سياسية

شيخ الأمين : قمت بإعادة علاقات السودان مع الامارات وعندي عقار جوار برج خليفة وأنا حاسدني !!


قال الشيخ المتصوف المثير للجدل ( شيخ الأمين ) بأنه من ساهم في إعادة علاقات السودان بالامارات بمايتمتع به من صداقات طيبة مع شيوخ وقادة الامارات الأمر الذي جعله يوظف هذه العلاقة لخدمة بلاده ، وتأسف ( الأمين ) على الهجوم اللاذع الذي تعرض له بعد هذه المهمة ووصفه بالدجل والشعوذة بدلاً عن الاشادة على الدور الذي قام به من أجل بلاده .

وأضاف ( شيخ الأمين ) الذي إستضافته مساء الاربعاء قناة الشروق السودانية ببرنامج ( بدون حصانة ) بحسب موقع ( سوداناس الالكتروني ) أضاف قائلاً : أن البعض يحسده بما يملك من جاه و أموال ، وفي سؤال لمقدم البرنامج حول أملاكه بالخليج قال ( نعم أملك شركة مقاولات بالامارات و عقار يجاور برج خليفة و ( زاوية ) بهولندا أنت حاسدني ؟ ) مخاطباً مقدم البرنامج هيثم كابو .

وذكر ( الأمين ) في رده لاتهام بجهله بتجويد القرآن و معرفة الفقه ، قال قراءة آيات من القرآن خلال ( الونسه ) لاتفطن فيها للتجويد لان الشخص لايكون منتبهاً ومدققاً فينطق بنطق السودانيين كنطقهم للثاء سين والذال زاي ، أما خير دليل على إلمامي بالفقه هو تأليفي لعدة كتب في الصلاة والطهارة .

سوداناس


‫25 تعليقات

  1. الله يكفينا شرك .. هسع عليك الله في شيخ ورع وفيه خير .. بيقول حاسدني .. وأنا عندي وأنا عندي .. أرحم نفسك .. الشيوخ الأخيار والصالحين ربنا يجعل ليهم القبول في الأرض . شوف ليك شغلة إشتغله .. في حاجه غلط لكن هي شنو ما عارفها .. أستغفر الله .. ونصيحتي لك ولوجه الله لا بعرفك ولا حاسدك رااااجع نفسك .. والعفو

    1. شيخ الامين محسود اول حاجه قالو في خلط في مسيدو والله اعلم والزحمه بتلم وبعديها في اكل فته بي لحمه واللحمه سمحه وعادل امام قال بحب الزحمه وانتو فاهمين المهم عليك الله في برنامج ظريف زي ده بتفوت ياخي البشير زاتو مشي

  2. انا برضو قلت كدا؟شيخ الامين زول ممكن يصلح علاقة السودان بي امريكا بس خلي البشير يرسلوا بالمهة دي ؟

    1. انتي كنتي سودانية وهسي بقيتي خواجية، يعنى مؤهلة للقيام بهذه المهمة !! خاصة انك ما ناكرة جنسيتك السابقة.. و أهو برضو عمل خير والدنيا رمضان .

      1. ياسيد واحد ؟شيخ الامين عندوا خبرة اكثر مني والخبرة مهمه جدا في هذه المواضيع وهو قال قمت بإعادة علاقات السودان مع الامارات يعني خلاص زول اصلاح و خبرة واكيد بشة بيثق فيه وقلنا نرسل شيخ الامين احسن لامريكا لانو الامريكان بيحبوا الشيوخ جدا وبيسمعوا ليهم وانت ماقاعد تشوف ناس السفارة الامريكية في السودان كل مرة بيزور الشيوخ كيف وشيخ الامين شيخ متطور وبتاع ببسي وكدا؟

        1. ما علقتي علي حكاية بقيتي خواجية دي !! يعنى انتي ما مصنفة African American وباللوتري كمان !!!!

          1. ياباتعت الشمار دا منو القال ليك انا مغتربة اصلوا بتعلمي الغيب انتي ولي شغالة في جهاز الامن؟خلاص بقيتوا تصنوف الناس بلاسماء والالقاب ولي شنو

  3. الدنيا رمضان … تاليف كتب وعن الصلاه والطهاره والله لو جبنا طفل فى اولى ابتدائى يصلى احسن منك وكما يالف ليك كتب ….اخجل على نفسك الصلاه دى دايره ليها تعليم … وكما بلا خجله انت لو راجل الفها فى التجويد والا فى حاجه دينيه كبيره الناس تاشر تقول ده عملوا شيخ الامين ((اشك انك شيخ))

    1. رمضان كريم
      الصلاه هى اكثر العبادات التى ناديها (خمسه مرات فى اليوم) و هى صله الانسان بربه لذلك تحتاج الى تذكير و ليس تاليف و الوقف على بعض الاخطاء الشائعه فى صلاه المسبوق و سجود السهو و جمع و قصر الصلاهز.
      و شيخ الامين واحد من المسلمين مامور بان يدعو الى الله جزاه الله خير

  4. يا شيخ الأمين نطق الثاء سين والذال زاي وتغيير الحركات (الفتحة الضمة الكسرة) عند قراءة القران ليس من التجويد في شيء إنما هو من الأخطاء الظاهرة (اللحن الجلي) وكلام الله يجب أن يقرأ كما أنزل من عامة الناس دعك ممن يدعي الفقه والمشيخة..

  5. السلام عليكم ورحمة الله وبركاته
    يا شيخ الأمين نسأل الله لك الهداية. في كل مقابلاتك وما ظهر عنك من لقاءات تحاول أن تبرهن للناس صلاحك وأن من الناس من يحسدك. ولكن أول علامات الصلاح هو عبادة الله حسبما سنها لنا نبينا الكريم، وليس كما نؤولها نحن. ثم ثانياً أُمرنا أن نحاول إخفاء النوافل والصدقات وكلما نتقرب به إلى الله من نوافل، وأنت لا تألو جهداً في أن تنشر عبادتك وعلمك وورعك وتدافع عن نفسك من كلام الناس بمزيد من الدعاية وادِّعاء الصلاح. أين أنت من أويس القرني الذي عندما علم الناس بصلاحه، سأل الله أن يقبض روحه حتى لا يعلم الناس بذلك وينسبون إليه الصلاح وهو يعلم أن الفضل كله من الله سبحانه؟ لذلك ننصحك بأن تتوب إلى الله وتتبع هديه وهدي نبينا الكريم عليه أفضل الصلاة والتسليم؛ وأن تعلم أن الشرط في الصلاح هو الاتباع (ليس الابتداع) والإخلاص في العمل. والله الموفق إلى سواء السبيل.

  6. السؤال الذي يطرح نفسه ما هي مقومات وشروط الصلاح
    لم يقل او يقدح في سيرة هذا الرجل ولم نسمع عنه سواء جمعه للشباب والصلاه في جماعه وإطعام الطعام وإعطاء المحتاجين وفقه الله

    1. هل نسيت مشاكل حيرانه واعتداءه على أهالي منطقة بيت المال حتى طالب سكان المنطقة بإغلاق تكيته وتبرأت منه الفرق الصوفية؟؟؟

  7. فك عننا الله يرحم والديك ..علاقات شنو البترجعها انت .. بس بيني وبينك في ظل هذا العهد الزاهر عهد بشة والدفاع بالنظر اصبح كل شي ممكن ..

  8. الأخ محمود: السلام عليكم ورحمة الله وبركاته

    هذا الرجل حتى لو قام بهذه الأعمال التي سعمتها عنه، ألا ترى كيف أنه يدافع عن نفسه ويتخذ منهجاً إعلامياً أقرب للدعاية منه للصلاح الحقيقي الذي يتطلب أن نعبد الله بالطريقة التي سنها لنا نبينا الكريم صلى الله عليه وسلم، ودون ضجيج ودون زخرف ودون عبادة جماعية ودون رايات وطبول. أين نحن من الباقيات الصلاحات؟ أين نحن من لا إله إلا الله وحده لا شريك له له الملك وله الحمد وهو على كل شيء قدير؟ أين نحن من سبحان الله والحمد لله ولا إله إلا الله والله أكبر؟ أين نحن من سبحان الله والحمد لله تملآن أو تملأ ما بين السماء والأرض.؟ هل هنالك ذكر وتعبد لله خير من هذه؟ لماذا نترك الأصل ونتمسح بأشياء غير واردة وغير مثبته وربما كان بعضها من إيحاء الشيطان تلبيسه. ألا ترى أنه لا توجد مقارنة بين الأسلوب التعبدي لهذا الرجل ومن كان على نهجه وبين ما تركه لنا أبو بكرو وعمر وعثمان وعلي ناهيك عن نبينا ونبيهم الذي علمهم العبادة الحقة؛ وقد قال صلى الله عليه وسلم: “عليكم بسنتي وسنة الخلفاء الراشدين المهديين من بعدي عضوا عليها بالنواجذ” أو كما قال صلى الله عليه وسلم.

    دعونا ننظر الى الأمور بكل تجرد ولا نعتمد على أدلة ليس لها سند قوي. والله الهادي إلى سواء السبيل.

  9. يا اخوانا سيبو الزول فى حالو يعنى شنو عنجو عقار فى دبي الكيزان كاهم عندهم فلل فى نخلة جميرا واسالو مصطفى عثمان اسماعيل وعوض الجاز.

  10. زمان كانوا البكونوا نجوم فى السودان الادباء والشعراء وحتي لاعبي الكورة والفانانين ذوي الكفاءة اسع الدجالين ومتسلقي السياسه وحرامية السوق اصبحو نجوم المجتمع

  11. يا لطيف …… يا لطيف … عقار جوار برج خليفة!! دي كبيرة أوي يا شيخ … من أين لك هذا …. أهل الإمارات لا يملكون عقارات في هذا المكان؟

  12. اااااااااااااااه يا دنيا !!!
    يعنى على المقياس دة ممكن عااااادى لاعب الهلال معاوية فداسى يبقى وزير اتصالات و برخص لينا الانترنت … يا اخوانا من الاسباب المضيعة السودان عدم التخصصية .. المفروض اى واحد يشتغل شغلو .. و شيخ الامين لو احسن من ناس العلاقات الخارجية المفروض يبقوهو بتاع علاقات خارجية وديلاك يعملو لسهم مسيد و خلاوى

  13. عندك عقار شي عادي وتعيد العلاقات (شينة) جدا في حقك .. العلاقات الدبلوماسية بين الدول تقام وتقوم على أبعاد استراتيجية كبيرة اوي استر يارب .

  14. اللهم اني صايم الزول دا ماعندو شغلة قالو عندو جكس بس ياخي الله يصلح حالك الشعب السوداني كلو حاسدك اتصدق مدام ربنا فتح عليك بدل تتباها عندي وعندي

  15. نحن الشيوخ فى السودان عرفناهم من خلال ما قدموه للناس من دعوة فى المساجد والقنوات الفضائية
    اما انت فما عرفناك الا فى الغناء والرقيص والاختلاط , فانسب مكان ليك فهو فى برنامج اغانى واغانى