حوارات ولقاءات

الفنانة ذكريات ولولي: شاطرة جداً في صناعة (القراصة) وعصير المنقة


ذكريات صالح ولولي فنانة جميلة جداً في شكلها ومظهرها وأسلوب وطريقة تعاملها مع الناس وتتوج ذلك بصوت عذب وجميل للغاية وموهبة فنية كبيرة تتمتع بها في ترديد الأغنيات النوبية بمرافقة فرقتها المصاحبة.. جلست إليها (السياسي) في دردشة رمضانية خفيفة فكانت هذه الحصيلة:

* سلامات يا أستاذة رمضان كريم؟
– عليكم السلام ورحمة الله.. الله أكرم وتقبل الله منا ومنكم صالح الأعمال.
* يومك كيف؟
– يوم جميل أسري حافل مع الأهل والأحباب في البيت الكبير بنكون مع بعض ورمضان أحلى باللمة مع الأهل.
* عندك طقوس معينة في رمضان؟
– رمضان بجمعنا في البيت الكبير أهم حاجة عندنا ختمة قرآن مع بعض وثانياً بنتفق إتفاق لازم أي شخص فينا يختم المصحف كاملاً في رمضان ودي أهم الأشياء الجميلة خلال الشهر الفضيل.
وفي حاجات بنقوم بيها بتكون أجمل من الأيام العادية وبنقضي يوم جميل مع بعض ثم بعد ذلك بتجه إلى المطبخ وعلاقتي علاقة جميلة جداً مع المطبخ وشاطرة جداً في عمل (القراصة) ودي وجبتنا الأساسية.
* هل العمل مرهق في رمضان؟
– في رمضان ما في شغل كل الحاجات البنقدمها بتكون قبل شهر رمضان وتبث خلال رمضان.
* رمضان ما بين الأمس واليوم وحنين الذكريات؟
– رمضان زمان كان عندو نكهة خاصة كنا بنصوم رمضان في حلفا مع الأهل والأحباب ورمضان في حلفا عندو طعم خاص الناس بتزور بعض وبتتواصل مع بعض والناس بتطلع الشارع بالفطور ولحظات جميلة جداً بنسعد بيها في حلفا لكن الآن بنصوم في الخرطوم الوضع إختلف شوية وهنا برضو جميل لكن بنفقد لمة الأهل والأحباب والجيران وشهر رمضان شهر جميل لأنك بتعبر فيه عن معنويات وتقربك لربنا وربنا يتقبل.
* البرامج التي تحرصين على متابعتها في الشاشات والإذاعات؟
– دائماً بركز على برامج ما بعد الإفطار وفي برامج جميلة جداً تبث من خلال القنوات مثل برنامج (بغنيلك) على قناة الشروق وكذلك بتابع برنامج مدائح مختارة على قناة الشروق وقناة الشروق قناة جميلة بترضي المشاهد من خلال البرامج الناجحة والهادفة التي تبث من خلالها وكذلك إستمع إلى راديو الرابعة يقدم أشياء جميلة.
* الوجبات والمشروبات المفضلة؟
– كما ذكرت في السابق نحن ناس بنحب القراصة جداً وهي وجبتنا الأساسية لكن برضو بنعمل العصيدة وكذلك أحب الحلو مر وعصير المنقة.
* أكثر ما يزعجك في رمضان؟
– أكثر ما يزعجني أني أسمع خبر وفاة في رمضان الزول مؤمن بالقضاء والقدر لكن كون أنك تطلع وأنت صائم أصعب حاجة حتى لو ماشي بطيارة بتكون تعبان.
* إتحاد الفنانين هل يجمع أعضائه في رمضان؟
– أنا بعيدة شوية عن الإتحاد نسبة لظروق العمل وسفري كثير لأني بمثل السودان والنوبة خارج السودان وملقبة بسفيرة الأغنية النوبية بمشي المحافل الدولية لذلك أنا بعيدة عن الإتحاد.
* البرامج التي قمتي بالمشاركة فيها خلال شهر رمضان؟
– شاركت في برنامج (بغنيلك) في قناة الشروق مع الأستاذ عبد القادر سالم والمذيعة إيمان بركية وكذلك في قناة أنغام برنامج بيني وبين الفنان أحمد إسماعيل من النوبة المصرية.
* إلى أين تهرب ذكريات في رمضان؟
– ضاحكة.. أهرب إلى الأماكن الباردة دائماً ولازم أكون في مكان بارد طوال اليوم وما بحب أطلع إلى أي مكان في رمضان بكون ملازمة البيت والمكان البارد ولو إضطررت أني أطلع بطلع لعزومات الأهل بس ما كتير.. بشكركم كتير الشكر وبتمنى ليكم التقدم والتفوق.

حاورتها: سلمى الطيب- السياسي


‫6 تعليقات

  1. عرفنا جماا الصوت وجمال الموهبة، لكن الغزل المكشوف دا شنو؟ جميلة جدا في شكلها!!!

  2. امووووووت انا فى المنقة زاتا هههههه اللهم انى صااااااااااااااااااااااائم

  3. السوادنة ديل كذابين بشكل مبالغ فيه
    هسي عليكم الله في زول بيزور ليهو زول في رمضان
    بطلو كذب وعوارة وبوامة

  4. وانت يا احمد هي ماكزابها عادي ممكن تمشي تفطر مع احد الاصدقاء او تمشي تفطر مع الاهل عالم وهم