رأي ومقالات

الأحمر الوهاج (احب نجومك.. من دفاعك لي هجومك)


عشق كرة القدم ومحبة فريق ما دون غيره من الفرق ..شعور لا يمكن تبريره ..تجد نفسك تدافع عن فريقك حتى وهو في أقسى أيامه …وتتيه زهوا وفرحا عند اول هدف يدخل في شباك الخصم … ربما يقول لك البعض ..لماذا تشجع هذا الفريق بعينه..؟؟.. لماذا ترهن نفسك للون واحد …شجع اللعبة الحلوة ياخ ..ولكنك تعلم ..انه ليس بيدك ..وانك وجدت نفسك منساقا له دون ان تدري …فالحب في ذاتو مبرر كافي ..كما يتغنى افراد عقد الجلاد … لذلك لا اجد تفسيرا لحبي للمريخ وعشقي للاحمر … اتابع مبارياته بترقب ..وانتشي فرحا عند الفوز …. المريخ عشرة عمر وله ذكريات ظلت تبعث في النفس ذلك الاحساس المحبب الذي يجعلك تبتسم دون ان تدري كلما ذكر او رأيت شعار المريخ.. …عشنا معه اياما جميلة واهدانا لحظات فرح غامرة عندما عاد بكاس مانديلا ..وكأس دبي …وبطولة سيكافا …ذلك زمن ..كان في النفس حماس .. وفي الجسد وافر نشاط يجعلك تخرج الى الطرقات هاتفا مع الملايين (سجل ..سجل يا تاريخ ..كأس أفريقيا للمريخ)… ذلك عهد كانت الروح الرياضية فيه هي الغالبة ..وكثيرا ما كان اللاعبين من الهلال يجلسون لتشجيع المريخ في مباراياته الدولية.. والعكس أيضا يحدث عندما يمثل الهلال السودان في احدي المحافل الكروية ….كانت الروح الوطنية هي الأصل وما عدا ذلك ترهات لا تشغل بال احد …ما الذي حدث لتجد ان هناك من يتمنى فوز الغريب على (ود امك القريب)؟؟؟
نشجع الهلال وأي فريق سوداني اخر في كل المحافل الدولية ..وكل المباريات التي تجمعه مع فريق اجنبي .. ودية كانت او رسمية ..لكن مباريات القمة اكيد (غير ) …واكيد نتمناها دائما حمراء قانية …ولا يتنازعني الامر الا اذا تواجه المريخ مع احد الفرق العطبراوية …هناك اصبح كما الجليلة بنت مرة التي قتل اخاها زوجها …فكان ان رثت نفسها وهي زوجة المقتول واخت القاتل ..فقالت (انني قاتلة ..مقتولة ..ولعل الله ان يرتاح لي )…لكن اذا تواجهت الفرق الاخرى مع العطبراويين ..تعرفون تلقائيا لمن انحاز …وانا ما بفسر ..وانتوا ما بتقصروا ..
بالرغم من محبتي لكرة القدم ومتابعتي للمباريات ..لا اجيد لغتها وامارس الحسد العلني لكل من يتقن فن التعليق المباشر على المباريات او يكتب كتابات متخصصة عنها ..عندما انتويت كتابة هذا المقال صباح انتصار المريخ على الجزائريين ..كنت اريد تزويده بمصطلحات كروية مثل… تسلل … كورنر …اوف سايد .. ..كلام من نوع البكتبه الاستاذ (مزمل ابو القاسم) ….حاجة كدا بتاعة ناس متمكنين …ولكني في موقف من قال (لا خيل عندي اهديها ولا مال ..فليسعد النطق ان لم يسعد الحال ) ..فأجد نفسي ..لا املك الا عشقي اللامتناهي للاحمر الوهاج ..وذلك الزهو الذي ملاني ليلة المباراة …هذا الفريق الذي ظل يهدينا الفرح موسما بعد اخر ..وظل يزرع فينا الامل عاما بعد عام … فيا مريخنا العزيز ..معذرة ان قصرنا في حقك …وعجزنا ان نرد لك الجميل …..شكرا ثم شكرا …ولتدم لك القمة …والانتصار ..ولتدم لنا النشوة والافتخار …واخيرا وليس اخرا نهديك كل الحب ونغني لك (احب نجومك …من دفاعك لي هجومك) ..ووصباحكم خير

د. ناهد قرناص


‫8 تعليقات

  1. كانت ايام جميله عندما كنا في انتظار نتيجة بندل يونايتد النيجيري مع المريخ واتي صوت مزيعة الراديو أحبك أحبك أحب نجومك من دفاعك لهجومك – لم ننم ليلتها ‘ أذيعت النتيجه تقريبا عند منتصف الليل -أين أيام ضربة الجزاء يا عيسي جابت الاذي يا عيسي – آخ لو التاريخ يعيد نفسه السنه دي-

  2. طيب وكت مابتعرفي تعلقي وما بتفهمي حتي مفردات الكورة ناطة لينا مالك؟
    نحن مارسناها وعشقناها وشجعنا المريخ من زمن حموري، لكن لما واحد يكون عامل ليك وجع وش يجيك في المكان البتريدو بتخليهو ليهو!
    هسي نخلي ليك المريخ كمان؟؟؟، شوفي ليك موضوع تاني ربنا يهديك!

  3. ده شنو يا عمدة…انت جنيت ولا شنو…ياخى المرة لو مضايقاك رجعها اهلها…ولا امكن اصلا ما لاقى واحده تقبل بيك…
    ..ياخى راجع نفسك…وحل عن سمانا شوية.

  4. تعرفى يا دكتورة ناهد يابت عطبره الاصيله انت الكلام الكتبتيهو ده ابلغ من اى كلام اى ناقد رياضى متخصص لانه خارج من القلب مباشرة بدون اى رتوش ومجاملات…عزرا كتابنا الرياضين معظمكم تكتبون من اجل اشياء اخرى..واكرر معظمكم وليس جميعكم شكرا بنت عطبره الاصيله على هذه الحروف الانيقه التى ولو بطريق غير مباشر عبرتى فيها عن حبك لام المدائن عطبره ..ولا يهمك اكتبى فى الرياضه بدون خوف وبدون مصطلحات المهم كلامك يصل..
    ولك تقديرى متوكل ابن عطبره

  5. عشقك للمريخ وحبك ليه ماعندنا فيه ولا زرة اعتراض .. المحيرنى ومجننى مدخلى لينا مزمل ده لى كمان استاذ مزمل (ومن الناس المتمكنين ) ؟ خليك فى عشقك للمريخ ماتخرمجى اكتر من كده

  6. وانا اقول بقرأ عمودك كل يوم بارتياح ليه؟ اتاريك طلعتي صفوة
    لك التحية يا دكتورة

  7. التحية والتقدير لك يا دكتورة واليوم ما شاء الله فجرتيها عديل إنك مريخابية والف الف مبروك للصفوة وكل عام وانت بالف خير وعافية –
    الذ شيء عطبراوية وصفوة ؟؟ ما شاء الله تبارك الله

    تحياتي لعزو ووين الشاب ده ؟

    Walied Awad – Atbara- Ombakoul