زواج سوداناس

الـدم البقــري


شارك الموضوع :

في دراسة حديثة.. تحاول أن تربط الدراسة بين فصيلة دم الإنسان.. وسلوكه.. وانفعالاته.. وفصائل الدم المعروفة عند الإنسان أربع فصائل.. مع ظهور فصيلة جديدة.. هي فصيلة “بومباي قروب”.. ودي فصيلة اكتشفوها في الهند.. عشان كدا سموها بومباي قروب.. الفصيلة دي قالوا موجودة في العالم كلو في خمسطاشر أسرة فقط.. ودي فصيلة نادرة جدا جدا.. وما تقبل نقل دم ليها ولا بتدي دم لي زول تاني.. حتى لو من نفس الفصيلة.. عشان كدي أصحابها.. أي واحد فيهم كل مرة يمشي يشيلوا منو دم ويحفضوا في بنك الدم.. ولما تحصل ليهو حاجة ويحتاج لي دم يجيبوهو ليهو..!.. تقول الدراسة إن أي فصيلة دم ليها سلوك معين.. يحدد شخصية صاحب الفصيلة.. النضم دا في الغالب الأعم.. وبالتأكيد في استثناءات.. لو كنت عزيزتي القارئة وعزيزي القارئ من أصحاب:
الفصيلة (O):-
لو كنت من أصحاب هذه الفصيلة فأنت زول فاكيها في روحك.. خانقها حتى آخر زرارة.. وعامل فيها عشرة بقرش “مفهوم قديم”.. بتكون شايف نفسك فيل والباقين نمل.. والبنت تكون شايفة روحها غزال والباقين قرود.. وتتقدل في الشارع وتعاين لي ضلك.. فرحان بيهو.. تكتشفها لما تشاكل زول ويقول ليك “بأدبك”.. تعاين ليهو من فوق لي تحت وتقول ليهو بازدراء (انت.. انت.. انت تأدبني أنا؟).. وتأشر على نفسك بعزة وشموخ.. وممكن يكون الزول دا هجيمة ويجيب قدرك أربعطاشر مرة.. لكن أنت مسيطرة عليك الفصيلة..
الفصيلة (A):-
لو كنت من أصحاب هذه الفصيلة فأنت زول متشائم يا كافي البلا.. لو مرقت الشارع ساكت تقول حسي تضربني عربية.. ولو قدمت لي وظيفة تقدم وأنت قنعان منها.. ولو داير تعرس تقول حسي جد العروس يقوم يموت يوووووم العرس.. أو يمكن العروس زااااااتا تموت.. أو أموت أنا.. في النهاية تقول العرس دا ختيت ليهو القدرو..
الفصيلة (B):-
لو كنت من أصحاب هذه الفصيلة فأنت زول راسك قوي.. يقولوا ليك قبل كدي تقبل غادي.. وزول فوضوي.. تجي من برا تصوط البيت فوق تحت.. القميص في بكان والبنطلون في بكان.. ونعلاتك فردة في نص الحوش.. والفردة التانية تحت العنقريب في العوضة.. وانطوائي.. بعد جوطة البيت دي.. تتكرفس في عنقريب وترقد وتقبل على الحيطة وما تنضم مع زول.. للصباح..
الفصيلة (AB):-
لو كنت من أصحاب الفصيلة دي فأنت زول نصيحة الطريفي عدييييل. طريفاوي.. تقول للأعور أعور في عينو.. وتقوم جاري.. علا متردد.. وممكن فجعة تزهج وتتلبش.. بلا سبب.. ومافي زول بيقدر يتنبأ أنت ح تعمل شنو.. غايتو الناس المعاك يومهم كلو إيدهم فوق قلبهم!!!!.. وبرضو تتميز بالغتاتة المؤسسة والبطن الغريقة..!!!
أما الدم البقري.. والدم القرادة.. والدم العسل.. ما ليهو علاقة بالفصائل.. دا موهبة من رب العالمين.. يعني زول دمو بقري دي هبة من الله.. والدمو قرادة دي موهبة وإمكانيات عالية في اللصيّق..!!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *