انت الجبتها لنفسك بحكاية الشم هذه وكما تعلم هي خاصية كلبية بامتياز. بس انت ابقي احسن من الرشيد علي عمر وقول للوالي العارف عزو دي ما آية من الذكر الحكيم…تقدر… بعد داك نشوف موضوع الرشيد.