زواج سوداناس

التعدد العشقي


د.عادل الصادق المكي

شارك الموضوع :

عندما يقدر الله لك أن تركب وسيلة مواصلات.. عليك أن تنصاع لكل ما يصدر لك من سائق المركبة وكمساريهو.. حيث أنك تطأ أرضا أجنبية.. يتحكم فيها هؤلاء الناس.. أن تجلس أو أن يجلسك ويرصك في المركبة.. زيك وزي أي كرتونة.. وينهرك نهره ترتعد لها أوصالك.. وتقوم براحة وتقعد.. وتربع إيديك وتعاين قدامك.. وما تفك إيديك إلا تكون داير تدفع ما يطلب منك.. بالمناسبة غابت التعريفة الموضوعة من قبل الدولة.. وأصبح إنت وحظك تركب نفس خط المواصلات الصباح بجنيه العصر بجنيهن.. وبعد المغرب ممكن بتلاتة جنيه.. احتجيت مرة وأنا عامل فيها بارم ديلو.. قبل عليْ السواق وكورك لي وقال لي وهو يحضن الدركسون: “يا اخونا.. عاين جاي.. فهمك شنو إنت؟.. ما داير تدينا حقنا والله كيف؟”.. أصبح الموضوع حق.. والحق حق.. قلت ليهو حقكم كم؟ قال لي حقنا تلاتة جنيه.. قلت ليهو يا اخي حقكم جنيه ونص.. قال لي وما زال يحتضن الدريكسون: “أسمع دا حقنا.. لو ما داير تدينا قول ما داير”.. وخوفا من التصعيد.. وإنو نشتبك أنا والسائق ويموت تحت يدي بنسبة 5%.. أو أموت أنا تحت يدو وهو الأقرب بنسبة 95%.. دفعت القروش حمرة عين سااااااااكت.. ومشيت.. وانا أسأل الله ما ينفعنو وإن شاء الله يدخلن عليهو أربحاء وعقاب إسبيرات ضاربة..!!.. تسمع ما يطرب السواق.. فوق عينك.. وممكن تسمع غنية واحدة أربعين مرة.. لو عاجبة السواق.. وصادف إني سمعت غنية قسرا.. والسواق في غاية الطرب الغنية بتقول: “للناس قلب واحد وانا بشيل قلبين.. وما بعرفو شنو.. أنا بحب اتنين”.. يعني الزول دا بحب اتنين مرة واحدة.. بالواضح كدا.. وبدون أي خجلة.. سرحت مع المطرب أبو شريحتين دا.. وكيف يسوي كدي؟.. ورجعت للزمن الزمان.. زمن الواحد يا الله يلقى واحدة يحبها.. ويقعد يدسدس فيها ويضاير فيها من الناس.. وما يكلم زول وممكن هي زااااااتا ما تكون عارفة.. ولو خلاص اضايق وخشمو اكلو وقل ّأدبو وداير يحدس الناس.. وهو شاعر واللا مطرب يقول اول حرف فيها.. وما بيقولو بالأبجدية.. يقول بالأرقام.. يا سبعين “حرف العين”.. يا خمسين “حرف الفاء”.. وود الرضي في رمية قال وهو خايف وقلبو مقطوع:
ستين اسمك والشعر كالليل.. . اربعات ميات واحد وتلاتين
أها عاينو الحكاية دي.. بعد فك الشفرة.. نلقى ود الرضي قاصد اسمها (ست ال..).. بالأرقام وبرضو ما داير يتم الاسم.. مع إنو ممكن أي واحد من وليدات الزمن دا ويكون بغنيها وتسالو دا شنو؟ يقول لك دا رقم الموبايل حقها.. حسي الزمن دا يقولو الاسم كلو.. وممكن اسم الأبو لو ماشي مع القافية حقت القصيدة.. وممكن يكون رباعي.. واسم الام لو دعت الحاجة.. وبيتهم وين؟.. ونمرة التلفون كم؟.. والطول كم؟ والوزن كم؟..

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *