منوعات

بالفيديو.. البروفيسور عوض إبراهيم عوض يكشف عن سر خطير: سيناتور بالكونغرس الأمريكي أكد لي أن أمريكا أنشأت أللوتري من أجل السودانيين.. وتريد منحهم الجنسيات الأمريكية


كشف الإعلامي السوداني المعروف البروفيسور عوض إبراهيم عوض عن سر خطير كشفه له سيناتور سابق بالكونغرس الأمريكي يدعي مستر جون ديفيد.
حيث أكد له المستر أن أمريكا قامت بفتح اللوتري من أجل السودانيين, وتحدث الإعلامي باللغة العامية السودانية وقال: يا عوض انا داير أديك سر وأنا الكلام ده بقولو احقاقا للحق – فيوم من الأيام قال لي يا عوض نحن اللوتري ده والله عملنا عشان السودانيين دايرين نجيب سودانيين لقيم كتيرة عندكم -قلت ليهو يا جون انت بتبالغ قال لي نو نو – أنا بحكي ليك وانا سيناتور في الكونغرس الاميركي – على مدى السنوات في اشكاليات حصلت بان الأمريكان خايفين من حكاية الاسرة ذات العائل الواحد بدون خال ولاعم ولاحبوبة دي بتعمل مع مرور الزمن ضمور في الجزئية بتاعت الذكاء في مخ الإنسان وخايفين تجي مرحله يكونوا كل الناس اغبياء لأنه السلوك الزى ده ضد فطرة الإنسان. وقال لي طبعا الدستور مابساعدنا عشان نفرض على الناس انو يقعدوا في البيوت , الاسر الابناء والعمات والخالات, فلجأنا الى حكاية اللوتري, مابنقدر نشحد السودان نقول ليهو ادينا ناس يصلحوا الامريكان أبدا, فعملنا اللوتري مفتوح للعالم كلوا لكن همنا نجيب سودانيين لسبب واحد انو اللجان العملناها تدرس المجتمعات الفي الدنيا عشان نجيب شعوب عندها المستوى بتاع التعامل مع الاسر وكدة وعشان تطعم الشعب الامريكي قال لي لقيناها في السودان لوحدو , باقي الدول الحكاية دي ماموجودة فيها فالسودان قال لي ضالتنا في التربيه الدايرنها تلقى الحبوبه قاعدة لامن تموت يدفنوها من البيت والجد قاعد وجد الجد ممكن يكون قاعد في البيت وياكلوا كلهم في صينيه واحدة , وفي رمضان يمرقوا صوانيهم وينادوا الغاشي والماشي والجيعان والعطشان ويمدوا الاكل قال لي بي فوق الحيطة. ده كلوا هو عارفو فقال لي قلنا السلوك ده بخلينا نجيب سودانيين عشان يبقوا امريكان وفتحنا اللوتري حتى قام قال لي ياعوض هسه كان قدمته حناخدك قلت لي ياجون انا ماشي اكلم اهلي انو يا اهل السودان لازم تفرحوا, انتو شعب فيكم ميزة دايرة امريكا تصلح بيها ناسها, فقال لي ياعوض انا حأنكر اني كلمتك دي الحقيقه وقال لي نحن ماممكن نرضى نقول دايرين الناس يجوا يصلحونا لكن دي الحقيقه اللي حقو انك تعرفها.

لمشاهدة الفيديو علي قناة فيديو النيلين أضغط هنا

ياسين الشيخ _ الخرطوم

النيلين


‫39 تعليقات

    1. قد يكون د. عوض صادقا في كلامه، بس الخواجه قاعد (ينجر) ساكت، لأنو في حقيقة بتناقض هذا الكلام وهو ان عدد سكانهم 300 مليون تقريبا، واللوتري بشيل ليهو الفين تلاتة بالكتير كل سنة، يعنى نسبة واحد في المائة ألف !!
      ديل يؤثروا كيف ! يعنى الواحد دا لو سوبرمان ح يؤثر بثقافته في مية ألف كيف !!
      غايتو الخواجة دا لو قاعد يقرأ الكلام الفاضي و(النبذ) اللي بيكتبوا (معظم) ناس اللوتري في مواقع سودانية مشهورة، (ناس منعم وعطرون) كان ح يوصي بحظر ادخال السودانيين خوفا علي اخلاقياتهم

    2. يازول (بروفيسور عوض) بطل وهم وتمحور حول الذات … يعني أمريكا غالبها تعلن عن فرص عمل ودراسة واقامة خاصة بالسودانيين بس قامت فتحتها لكل العالم علما أن نسبة السودانيين في العالم هي 0.5% ودول كتيرة في العالم مازالت تهتم بقيمة الاسرة ما السودان براهو … إذا كان فعلا قال ليك كدا يكون حنكك ساي …

  1. رجل اجوف وفرعة اعلامية كلمات والحان وتوزيع واخراج عوض ابراهيم عوض يعني زول منفصم 50 شخصية الله يشفيهو والله يرحم علي المك هو الذى زرع فينا هذا الداء ومن وقتها وعنها طوالي طلع فيها وهو لاهذا ولاذلك.

  2. الرجل دى اظنو وصل لي قناعة انو السودان دي كلو حجة فوق عضم!!!!!!!!!!!!!!!

  3. يشعر بنقص كبير عندو ( الانا ) كتيرة
    ومرة شايقى ومرة دنقلاوى ومرة جعلى ما عارف اخر قبيلة انتمى لها منو
    ليه الامريكان ما شالوه هو فى اللوترى ؟

  4. والل انتو البتتكلموا فيهو بسوء الظن الظاهر عليكم مريضين نفسياً
    رجل بيتكلم عن شئ حكاهو ليهو سناتور بغض النظر عن هو صحيح ام لا تجو وتقولوا كضاب هل يعني كل الكلام دا جابو من خيالو
    انا اعرف تماماً ان هذا المعهد الموجود في ماليزيا فعلاً اسس قسم اللغه العربيه بروف عوض ابراهيم عوض
    انتو الظاهر ما سودانيين

  5. والله الكلام دة أثلج صدورنا كسودانيين—ويجب علينا أن ننتبه لجودة وأصالة وغلاء معدنا—
    والله الكثير من الشعوب التي عرفت السودان والسودانيين لا تذكرهم إلا بالخير–لسلوكهم وأخلاقهم وترابطهم الاسري—
    لكن أرجو الا يقيم شباب اليوم السودانيين بالظروف الراهنة—الإقتصاد والحوجة أحيانا تغير السلوك—لكن يظل الالاصل الطيب والكريم والامين هو الجذور التي لا تتاثر ابدا—
    وعشان كدة كلام البروف عوض أكيد ما من نبع الخيال–ودمتم محافظين علي هذه الكنوز التي وهبكم أياها المولي عز وجل–
    ولكم تحياتي–

    1. تاريخ البرنامج[عدل]
      قدم قانون الهجرة الأمريكى لعام 1990 برنامج هجرة التنوع حيث يتم توفير 55 ألف تاشيرة سنويا بداية من عام 1995 في قرعة عشوائية بواسطة الحاسب الآلى. يهدف البرنامج إلى تنويع السكان المهاجرين ويستهدف الدول ذات معدل هجرة منخفض للولايات المتحدة خلال السنوات الخمس الأخيرة.
      تقوم الدائرة المختصة في كل سنة باستقبال الطلبات عن طريق الموقع الرسمي لوزارة الخارجية الأمريكية المخصص للبطاقة الخضراء في الفترة المحصورة بين شهر أكتوبر وشهر نوفمبر.
      الدول المستهدفة[عدل]
      الدول ذات معدل هجرة مرتفع للولايات المتحدة وتحديدا الدول التي هاجر منها أكثر من 50 ألف مهاجر للولايات المتخدة خلال آخر سنوات تصبح غير مؤهلة للتقديم في برنامج هجرة التنوع, في برنامج عام 2014 والذي ينحصر في الفترة من أكتوبر 2012 وحتى سبتمبر 2014 كانت هناك 18 دولة غير مؤهلة للبرنامج: البرازيل, كندا, بنجلاديش, الصين, جمهورية الدومينيكان, كولومبيا, الإكوادور, السلفادور, هايتي, الهند, جامايكا, المكسيك, باكستان, بيرو, الفلبين, كوريا الجنوبية, بريطانيا وجميع الدول التابعة لها (بإستثناء أيرلندا الشمالية) وفيتنام طبعا هذا هواليانصيب لكن البعض يفضل الهجرة القائمة علي نظام النقاط.
      الغش والاحتيال(منقول)

  6. البروفسور عوض ابراهيم عوص رجل اعلامي ….وموسوعه في مجاله كونه يلتقي بسناتور امريكي ماحاجه غريبه …ولا اظنه يكذب….وماقاله حقيقه كثير من علماء الاجتماع لهم راي ايجابي في حكايه الاسره الممتده وهذا الوضع لايوجد الا في السودان رغم ظروفه .

    1. انا معاك؟لكن حكاية الاسرة الممتدة في امريكا لايمكن تحصل لانو كل زول شغال المرأة الرجل الاولاد الصغار من 14 والاطفال في الحضانة وين للحبوبة او الجد مكان وماممكن تتركهم لوحدهم في البيت لانوا بيوت امريكا ونظام امريكا لايمكن ان يسمح لوجدوا اسرة ممتدة ؟ولو كان كلام عوض صحيح كان سمح للحبوبات والاجداد للقدوم فورا بدون عوايق؟

  7. بدايات التقديم لللوتري ونحن طلبة بجامعة النيلين كان طريقنا العبور أمام السفارة الامريكية وتم وضع إعلانات السفر لامريكيا وتحديد أغلب الدول الافريقية والعدد المطلوب من كل دولة وكان السودان أقل دولة في إفريقيا عددا فكيف يادكتور عوض إبراهيم يكون اللوتري خاص بالسودانيين

  8. نال الدكتور عبدالله الطيب درجة الأستاذية والبروفسيرشب بعد ان حصل على الدكتوراة بعشرين عام .. وبعد ان الف اكثر من 40 كتاب فى النقد والشعر واللغة وتفسير القرآن .. وبعد ان عمل فى اكثر من 12 جامعة فى كل قارات العالم .. الآن هذه الدرجة تمنح لكل من هب ودب .. هذا العوض نالها بعد إجراءه لكم لقاء مع كم فنان وفنانة .. سافر الى ماليزيا وعاد دكتورا ومن بعد كم شهر اصبح بروفسيرا .. البونى نالها بعد كم مقال حاطب ليل .. حسن مكى نالها وهو لا يملك شهادة بكلاريوس .. ما حكاه العوض عن الأمريكى كذب صريح و لا يمكن لأمريكى فى الكونغرس ان يتفوه بمثل هذا الكلام إلا اذا كان من أجل الدعابة فقط .. للمعلومية اللوترى الأمريكى يدار من قبل جهاز المخابرات الأمريكى وتخضع عمليات الأختيار لمفهوم يعرف ب B & RF .. بروفسور عوض هو امتداد لحالة الفوضى التى نعيشها وترتب عليها ظهور اسماء فى حياتنا سأل عنها الطيب صالح من اين اتت ؟؟ بروفسور عوض هو امتدا لأسماء على شاكلة الهندى وخوجلى والرزيقى وشيخ الأمين وفرفور وشيخ اسحق وبلة الغائب وبكرى وعبدالرحيم .. من اين اتت .. لا ندرى !!!

    1. والله يا شباب نحنا تهمنا قيم واخلاق الشعب السوداني وكل اناء بما فيه ينضح

  9. قال السودانيين حيصلحوا امريكا اجتماعيا ياخي بلاش فقر طيب صلحوا اولا بلدكم وامشي عمروا البلاد التانية ,, جنس وهم

  10. اشكر الاخ د. عوض بان بلدنا حباها الله بخصال طيبة ومتفردة ولكن قصة الامريكى هذه من الداعبه فقط لا غير وعليه نحن بحوجه الى العمل فى وطننا وهو افضل من امريكا ولكن اذا حقا لدينا ادراة وناس همهم الوطن وكيفية النهوض به سوف ينهض الوطن ولكن الاخ الامريكيى كنت اطلبه بان يعطى وصفه اخرى لكيفية الخروج من الازمه الاقتصادية فى السودان وكم بنسمع من سياسات اقتصادية بنفس الوجوة وجرعات تخديرية وليست بمصلحة الحال ما دام لم نتوصل الى اسباب الخلل الحقيقية وكيف فى وطن كل زول عاوز يبقى وزير ورئيس؟ وختاما يجب على كل الاحزاب مخافة الله فى حق الوطن والمواطن وافسحوا المجال للجيل الجديد والناس التى لديها رؤية فى خدمة الوطن والنهوض به بسياسة واضحة وتقشف فى السلطات العليا ووقف نزيف الصرف على مؤسسات الدوله من الكثير وهنا القائمه تطول؟ وهل يعقل مصلحة الجمارك تاخذ جمارك فى كرتونه مواد غذائية مبلغ 650ج مع اتعاب المخلص ووزنها 50 ك فقط؟؟هل دى دوله بتتطور الى الامام وحتى كل شىء مبالغ فيه وفلوس تؤخذ من المواطن ولكن لا توظف له فى خدمات والله المستعان ؟ وبلد معظم الوزراء والتنفيذين يمتطون السيارات الفارهة والاثاث الفخم وهل نحن حقا فى حاجة لكل هذه الاشياء ؟؟؟ وهل الوطن سوف يتقدم الى الامام بمثل هؤلاء ؟؟وبسياسة الاتوات المثقلة على المواطن فى الداخل والخارج وعدم وجود شفافية فى كل شىء وافضل شىء عمله الاخ الفاضل وزير المالية وحقا يجب ان يقلد وسام الشرف لوقفته مع الحق والابضباط والوطن محتاج لالف مثل هؤلاء ؟ والله المستعان وكنت اتمنى ان يحدث تغير فى سلطات الجمارك وهيكلنها الى تجديد الدماء فيها وجعلها مؤسسة خدمية للمواطن السودانى وتلبى طموحه فى الاداء السلس والرسوم الواضحه والجمارك الباهظة وحقا خلقت زعزعزة فى الاقتصاد ومن عوامل تدهور الاقتصاد ويجب ان يفهموا بان الجمارك ليست وظيفتها فرض رسوم جمارك بل حافظ للمواطن بعمل الصادر والوارد لانعاش الاقتصاد وليس قتله؟ بالرسوم العاليهوالخ والى متى يظل المواطن المغترب لا يستطيع بان يدخل سيارة له ظ وهل يعقل ذلك؟ وبشروط تعجيزيه ؟

  11. لكل القراء لهذا الخبر بصرف النظر عن الخبر صحيح او غير صحيح وانا اراه صحيح جدا لان البروف عوض ابراهيم عوض لاينقصه مثل هذه الحياكة الفطيرة لتلميع او لادعاء بطولات زائفة والناظر الى حال الامريكان هذه الايام يرى انفراجا كبيرا ابتداءا من اعادة اصدار كل التأشيرات من السفارة بالخرطوم ومشاركتهم لاسر سودانية لافطار رمضان وقيام بعمل افطار جماعى ودعوا الناس من الشارع ليشاركوهم وجبة افطار بمناسبة الرابع من يوليو (اليوم الوطنى لامريكا) وقاموا ايضا بتوزيع وجبات افطار للمارين بالشارع ساعة الافطار واخيرا وليس اخرا جعل ايام عيد الفطر والاضحى عطلة دينية رسمية فى البلاد

  12. واحد من احتمالين اما عِوَض هذا يكذب ويلفق او انه ساذج جدا. كل سنة نسبة السودانيين المقبولين هي اقل مقارنة بالدول الافريقية الآخري

  13. سنة 2001 صاحبنا سافر ماليزيا وقبل سفره صاحبه أعطاه رقم هذا الافاق حتى يعينه بداية الطريق في ماليزيا وعند وصول صاحبنا اتصل عليه وكان رد البروفيسير مسيخ وجارح غاية الجرح وخارج عن الادب والليافة مع شخص لم يطلب سوى المعلومات كما امره بان يرجع من حيث اتى وكان ماليزيا خلقت له الم تتذكر حبوبة في تلك اللحظة بعدين يعنى شنو سيناتور ولاسيناغنماية باين عليك سفنتى فايف

  14. الشيوعيون زمان قالو مسول سوفيتى زار السودان شاف ناس بياكلو في خيمة وسال عن ذلك واجابوه بان ذلك عزاء وكل ياتى بالطعام ويشاركون اهل الميت فقال بعدها انه لو وجد باس مثلهم لحكم العالم قرون فمابال السودانيين شغالين بالفارغة ومنهم من هو في قمة السذاجة وان كان متعلما او يدعى المعرفة قال سيناتور شوف ليك ولا خليك

  15. ى سوادنة مافى ليكم طريقة
    تطلقون الكذبة وتصدقونها وتبغون تمشو لبلد طاهرة لاتعرف النفاق عجبي

  16. ,والله ياعوض بقيت انسان ممل جداً حتى في برامجك بتتكلم 90% وضيوفك بتديهم فقط 10% يااخي والله كرهتنا التلفزيون كما جاي تقول لينا كلام طفل مايصدقوا رجاءاً احترم عقولنا ماتدخل علينا بالاوتار الحساسه في الشخصية السودانية.

  17. انا من سنة 2003 قاعد اقدم في الزفت ده ماحصل لفق معاي. يا ربي يمكن انا ما سوداني ههههههههه

  18. انا غايتو بعرف انو الخروف السواكنى مرغوب , لكن الانسان السودانى يطرشنا

  19. يا زول لوتري شنو ووهم شنو . والله انا جاتني ومشيت سنة 2008 , وقعدته وشوفت الوضع وجيت راجع بي ارادتي وخليته.
    امريكا دي حلم المواهيم بس العاوز الانطلاقه بس يمشي هناك. والله بعرف سودانيين كتار قعدو وافنو حياتم هناك وهسه اغلبهم تائهين وما عارفين يرجعو كيف وده غير الاسر الحاصله ليها مشاكل وفضائح هناك , وفي منهم البفتش فرص في الخليج هسه عشان يجي يربي اولاد تربية سليمه ويحفظهم .والخليج احسن منها كتيير . والعملنا من الخليج لو افنينا عمرنا كلو هنااك ما بنعمل ربعه .يكفي اننا بين اهلنا ووسط ثقافتنا .

  20. يا زول لوتري شنو ووهم شنو . والله انا جاتني ومشيت سنة 2008 , وقعدته وشوفت الوضع وجيت راجع بي ارادتي وخليته.
    امريكا دي حلم المواهيم بس العاوز الانطلاقه بس يمشي هناك. والله بعرف سودانيين كتار قعدو وافنو حياتم هناك وهسه اغلبهم تائهين وما عارفين يرجعو كيف وده غير الاسر الحاصله ليها مشاكل وفضائح هناك , وفي منهم البفتش فرص في الخليج هسه عشان يجي يربي اولاد تربية سليمه ويحفظهم .والخليج احسن منها كتيير . والعملنا من الخليج لو افنينا عمرنا كلو هنااك ما بنعمل ربعه .يكفي اننا بين اهلنا ووسط ثقافتنا .

  21. اديك الزيت …أنا سوداني في امريكا بي لوتري
    والله السودانيين البجوا هنا معظمهم زفت الزفت
    غايتو الحمد لله لسه في ناس محترمة بتجي
    لكن البقية اسأل عن البيتزا والديلفري والشغل ما عيب لكن العيب البعملوا فيو
    الهنود بجوا بشتغلوا مهندسين و اطباء ومدراء
    ونحن بيتزا و سواقة
    الحمد لله

  22. رحم الله امرء عرف قدر نفسه الشباب المامصدقين انو السوداني فيه صفات نادرة بس يطلعوا من السودان ويشوفو عشان يقتنعو انو نحن فعلا شعب نادر ومتفرد حتي وسط اصلنا الافريقي او العربي انا شخصيا لا استبعد هذا الفهم لدولة صرفت رواتب لعلماء الاجتماع كي يجلسوا فقط ليتدارسوا سلوكيات واجتماعيات شعبهم دولة تهتم بالتفاصيل الصغيرة لانها تعلم ان النار من مصغر الشررهكذا هي الدراسة البيئية والتنمية البشرية

  23. يمكن الخواجه داير هجين افريقي سوداني وسواها في الاخلاق وكده
    انا بقول جايز
    انا غايتو ممكن اسافر بس بنشرجي ما بشتغل
    فكونا بلا عوض بلا نفاق

  24. يا ايها الاحباش السودان اسمعو وعووووا .. واعرفوا قدر نفوسكوو.. انتم مجرد عبيد وخدم عند الامريكان اتباع الدجال والشيطان

  25. القادة الامريكان يتحدثون مع كل شخص على قدر فهمi للسياسة الامريكية
    واللوتري ليس من اجل السودان وحدة بل الغرض منه سرقة ابداعات العالم والدول الناميه على وجه الخصوص وكلام البروف اعلان مجاني غير مدفوع الثمن في السودان

  26. السلام عليكم ورحمة الله كلام الدكتور صحيح 100% الشعب السوداني شعب طيب وحنون وله ميزة الترابط الاسري واي دوله يتمني ان يكون له شعب مثل الشعب السوداني ((حلمي يادكتور ان اكون في امريكا))