زواج سوداناس

المريخاب بيلعبوا بي فريق اطول لاعبيّه تحت (سطح البحر)


شارك الموضوع :

· الهلال افريقيا لم يخسر غير مرة واحدة اما في الدوري الممتاز فان مجرد الوصول لشباك الهلال اصبح (مستحيل)

· في الهلال مدثر كاريكا (كورة واخلاق) – وهو افضل من جسد المقولة على ارضية الملعب

· المصريون قالوا العملوا نزار حامد دا – نحن في حرب اكتوبر ما عملناه

· قالوا ليك علي جعفر من القعاد الكتير في (الجزائر) بقى حافظ ليه (21) كلمة فرنسية

· قبل ما ادخل ليكم في العمود (عشان ما انسى) والكلام يطير من رأسي … اقول ليكم امس بابكر سلك رجع عشرات السنوات زي (مامون ابوشيبة) وقال عيسي صباح الخير عملها قبل (ميسي).

· المعنى (نزار حامد).

· الجماعة فلسوا.

· طبيعي يا سلك (عيسي) يعملها قبل (ميسي) عشان الوقت داك ميسي ما كان مولود.

· يعني عاوز ميسي يعملها قبل الولادة.

· وان كانت ميسي ما بعيدة عليه.

· ممكن يعملها.

· انتوا (الجزائر) دي مالها دخلت عليكم كدا يا سلك؟.

· يوم داك مشيت فطرت مع مريخابي ..جاب لينا صينية الفطور بعد (التراويح).

· وبلح ما جابوا لينا.

· قلنا ليه دا شنو دا؟.

· قال لينا : واللـه نزار حامد مرق (الاكل) من نفسنا…الفطور دا لو جابوه لينا مع السحور بقى ما فارق معانا.

· في هلالابي النوع البقولو عليه ناس مامون ابوشيبة (حاقد) – قال لي شفت هدف نزار حامد في سموحة اجمل منو عدم احتساب هدف شيبون في اتحاد العاصمة الجزائري.

· حقارة كدا بس.

· اما اذا كنت عاوز تقارن يا سلك بين هدف عيسي صباح الخير وهدف نزار حامد بنقول ليك هدف عيسي كان هدف (جري) لعبت (السرعة) فيه دور كبير – وهذا لا يقلل طبعا من (جمال الهدف).

· جمال الهدف – ما جمال الوالي ..(عشان الامور توضح).

· اما هدف نزار حامد فقد كان بالعمق عديل كدا – ما طرف ..نزار شق الميدان قوة قلب ..ما جري ساكت… المهارة والقوة والجسارة لعبت في الهدف الدور الاكبر.

· المصريون قالوا العملوا نزار حامد دا – نحن في حرب اكتوبر ما عملناه.

· بعدين يا سلك ..هدف عيسي في افارقة (روش)..وهدف نزار في افارقة (مصريين) مفتحين ..صعب يجي قون فيهم زي دا.

· انت ما شفت المعلق المصري كان بقول على الشغل دا شغل (ماردوني).

· ندخل ليكم على الموضوع.

· بصورة مستمرة ودائمة اصبح يشارك في تشكيلة الهلال اطهر الطاهر ووليد علاءالدين.

· اثر اطهر ووليد في مباريات الهلال اصبح واضحا…فهما لا يلعبان فقط من اجل المشاركة.

· ويتواجد في التشكيلة الكلية للهلال عماد الصيني ومعتصم عبدالقادر.

· ولولا الاصابة لحجز محمد عبدالرحمن (موقعه) في تشكيلة الهلال ولاصبح الآن منافسا على القاب الهداف في البطولات المحلية والافريقية.

· وهناك (وليد الشعلة) المستقبل المشرق.

· كل هذه العناصر – هي عناصر وطنية ..صغيرة في السن ..وقادرة على العطاء لاكثر من عشر سنوات قادمة ان إلتزموا بالتمارين والانضباط والسلوك القويم والاحترافية داخل وخارج الملعب.

· لا نريد ان نعرج على (احمد بيتر) الموهبة التى يقصد تدميرها ..حيث لا متضرر من ذلك غير المنتخب الوطني.

· الهلال يحرس مرماه الآن حارس فيه كل مواصفات التميز والكمال ..حيث تبقى حاجة الهلال لاحمد بيتر محدودة – غير ان المنتخب الوطني هو الذي يعاني في حراسة المرمى.

· احمد بيتر حارس سوف ينفع المنتخب الوطني – وهو قادر على منافسة مكسيم وجمعة لو حلت مشكلته.

· لكن لأن الاتحاد لا يرى إلّا بعين (المريخ) – ابقى على مشكلة (أحمد بيتر) هكذا بدون حل.

· يزايدون عليه – من حين لآخر ويجعلوه في ميزان المزايدات والانكماش والانفتاح حسب متطلبات المرحلة.

· الهلال مثلما فيه هذه العناصر (المستقبلية) المشرقة – عنده كذلك عناصر تتميز بالقوة والخبرة والموهبة الكبيرة.

· في الهلال ما شاءاللـه كدا – وتبارك اللـه (غزلان).

· حيث (الطول) والقامات الابنوسية القادرة على ارهاب اي فريق ينازلها في المقبرة او في الكنغو.

· قوة وجسارة مع الرشاقة والمهارة العالية.

· كل الملاعب اضحت (مقبرة) لخصوم الهلال ان نازلوا فيها سيد البلد والزعيم الاصلي الهلال.

· في الهلال نصرالدين الشغيل …طول وقوة ..لو طوح يمين ..بقطع الموية..ولو طوح شمال … بقطع النور.

· وفي الهلال الصاقعة نزار حامد ..غزال السافنا الغنية ..واحد اهم مواهب الكورة السودانية في السنوات الاخيرة.

· وفي الهلال اتير توماس ..الابنوسي الهادي … افضل من يحسن لالعاب الهواء ..حيث اضحت (اجواء) الهلال مؤمنة تماما.

· سيطرة تماما على كل شاردة وواردة (جوا).

· وفي الهلال سيف الدين مساوي …خبرة وعقلية كبيرة واهداف حاضرة متى ما كان هناك حاجة لها.

· في مباريات كدا – ما بحلها إلّا سيف الدين – حيث اذا استعصى الهدف على الهلال كان سيف الدين مساوي في الموعد.

· وفي الهلال مدثر كاريكا …كورة واخلاق – هو افضل من جسّد المقولة على ارضية الملعب.

· مدثر كاريكا اللاعب (الرسالي) الاول للكورة السودانية.

· وفي الهلال (بشه) زي ما عاوز بعمل في الكورة.

· خفة وحرفنة …ومساحات.

· ممكن يخيط الكورة.

· وممكن يطلع ليك في حتة اصلو ما بتتخيلها.

· في الهلال ايضا مهاجم قوي – يحسن ألعاب الهواء ..وهو المهاجم صلاح الجزولي.

· ويملك الهلال حارس مرمى – هو بكل القياسات والمواصفات حارس (بطولات).

· حراسة المرمى في الهلال مع (مكسيم) بقت زي الحراسة في بنك السودان المركزي ..قرد ما بمر.

· وفي الهلال معاوية فداسي – ما بتفوت منو لو جيتو لابس طاقية الاخفاء.

· عناصر الهلال الآن كلها تتميز بالقوة والطول الفارع والمواهب المختلفة المشارب.

· لذلك نقول ان تشكيلة الهلال الحالية تشكيلة (بطولة) – هو يملك قوام الفريق البطل.

· حسابيا يثبت الهلال ذلك ..حيث لم يخسر الهلال في هذا الموسم غير مرة واحدة امام كي ام كي ..وهي خسارة قصد الهلال عدم تحاشيها.

· لعب الهلال افريقيا 8 مباريات …امام مدارس مختلفة وفرق عديدة ولم يخسر غير مرة واحدة.

· اما في الدوري الممتاز فان مجرد الوصول لشباك الهلال اصبح (مستحيل).

· كل الاهداف التى قبلها الهلال افريقيا ومحليا (5) اهداف فقط ..(قولوا ما شاءاللـه).

· هذه كانت مقدمة او مسحة خفيفة الى ان نناقش الامر بصور اعرض غدا ان شاءاللـه في (من الغلاف للغلاف).

· عاوزين نعرج بس على جماعتنا ديل.

· الناس البقوا (جزائريين) ديل من كترة القعاد الكتير في الجزائر.

· قالوا ليك علي جعفر من القعاد الكتير في (الجزائر) بقى حافظ ليه (21) كلمة فرنسية.

· بكري المدينة الى الآن حفظ ليه اربع كلمات فقط.

· بكري ما بقدر يحفظ ليكم اكتر من كدا.

· فريق المريخ الآن تعدى معظم لاعبيه سن الـ (35) سنة ..نقعد نحسبها ليكم ..وإلّا ما داعي للاحراجات.

· اظن ايمن سعيد براهو بقف دليل على ذلك.

· والمعز وعمر.

· وما عاوز اقول ليكم علاءالدين يوسف.

· ما نكتر ليكم في موضوع (الاعمار) دا – عشان نخلي ليكم حاجة تعيدوا بيها.

· الشيء الاخطر من ذلك ان معظم اطوال لاعبي المريخ لا تتجاوز الـ 150 سنتمتر.

· القصر كاتلهم.

· ما في فريق بحقق ليه بطولة بهذه الاعمار وتلك القامات.

· اي فريق يلعب امام المريخ لو ركز على العكسيات والالعاب الهوائية ممكن يجعل المريخ يخسر باسهل السبل.

· في المريخ عمر بخيت واكرا وايمن سعيد وديديه وبلة جابر وامير كمال وشيبون..كلهم اصحاب قامات قصيرة.

· ولا يختلف عنهم بكري المدينة ومصعب عمر وكوفي كثيرا.

· الجماعة ديل كلهم اطوالهم تحت (سطح البحر).

· عشان كدا اي فريق يلعب امام المريخ يركز على الموضوع دا.

· دا انتوا ح تتعبوا معانا.

· شوفوا القامات الافريقية القوية في الهلال الشغيل ونزار حامد وصلاح الجزولي وفداسي واتير توماس ومساوي وعماد الصيني وعبداللطيف بويا ومكسيم ..(واللـه ما شاءاللـه).

· اسود بس.

· اسود تاكل النار.

· حتى كاريكا وبشه وجوليام اصحاب قامات مميزة.

· الفرق كبير بين الهلال والمريخ.

· عشان كدا – انتوا ح تتعبوا معانا شديد.

· …..

· ملحوظة : ح ندق ليكم تاني في النغمة دي.

هوامش

· بس ما ح نكتر ليكم في الكلام – عشان ما تصلحوا الامور.

· خليكم في قصركم دا.

· وكلام القصيّر ما بتسمع.

· من هسع بنقول ليكم ..عشان توضح ليكم الصورة.

· الجزائر تاني ح تنضربوا فيها.

· غارزيتو الكورة مرقت ليه من نفسو.

· زولكم قنع.

· السنة دي ما عندكم عيد.

· قبل العيد وبعد العيد …هزيمة.

· شايف موضوع (سيكافا) قرب.

· بكرة نراجع المواضيع دي كلها ان شاءاللـه في (من الغلاف للغلاف).

· اصبروا انتوا بس.

· العيد دا نحن ما بنفتوا ساكت.

· مريخابي قالوا ليه رمضان انتهى.

· قال ليهم واللـه العيد ذاتو انتهى مع هدف نزار حامد دا.

· ……………….

· عاجل : يا ضفر في العيد ما تتقلوا في (الخبيز) منتظرنكم ناس (المليون شهيد).

شارك الموضوع :

تعليقات الفيسبوك

تعليقات


5 التعليقات

إنتقل إلى نموذج التعليقات

      1. 1
        مريخابي زعيم

        الهلال لم يحقق ما حققه المريخ وان طال الصفر

        الرد
      2. 2
        عبد الماجد عبد الرحيم

        يا محمد عبد الماجد انا لاعب كرة قديم .. لعبت فى الروابط .. وفى درجة ثالثة.. وفى اشبال الهلال ايام المدرب البرزيلى ناغويرا .. اليك بمجموعة فريق برشلونة العاتية جدا والتى حازت على كل انواع البطولات الخارق لفريق برشلونة
        1/ .. ميسى و شافى وخافيير ماسكرانو بيدرو ونيمار والرسام انيستا جلهم من ذوى القامات القصيرة . المهم فى لعبة ككرة القدم ان يقدم اللاعب داخل المستطيل كثير من العطاء والركض .. ومسالة الطول والقصر دى مسالة ثانونية .. ينبقى عندما نريد ان نسوق لفكرة حتى ولو باسلوب ساخر .. ان نتوخى فيها الحياد والموضوعية الفكرية العميق .حق لك ان تسخركيف تريد ولكن يحق لنا ان ننتقد اى اسهاب ضار بفكرة كرة القدم الرائعة … اخر حاجة مزمل اروع منك بكثير فى تناوله للقضايا حتى بسخرية الرائعة
        اخيرا ان رياضى فقط .. لك التقدير

        الرد
        1. 2.1
          abu aabid

          يا ود عبد الرحيم القامة والبنية الجسمانية ليها دور ودور كبير مسالة العطاء وما يبذله اللاعب ده شىء مفروغ منه لكن الذى يقدمه لك اللاعب صاحب البنية والطول والمهارة طبعا ما زى البيقدمه ليك اللاعب ذو النية الضعيفة فى اى تصادم قدتفقده لكسر او خوف من الالتحام والتحمل واللياقة امر حاسم فى كرة القدم ود عبدالماجد ده بى كل كتاب المريخ اجادة وابانة فصاحة وبلاغة ثقافة ودراية تسمتع معه فى كل حرف وفجاه تتفاجا بانتهاء العمود كما نتفاجا بالعيد ورمضان والخريف والمطر وسلك ومزاميزو وكابو اسكورب صحفيين بمناسبة كابو ربنا سلم وحفظك لكن الاقرع سلك ده بتلحقوا امات طه فلقة زى فلقة كابو دى

          الرد
      3. 3
        abu aabid

        المريخاب ديل عوارتهم تضحك شن حاب لى جاب عشان تقارت لى الكاسات النحن ساعين ليها بى كاسات سيكافا وشن جاب ابطال افريقيا البطولة الهلال فيها زبون معتد وانتوا بتطيروا منها من ال 64 اها تانى تقارنوا الهلال بيكم وبى كاساتكم دى لو نحن دايرنها كنا ما اديناكم فيها فرقة لكن نعمل شنوا نحن فريق شعاره االله الوطن الهلال همته عالية بالفطرة وما بيرضى بالرمم دايما همته عالية يعنى التبر ماهو تراب والتفاح ماهو دوم والعنب ماهو نبق وابطال افريقيا ماهى سيكافا

        الرد
      4. 4
        عبد الماجد عبد الرحيم

        استاذ abu aabid المحترم
        اولا اشكرك جزيل الشكر على تعقيبك الرائع .. اود ان احيلك الى مبارة بايرن ميونخ وبرشلونة فى الدور قبل النهائى لبطولة دورى ابطال اوربا هذا العام الجارى 2015 .. وكيف سقط مدافع بايرن ميونخ (جيروم بواتينغ) عندما حاوره ميسى كالخشبة ..الاول يمتاز بالطول والاخر بقصر القامة .. وكيفية انسياب الرسام انيستا من مدافعى اليوفى العمالقة وتمرير الكرة.. (بالمناسبة انا من مشجعى ريال مدريد)..هذه نقطة
        عندما نتحلق امام شاشة التلفاز او فى استادات كرة القدم لمشاهدة اى مبارة فى كرة القدم تتسع قلوبنا وعقولنا لكل شى .. اللعبة الحلوة . الخطة الرائعة . المراوغات الايجابية واداء الحكام .. بالمناسبة هذا على المستوى المحلى او الافريقى او العالمى .. وهذه اخرى
        الاخيرة
        نكتب فى اللغة ذو البنية الضعيفة وليس ذو النية الضعيفة …. كما ونكتب تقارن وليس تقارت .. ايضا معتمد وليس معتد.. ودائما وليس دايما
        مرة اخرى لك ودى وتقديرى .. ارجوك لا تغضب منى مزمل اروع بكثير فى كل كتاباته من محمد عبد الماجد

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *