زواج سوداناس

صور بنات، فيدوهات خاصة، حفلات، رقيص، بتحتار الناس دي بتنشر حاجات زي دي كيف ؟ اليك الاجابة


امدرمان1

شارك الموضوع :

بنشوف صور عائلية كتيرة في الفيس والواتس ، صور بنات ، فيدوهات خاصة ، حفلات ، رقيص، بنحتار الناس دي بتنشر حاجات زي دي كيف ؟ وليه ؟ يلا غالبية الناس ديل بيقعو ضحايا لعملية بيع تلفون او لابتوب من غير تطبيق طريقة الفورمات الصحيحية.

يعني الواحد او الواحدة لمن يجي يبيع جهاز تلفون بيكتفي بعمل فورمات للجهاز والذاكرة فقط ، بيجي بتاع المحل او المشتري الجديد ببرنامج من برامج إستعادة الملفات الكتيرة جداً ، بيرجع لو ماكل الملفات غالبيتها وبعداك هو ومزاجو ، ابتزاز ، تشهير ، تسلية ، ادمن قروب في جكس البلد ، المهم بيتصرف وبيستفيد من الحاجات دي يلا التصرف الصحيح بيكون كيف ؟ :
أولاً :- ماف داعي تبيع جهاز بالذاكرة بتاعتو ، لم ذاكرتك عليك بيكون افضل

ثانياً :-بعد ماتعمل الفورمات للموبايل او الذاكرة ، الملفات مابتتمسح من الجهاز ، بس عناوين الوصول ليها بتتغير ، بتبقى من غير عناوين وبالتالي الجهاز بعتبرها مافي ، بس هي موجودة واصغر برنامج برجعها ، ماببتمسح إلا تنزل محلها بيانات جديدة يعني مسح نهائي ماف ، بس في استبدال .

ثالثاً :- نجي للا ستبدال ، نفرض انو جهازك ذاكرتو خمسة قيقا ، زي ماكنت ماليها اول لازم تملاها بعد الفورمات بي نفس الحجم ، يعني تشوف ليك ملفات بي حجم خمسة قيقا من اي نوع انشاء الله فيديو طويل تنسخو كم مره لمن تملا الذاكرة من جديد ، بعد داك تعمل فورمات من جديد ، وكدا لو جا زول عمل إسترجاع حيرجع البيانات الجديدة الفيديوهات النزلتها في الأخير دي مثلاً ، وماحيقدر يرجع الملفات القديمة.

اخيراً :- الطريقة دي تتطبق لاي حاجة موبايل ، ذاكرة خارجية ، لابتوب ، هارديسك خارجي ، وربنا يقدرنا على فعل الخير.
بالله عليك انشر ، يمكن زول من اقربائك او أصحابك يقرأ البوست ويستفيد ويتفادى المشاكل دي بس بي ‫‏شير‬ منك.

بقلم: عبد الله جعفر

شارك الموضوع :

تعليقات الفيسبوك

تعليقات


6 التعليقات

إنتقل إلى نموذج التعليقات

      1. 1
        شكري

        كتّر خيرك يا وليدي.

        الرد
      2. 2
        واحد من الناس

        شكرا جزيلا يا حبيب

        الرد
      3. 3
        عارف وفاهم

        جزاك الله خير والله كتير من الناس ما عندهم المعلومة دي، ربنا يجعلها في ميزان حسناتك ويستر عليك وعلى ولاياك.

        الرد
      4. 4
        هاني أحمد رامي

        بارك الله فيك وفي أمثالك

        الرد
      5. 5
        طارق كردي

        انتة راجل متخلف ايه يلا دي تحضر يعني ولاماذا تعني بالظبط
        جاهل

        الرد
        1. 5.1
          عبدالله جعفر

          اقرا الموضوع كويس ياسيد
          الله يسامحك

          الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *