بابكر سلك

عيسى عملها قبال ميسي


> الهدف المريخي الجميل المنقوض بالجزائر
> الحديث عنه لم ينته ولن ينتهي اطلاقا
> لانه اجمل هدف في دوري ابطال افريقيا
> واقيم هدف
> واهم هدف
> ولانه كشف مستوى التحكيم الافريقي المتواطئ
> ومستوى ادارة الكره في افريقيا والتي قادت لكثير من التخلف
> المهم
> راجعنا الهدف
> من خلف كوفي لما يلعب الركنيه
> لحسن الحظ اتصورت فيديو من الحته دي
> ومن قامت لمن دخلت
> لا مرقت
> لا اتقوست
> ولا اتلوثت
> ورجل الخط الذي نقض الهدف برايته
> كان ابعد انسان في الاستاد عن الحدث
> كان يقف على بعد تلاته خطوات او ازيد من راية الكورنر البهناك
> ما الاتلعبت منها الركنيه
> ومن موقعه داك يستحيل ان يري الكرة خرجت او تقوست ام تقمصت اي شخصيه اخري
> والحكم الذي استند إلى راية رجل الخط
> كان اقرب انسان للكره التي لعبها كوفي من الركنيه
> الهدف جميل وصحيح ورائع
> فقط الظلم هو ما افسد روعة المشهد
> والتهجد لسه شغال
> ودعواتنا في السجود شغاله
> بمبرز اللهم نشوف ملفوف فيهو من ظلمنا يا رب العالمين
> مركبه فيهو قسطره ومعاهم انبوبة معده مدخله بالانف
> مشهد نتمني نشوفو في كل من تواطأ علينا
> في كل من سكت وهو يعلم ان تواطؤاً يقع علينا
> المهم
> شيبون
> اصغر لاعب في دوري المجموعات
> وامهر لاعب في دوري المجموعتين
> شيبون سن صغيره وقوة بدنيه وقامه ما شاء الله
> زي ده البنفع افريقيا
> موش زي النايلو الهوا شايلو داك
> فقط نتمني نزاهة في التنافس
> عشان زي ناس شيبون ديل نشوفهم في اوروبا قريب
> المهم
> سموحه ايه الجاي تقول عليه
> ده فريق حله لا ليهو تاريخ ولا صولات ولا جولات
> سموحه اتولد بعد النسور بتاعنا
> لسه بسنن
> المهم
> لما تتواطأ عليك الجزائر
> فهذا اعتراف من الجزائر بقوتك
> وصدقوني القون بتاع شيبون لما ولج الشباك
> المليون شهيد قاموا تاني
> ومليون شهيد غيرهم استشهدوا
> في البلد دي
> الوقع من الكرسي زي روشا
> والكشح الحلو مر زي روشا
> والجاتو الدوشه زي روشا
> ده غير ناس تانيين
> واحد ماشي التهجد اتوضأ بالمصلايه وشال الابريق ومرق
> واحد لبس العراقي سيستم
> شفتوا ليكم عراقي سيستم؟؟؟
> الداير يشوف عراقي سيستم يقعد جمب هلالابي يوم المريخ يكون لاعب
> اول من شيبون يجيب قون
> تلقي الهلالابي داقي بالعراقي سيستم
> سيستم العراقي شين خلاص
> عشان الركب شينات
> خلقة الله عاد نسوي شنو
> المهم
> هدف نزار اكتر من عادي
> عملوا منو مليون قبة
> جاري من وسط الملعب براهو
> قابلوا واحد اكلو جري
> لأنو اساسا السموحابي تقيل وراجل كبير
> جاهو التاني شات في القون
> عملوا منها رواية
> قالوا ميسي وما ميسي
> صحي الطشاش في بلد العمي شوف
> ميسي ايه الجاي تقول عليه
> زي دي عملها عيسي صباح الخير بطح بيها الكنغو كلها في الواطه
> حاور اللاعبين واحد واحد
> اي واحد اتحاور رقد في الواطه دي
> وحاور الحارس لمن وقع علي قدومو
> وحاور الجمهور فردا فردا
> واسألوا علي الريح الهلالابي الكبير
> لما قال عيسي جاري والباك جاري وراه
> قلبهم قلب التقند للزراعه
> الوكت داك ميسي وين ؟؟
> الوكت داك ميسي ما اكتشفوهوا
> العملوا ميسي الليله
> عملوا عيسى سنة تسعه وتمنين
> واسألوا التاريخ والتلفزيون وعلي الريح
> ايها الناس
> قون شيبون كيف ؟؟؟؟
> اللهم المابقول الحق العيد ده يعيدوا هناك يا رب العالمين
> قون شيبون كيف ؟؟؟؟؟؟
> طيب شرف شيبون كيف؟؟؟؟؟
> المهم
> قول يا روشا الكورة اتقوست ومرقت بره الملعب ودخلت تاني
> يعني بقت ضربة مرمي
> في ضربة مرمي بتتلعب واللاعبين جوه خط طمنطاشر؟؟؟؟
> لاعبو المريخ يحتجون مع الحكم داخل الخط
> ولاعبو الجزائر يحتجون علي بعضهم البعض جوه خط سته
> وفيهم واحد شات الكورة جوه الشبكه تاني
> كيف في الوضع ده تتلعب ضربة مرمي ؟؟؟؟
> في قانون الكرة هل يمكن لعب ضربة المرمي وبداخل خط طمنطاشر طمنطاشر لاعب وحكم ؟؟؟؟؟
> افتونا يا بتوع القانون
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> قررنا كلنا مارقين مارقين ماقاعدين و مارقينا
> وتاني لومنا يا والينا لو جينا
> اقطع مع الكهربه والمويه لساناتنا لو عتبناها وجينا
سلك كهربا
ننساك كيف والكلب لسه بجي قبل العربيه والكهربا ما بتجي
والى لقاء
سلك


‫3 تعليقات

  1. و لسه مسلسل البكاء علي الهدف المنقوض ,,,,

    اخيرة ,,, اقرعو الواقفات

  2. جنبكم حكاوي …الجديد شنو .. طول ما مرتكزين علي عمر بخيت..الرماد كال حماد..والي اللقاء في سيكافا..مع تحيات الجزائر..