زواج سوداناس

تهاني: مافي زول جابرك على متابعة (أغاني وأغاني) ..عندك 1000 قناة شوف البترضيك


تهاني عوض

شارك الموضوع :

منتهى الانصرافية!
مما بدأ رمضان دا وبدأت برامجه العجيبة في الفضائيات السودانية ، الناس ما عندها شغلة ومافي شئ شاغلها غير برنامج (أغاني وأغاني) .. وتحول المشاهدون السودانيون (بقدرة قادر) إلى محللين ، ومؤرخين ، وخبراء موضة ، وخبراء ملابس ، وخبراء اصوات ونوتات موسيقية ، وتلحين وتوزيع ، ومخارج حروف ، ومش كدا وبس!! كمان حولوا النقد الفني الغنائي لنقد (شخصي) !! سابوا الأغنية ومسكوا في (الفنان) وطريقة لبسو ..وطريقة قعدتو !! يلا اديكم نماذج من (النقد الفني والاجتماعي المنتشر في الفيسبوك): عليكم الله (طه سليمان) دا صاحي ؟ ما بالغ ؟ شوفوهو لابس شنو؟ وعاينو لشعرو؟ هو ذاتو ما بيعرف يغني ..بجعر ساااي ! اهسي دا غناء ليك يا حسين الصادق؟ البنطلون دا ما قصيروني كدا ؟ مالك شاحدو ولا دا حق اخوك الصغير؟! السر قدور دا خرف ولا شنو ؟!!! ياخي البت دي غناية خلاص!! ياخي فلان داك مفروض تاني ما يجيبوهو يغني!! ياخي دا (أشتر) والتقول بالع ليهو (صفيحة رملة) وحلان شديد في الغنية ديك!!! هييي شوفو (عصام) مالو منطط عيونو كدا التقول خلعو (بعاتي) … قدور دا فكت منو وحقو يمشي يشوف ليهو مصلاية وسبحة ويشوف آخرتو !!!! الليلة فلان داك غايتو عذب الاغنية دي عذاب وبهدلها بهدلة خلى سيدها يتقلب في قبرو!!!!!!!!!!!!!

وجهة نظري الخاصة :
يا شباب خلوا الخلق للخالق.. انتو مش بتحبوا (الحرية)؟! خلاص احترموا حرية و(حقوق الآخرين) في اختيار ملابسهم وطريقة تسريحة شعرهم؟ واحترموا ذوقهم في اختيار ألوان ملابسهم ! الفن دا يا شباب للترفيه والتسرية عن النفس.. ما للغم والنبذ والنكد والانتقادات البلا طعم دي .. !
وبعدين اصلا إذا البرنامج‬ ما عاجبك .. ولا عاجبك لبس الفنانين.. ولا التلحين ..ولا الأداء ..ولا الأصوات.. ولا حتى قعدة الفنانين.. خلاص أمسك الريموت كنترول دا وامشي فتش ليك حاجة تعجبك وتستمتع بيها ومافي أي زول جابرك على متابعة (أغاني وأغاني) ..عندك 1000 قناة شوف البترضيك وبتبسطك وما تجي تخش الفيس دا تكرهنا بالانتقادات والانطباعات السلبية والتنظير الما عندو طعم دا ! ويا ريت الناس تبتعد عن (الشخصنة) وتنتقد (نقد موضوعي وبناء) وما تقعد تسيئ للآخرين بقصد أو (دون) قصد ..

بقلم: تهاني عوض

شارك الموضوع :

تعليقات الفيسبوك

تعليقات


16 التعليقات

إنتقل إلى نموذج التعليقات

      1. 1
        محمد الزين

        يا اختي عرستي ولا لسه

        الرد
      2. 2
        tal

        كان لديك مقالات جميلة بس هذا المقال ليس له معني ومن حق الناس انتقاد مثل هذه البرامج غير الهادفة وانتقاد حتي اللبس الشاذ والمرقع والموضة التي لا يلبسها الا ناقصي العقل . دي بنطلون يلبسو لكن ومرات الموضة يجي واحد لابس بنطلون مرقع وماعارف كيف ! ……. يجب الالتزام باللبس المقبول لدي المجتمع السوداني و الاسلامي .

        الرد
        1. 2.1
          بتاع تنظــــير

          النقاش مفروض في فكرة الكلام المكتوب، مش في تهاني عوض ، و كلامها صاح مية مية، بس تقول شنو في الرجرجة والدهماء الذين يثيرون الغبار ويزاحمون الناس في الطرقات !

          خلاصة الموضوع، أنو انت اذا كان ما عاجبك البرنامج، اللي جابك شنو تتفرج ! في حد رسل ليك دعوة ؟؟ وأصلا البرنامج ما تم بثه عشانك .

          المشكلة ان المنتقدين للبرنامج هم أكثر الناس حرصا علي مشاهدته ولا يطيقون أن تفوتهم حلقة واحدة .. يعنى زي المثل : لا بدورك .. ولا بحمل بلاك !!
          اللهم اني صائم !

          الرد
      3. 3
        ود الساترة حالا

        بقلم تهاني عوض ، تهاني عوض يظهر من لغتها أنها لم تكمل مرحلة الأساس ….. أكثر ما يميّزك يا تهاني عوض سطحيتك التي تثير الشفقة والرثاء ……. حاولي أكمل مرحلة الأساس والثانوي ، والكتابة في الصحف ملحوقة .

        الرد
      4. 4
        Duos

        اولا حمدله علي السلامه ياجميل .وتاني وريني بس الجديد شنو في إغاني وإغاني دا والله دا وهم من ناس النيل الازرق ساي . ولو في نسبه تصويت لي المشاهدة كان يعملوها .والتصوير مشكله لانو بيعمل حول في العيون ياخي كاميرات ثلاثيه الابعاد ماعندهم ومافي زول قاعد يشاهدو لانو كترة التكرار بتعلم ………..

        الرد
      5. 5
        سلام

        لماذا يستمرئ بعض الحثالة على النساء دون الرجال
        يعني يجي سراج النعيم وامثاله ويخروا في رؤوسكم وانتم ساكتين لكن اول ما تجي تهاني او غيرها ينتقدوها بالهمز واللمز ومحاولة التحرش بها الحقيقة تصرفات تنم عن عقد ودمامل في شخصية من يقوم بها وكذلك نقص في الرجولة

        الرد
      6. 6
        سلام

        يا ود الساترة حالا حقو انت برضو تستر حالك وجهلك لانو البت دي كتابتها رصينة ولغتها سليمة وتكتب احيانا بالفصحى واحيانا بالدارجي بس ده شيئ يتعذر عليك فهمه لانو يبدو انك من جيل الانقاذ الجاهل الحاقد
        استر انت حالك

        الرد
      7. 7
        محمد بابكر

        الاخوة والاخوات: السلام عليكم
        اولا السنا بمسلمين؟ فلنقرأ معأ هذا الدليل:
        1- الآية 6في (سورة لقمان) {وَمِنَ النَّاسِ مَن يَشْتَرِي لَهْوَ الْحَدِيثِ لِيُضِلَّ عَن سَبِيلِ اللَّهِ بِغَيْرِ عِلْمٍ وَيَتَّخِذَهَا هُزُواً أُولَئِكَ لَهُمْ عَذَابٌ مُّهِينٌ }لقمان
        لهو الحديث :: هو الغناء ..
        والدليل على ذلك_كلنا يعرف عبد الله بن مسعود _رضى الله عنه_ وهو الذي قال : والله الذي لا اله الا هوا نه الغناء- والله الذي لا اله الا هوا نه الغناء- والله الذي لا اله الا هوا نه الغناء _

        2- الآية 64 في( سورة الاسراء) {وَاسْتَفْزِزْ مَنِ اسْتَطَعْتَ مِنْهُمْ بِصَوْتِكَ وَأَجْلِبْ عَلَيْهِم بِخَيْلِكَ وَرَجِلِكَ وَشَارِكْهُمْ فِي الأَمْوَالِ وَالأَوْلادِ وَعِدْهُمْ وَمَا يَعِدُهُمُ الشَّيْطَانُ إِلاَّ غُرُوراً }الإسراء64

        الرد
      8. 8
        ود حواء

        تسلمي ياتهاني. بعدين العامل فيها فكي هنا وبتجيب في الايات القرانية امشي ضواحي بحري دي وحفظهم القران وةريهم الفرق بين الفقرا والرسول بدل ما تقعد في التلفزيون وتنظر ما عاوز تشوف عندك الجوامع مكيفة ماتخرج منها الا السحور. ماعاوز ال بيتك يشوفو بيع الدش

        الرد
        1. 8.1
          M. Babikir

          أخي ود حواء: لم أفهم تماماً ما تعنيه بكلامك هذا. إن قرآننا إنما أنزل إلينا لنهتدي به. لذلك إن نتركنا شيئاً من أجل الله سيعوضنا الله خيرا منه. و،ق أننا إذا تركنا الاستماع للإغانتي لن ينقصنا شيء. بل بالعكس سنتفرغ إلى إكمال النواقص التي نعاني منها الآن وقد سبقتنا جميع الأمم وتركتنا في آخر القائمة في العمل والزراعة والصناعة والسلاح والأكل والشرب وكل شيئ. لذا فلنفيق ونتدارك أمرنا وندع هذه المخدرات الصوتية التي لا تقدم ولا تؤخر. وهنالك أدلة ايضاً من السنة على ترك الاسترسال في الغناء والمعازف وما إليها.

          نسأل الله تعالى أن يهدنا ويرنا الحق حقاً ويلهمنا اتباعه وأن يرنا الباطل باطلاً ويلهمنا اجتنابه.

          والسلام عليكم ورحمة الله وبركاته

          الرد
          1. M. Babikir

            تصحيحات: تركنا .. وثق ..
            للأغاني..
            فلنفق..

            الرد
      9. 9
        ahmed adam hassan

        صباح سعيد علي الجميع
        مع احترامى ليك يا استاذة لكن تصدقى مقالك دا زاااااته شبه الجماعة اياهم و برضو الكلام موجه ليك
        خلى الخلق للخالق وطالما بتتكلمى فى ( الحريات ) الناس البتعلق على البرنامج من حقها تعلق ولا حلال عليك كلامك وحرام على الاخرين التعليق ؟
        اول حاجة ابدى بى نفسك
        وللاسف مقال من شدة السطحية الفيه احتمال مافى مقال شبه
        ارتقى لعقول الناس البتكتبى ليهم

        كل من هب ودب قال صحفى

        الرد
      10. 10
        عطبراوي

        سلام
        يا ود الستارة حالا تهاني دي الألفة بتاعت الفيس و انت تلميذ مشاغب يا أخي ما تربع يدك و تصم خشمك زي بقية الطلبة عشان ما تكتبك مهرجل و تقوم تكتبك بالقلم الأحمر . و دي معاناتها الناظر السر قدور هو البجلدك نصيحتي تعال المدرسة بكرة مردف

        الرد
      11. 11
        أب زرد

        تهاني عوض الجاز؟
        تهاني عوض دكام؟
        تهاني عوض أحمد؟
        تهاني عوض حنفي؟
        تهاني عوض باكمبا؟
        تهاني عوض الله جابو؟
        تهاني عوض منو؟؟؟؟؟؟

        بعدين يا بنت عوض الريسيفر بتاعي فيهو 200 قناة بس، أهمل شنو غير اخش علي أعاني و أعاني (مقصودة) ونتفرج في خلق الله دي …. وين يا ناس البت أفراح تونة والبت رماز أم حلقوم والبنية شريفة؟؟؟ ما ظاهرات في الحلقات الفاتن ديل ما يكون كشوهن ولا شيء؟؟ أجمل شيء في برنامج هذا العام هو عدم وجود ذلك المسخ المدعو قرقور ولا كدروك مش عارف

        الرد
      12. 12
        سوداني__لا حزبي__لا انفصالي _وحدوي

        كمان عاوزة تمنعي الناس النقد والكلام ؟؟؟
        دي قناة شبه قومية وبتعكس وجهنا المشرق لكل انحاء العالم__ الفنان المفترض يلبس فل سوت مش ذيو وذي اي شماشة لابس كيف كيف __ وين الاستديو التعبان __برنامج ميزانيته ضخمة وعاملين لينا صالة جلوس بكراسي تعبانة
        انتي ماعندك موضوع بصراحة يابت

        الرد
      13. 13
        سودانى مغبووووون

        هو ده برنامج ؟؟؟ وجايبنو كمان في رمضان ؟؟؟ تنوع شنو وحريات شخصيه منو ؟؟؟ مفروض يسموهو ( اعانى واعانى ) كل واحد صارفين ليهو مايك وجاى يلولو ليهو في اغنية من سنة حفرو البحر .. صاحب الغنية ذاتو اكان كاسو عضامو في تربتو مابيلقوها ..

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *