زواج سوداناس

اتلومتـــو فينا


شارك الموضوع :

قناة أنغام.. من فضائتنا المولودة خديجة.. وبلا بسم الله.. ومصابة بكل أمراض الطفولة الإعلامية.. تمارس البشتنة والطرطشة الإعلامية في أبهى صورها.. قناة يتنازل الشعب السوداني عن جزء من عملتو الصعبة والتي كان ممكن نستفيد منها في أي سلعة ضرورية وخصوصا الأدوية يتنازل عنها عشان يدفعوها إيجار للقمر الصناعي وعن عملة محلية تتدفع لطاقم القناة وإنتاج البرامج وتسير عمل القناة.. ما قناة أنغام براها كل قواتنا بدون فرز.. عشان ناس أنغام ما يقولو شنفنا نحن برانا ما تراهن رفاقتنا قاعدات يسوطن زيينا.. تعاني أنغام من مشاكل تقنية وبرامجية وانتاجية وتجديد.. حنى ان جددو تقول اريتا كان بقت علي حالتها..

نسوان الدلوكة.. يا جماعة يا أهلنا يا عووووك.. انتو بتنشرو في غاننا وثقافتنا وتشتتو فيها علي العالم كلو.. اختارو حاجة كويسة.. من ثقافتنا فعلا غنا الدلوكة وغنا السباتة وغنا البنات.. لكن ما نفر الغنا القاعد اسمع فيهو دا.. حتى لو قبلتو بيهو اقعدو اسمعهو قبال تبثوهو.. شوفوهو بي يتبلع.. حتى المسجل منو أقعدو راجعوهو شوفو النضم البيجيب لنا النضم شيلوهو.. وخلو النضم الممكن يتلاك.. مع انو قليل لكن برضو بي ختارو.. ما ممكن أي واحدة تلصق ليها نضم وتجي تنبح عوك عوك.. ونمررو.. وتنجعص وتقول الغنية من كلمات وألحان (الأستاذ) وأنا من هنا بحيهو وبقول ليهو رمضان كريم وتصوم وتفطر على خير “وممكن يكون الاستاذ جالدو”.. غايتو قدر مافي زول وقف قدام كميرا وجا طاري زول قعد يحيّ فيهو.. مو كعب!!! اليحيو براحتهم لكن يقدمو شي سمح.. شاهدت كم حلقة من اغاني السباتة.. مطربات ما بعرفو جايبهن من وين؟ اشك في واحدة في الاتنين:- يا دافعات عشان يجن، يا اقتحمن القناة واحتلهنا وقعدن يغنن ويجدعّن.. من حق اي زول يبقى مطرب ويغني لكن كمان من حقنا نسمع لفنان..اقترح علي وزارة الاعلام انو اي قناة تلزمها بلجنة نصوص والحان خاصة بالقناة.. واي غنية فيها نضم ما تمر من اللجنة.. يعني لايعقل ان اسمع لفنان بي ينقط السين ويقلبها شين “وين شميري..وين شميري” حكمة ربنا يغني ويتبسّم مبسوط.. واقعد أنا أباريهو بي استيكة وأقعد أمسح في النقط.. والأعجب يكون مستضيفين معاهو شخصية اجتماعية ليها وزنها.. بعد ينتهي يقعد يشكر فيهو وفي صوتو وأداءه.. عشان هو صاحبو أو صاحب صاحبو أو صاحب ابوهو.. ووصوهو عليهو عليك الله أرفع من معنوياتو شوية.. وخليهو يتنفخ ويطلع زيت معنويات المشاهدين!!

في النيل اللزرق “هذا الموسم شدني برنامج أغاني وأغاني علي غير العادة.. حتى أصبحت حريصا أن أشاهد أي حلقة” حلقة أغاني وأغاني عن عثمان حسين.. كانت تكون أجمل لو كانت سميرة دنيا ضيفة عليها.. وخلوها تغني لعثمان حسين.. وناس البرنامج الأصليين يشيلو بس! بالرغم من اجتهاد المطربين الذين حاولو أن يغنو لعثمان حسين والله ما قصرو وسو قدرتهم.. لكن لا يجيد غناء عثمان حسين إلا عثمان حسين و سميرة دنيا!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *