داليا الياس

سعادة


كنت مفتكرة السعادة.. بتبقى في المال الوفير
أو نجاح باهر تحقق.. أو سفر أصبح مصير
بس لقيت إنو السعادة.. لو تعيش في حب كبير
وتلقى زول يصبح ملاذك ويبقى في الحوبات نصير
تبقى إنت شريك حياتو.. ويبقى على قلبك أمير
وفي دجى الهم المستف.. يبقى هو البدر المنير
همسو زي صوت الكمنجة.. وريقو زي طعم العصير
طيفو حاضر في الزوايا.. وفي الليالي يكون سمير
ولو يغيب يوم عن حياتنا.. يبقى جد موضوع خطير
السعادة الصادقة فعلا.. بتبقى بي إنسان جدير
تعترينا عليهو لهفة.. ونذرف الدمع الغزير
أصلو ما الحب الخرافي.. بيبدأ بالوجع الصغير
*****
ويا متيم أعرف إنو مافي ريدة بلا عذاب
وبين مشاعرك والسعادة.. ألف حيطة وألف باب
وغالبا تلقي الخيانة.. واردة من أقرب قراب
الحبايب ما بدومو.. وبرضو ما بدومو الصحاب
وأوع تتغرّ بجلالك.. مهما تكبر في المودة.. برضو آخرك كوم تراب
***
السعيد في الدنيا فعلا.. يلقي زول يحفظ غيابو
ولو حقيقة الحظ تبسم.. يبقى من إخلاص صحابو
وخلي بالك من قليبك.. وأوعا تجري ورا سرابو
المحبة كتير بتوجع.. وأحلى مافي الحب عذابو
ولو عرفت الشوق ونارو.. تاني أصلا ما بتهابو
وتلقى أعذار للبريدك.. وتحتمل جورو وعتابو
ألغرام في أصلو حاوي.. وحظ قليبك في جرابو
****
ونحن هسة خلاص عرفنا.. قصة الحب الحقيقى
إيدي في إيدك مصيرها.. وسكتك صبحت طريقى
والجميل في ريدنا إنك.. كنت في الأول صديقى
وفاهم أفكاري وظروفي.. ونوع برودي ولون حريقى
التعايش فينا مبدأ.. وإنت في الأحلام رفيقى
اللة يحفظ لينا ريدنا.. وبيك يدوم زهري ورحيقي
تلويح:
معاك إنت الزمن بيصفى.. وبدفن همي في النسيان