رأي ومقالات

بروفيسور بوب: حتي لو عائدات الذهب ألف تريليون دولار فهذا لا يعني أن مشاكل السودان سوف تحل


الأبناء والأشقاء الأفاضل
السلام عليكم ورحمة الله وبركاته
أتت الأخبار بأنباء مبشرة عن وجود الذهب في السودان
نعم هذا مؤكد ومعروف لكل من يفتح محرك بحث جوجل الذي يقدر أن الذهب موجود في خمس مساحة البلاد.
ولكني أعطي معلومة يعرفها كل (((دهابي))) وهي أكثر من هذا.
أي موقع جغرافي سألت عنه في السودان به ذهب أي في كل الولايات.
أكثر من هذا توجد معادن أخري وأحجار كريمة و……بترول وغاز.

لكن كل هذا لا يعني أن المواطن السوداني سوف يعيش حياة كريمة، بل ولا حتي حياة الكفاف، بل الأقرب هو أنها ستكون الفاقة والمسغبة والحرب والتفتت.
لا نعاني مشكلة موارد وعندنا الأنهر العظيمة التي تجري علي سطح الأرض وفي باطنها. ومع ذلك فإن انتاجنا الزراعي دخل ((حوش البقر)) وجف الضرع وقتلت الجدادة التي تبيض ذهبا وجفت الآبار التي تنتج ماء الحياة.

قبل البحث عن الشركات التي تشاركنا في لقمة العيش، أي الموارد التي ينتظرها المواطن، ثم تطور طموحها إلي ((فرتكة)) البلد والانفراد بهذه الموارد، بل احتلالها، لابد أن ننظر غلي اعادة بناء المنظومة الأخلاقية السودانية Superstructure والتي تستمد منها ادارة الموارد والحكومة والدولة كيانها.

قدرت قيمة احتياطات الذهب ب تريليون و702 مليار دولار…وأنا أقول أنه حتي لو كان ألف تريليون فهذا لا يعني أن مشاكل البلاد سوف تحل. بل أقول أنها سوف تكون ألف تريليون دولار سببا لكي ((تتفرتك)) البلد إذا ظلت النظرة النهمة الشبقة إلي المال بدون أخلاق تحكم كل تصرفاتنا بدون اصلاح النفوس.

حسبي الله ونعم الوكيل
حسبي الله ونعم الوكيل
حسبي الله ونعم الوكيل
بروفيسور عصام عبدالوهاب بوب


‫24 تعليقات

  1. صدقت ايها الدكتور الازمة في الموارد ولا في الدين لكن الازمة في الاخلاق متدينون من غير اخلاق لذلك لافائدة مهما كثرة لان الجشع غطي علي اي شي

  2. هذا عطاء من الله… لان السودان البلد الوحيد الفتح ابوابه للاخوه السوريين المسلمين.

  3. ي بروف قول لينا كلام يطمن خليك متفائل وكدة ، يعني المليارات دي كلها ح نمرق منها ميطي ؟؟؟ أوكي ، لو كلنا بقينا مؤتمر وطني كدة كييييف ،؟؟؟ مفترض مشكلتنا تتحل ولاّ تاااااني ح تشبكونا مؤتمر وطني قبل الدهب ولاّ بعد الدهب

  4. إنتو يا ناس السودان أنا عاوز أسألكم البلد صحيح خربت للدرجه دي لا مويه لا كهرباء لا رغيف لا ووووو ! و لا بس الإعلام و المواقع الإلكترونيه ما قاعده تصف الواقع و أنحنا السودانيين نميل الی الولوله و نعمل من الحبه قبه ! أنا عمري سبعه و أربعين سنه يعني خلاص expired و يااااا دوبك حوشت حاجه كده بعد غربه أربع طاشر سنه في السعوديه ! الواحد عندو الرغبه يرجع يستقر في السودان و يتزوج يا دوب و يكون جنب الوالده و الأخوان و يعمل مشروع صغير كده يطلع منو مصاريفو ! لكن ناس السودان أي زول يقول ليك ما ترجع و تدخل النت تخاف عديل كده ! و الله الواحد إتحير ذاتو كرهت السعوديه و عاوز أرجع السودان و متردد خايف أخسر المبلغ البسيط اللي لميتو بعد أربعطاشر و أخسر الوظيفه اللي بتوفر لي دخل ثابت و ببعدين نخش في مشكله كبيره ! ساعدونا يا الناس. الموجوده في الداخل خاصة الناس اللي كانت معلقه زي أنا و رجعت السودان إستقرت ! و جزاكم الله خيرا

  5. و برضو بعد خلاص إستقريت في السودان شنو مشروع تجاري ناجح يدر دخل كويس و ثابت ! بي رأس مال صغير كده حوالي تمانيه ألف دولار !
    أفيدونا يا أخوان و أنقذونا تعبنت خلاااااص من السعوديه و إشتعل الرأس شيبا ! إشتقت لي أمي و الأسره و الأصحاب و الحاج يوسف سوق سته. !!!

  6. يا أخونا مغترب انا مهاجر لأكثر من عشرين عاما وكنت أمني نفسي وأتوق عشقا لأرض الجدود والأهل والأحباب وكونت الحمدلله ثروة ممتازه جداً ودرست في بلاد العم سام وتزوجت من سودانية في بلاد العم ساه وأنجبت والحمدلله وعمري نفس عمرك وكنت في السعودية ومنها هاجرت لأمريكا حققت أشياء في بلاد تحترم الانسان والإنسانية حتى الحيوان يحترم بل ويعالج على عدت الى ارض النيلين وليتها ما فعلت كل شي تغير وتبدل الحال لم يعد الانسان السوداني اللي تركتة قبل هذه السنون هو الانسان السوداني الأصيل تبدل الحال الكذب السمسرة النفاق الدجل الشعوذة النيمة عادات دخيله على المجتمع السوداني الدراسة العلاج الخدمات البييه تردي فظيع في كل شي الكذب السمنة لمعظم وغالبية الشعب والله عدت والأولاد معي ولم يطب لهم المقام وعدت مره اخرى لبلاد العم وجدت الابتسامة من المطار وترحيب باله ده لوطنك ( طبعا وطن بالتبني) والمجال لايسع والله بالمكان كتابه كتاب كامل عن واقع الحال ولا أخفيك سراً بان امام احد المساجد الكبرى قلت له عن واقع البلد وسالت عن فتوى العوده لبلاد أمريكا قال لى اذهب هنالك من يحتاج ان تدعو فيهم لك الأجر

  7. النظره التشاؤميه لحد اليآس عند بروفسر عصام بوب لتنميه السودان وتقدمه وازدهاره لاتخفي علي احد !! فهو ناقم علي الوضع السياسي ولايرجوا خيرا من السلطه الحاكمه, ولايتوقع من ان تنصلح اخلاقيات موظفي الخدمه المدنيه او الاحزاب او الفئات المشاركه في الحكومه القائمه !!وحتي استغلال موارد معادن باطن النادره او غيرها من زراعيه بشقيها الحيواني والنباتي لايمكن ان يحقق الاهداف التنمويه وان بلغت بلاين الدولارات لان (النهمة الشبقة) إلي المال بدون أخلاق هي التي تحكم الموارد والتصرفات .
    والنظره التشاؤميه هذه هي التي تحدد مصير البلاد وتهدد وحده ترابه, وأن المواطن السوداني سوف لن يعيش حياة كريمة، بل ولا حتي حياة الكفاف، بل الأقرب هو أنها ستكون الفاقة والمسغبة والحرب والتفتت.
    اننا نوافق البروف بان الفساد وباء عضال ,ومعول هدم ومحق للثروات والقدرات ومعطل للتنميه ويجب محاربته وازاحته وابعاد تاثيراته السالبه!! ولكننا نختلف معه جذريا في النظر للامور بهذا المنظار القاتم الذي لايري حتي بصيص الضوء في نهايه النفق, لانها بكل بساطه تتطابق مع الاهداف النهائيه لاعداء الامه ,وتنظر في النصف الفارغ من الكوب
    ولاتقدم حلولا ولا بديلا ولامنهجا وتكتفي بالانتقاد السلبي وتنتهي بالنهج التشاؤمي البحت.
    السودان يتقدم للامام ولو بصوره لاترضي طموحاتنا وامكاناته وموارده الهائله والمتعدده ,ومعلوم للجميع مسببات تخلفه وهي تكبيله بالقيود والمقاطعات الاقتصاديه وحجب التكنلوجيا والتقدم العلمي من اعداء الخارج والخلافات الاثنيه والحروب القبليه والفقر والمرض من اعداء الداخل!! ولكن وبالرغم من الاستهداف وتفعيل ازمات الداخل يمضي الي الامام !! وليس هناك ادل علي فشل الاعداء واتتصار اراده التقدم من البدء في استغلال الموارد التعدينيه بالشراكات الاوربيه والسوفيتيه والصينيه والعربيه !! والشروع في استغلال الموارد الزراعيه والتوسع في بعض القطاعات الانتاجيه الاخري!! وهذا مؤشر جيد لان سبب مشاكل السودان تنبع من عدم استغلاله لموارده الغنيه والمتعدده.
    وجاء في الاثر ( تفآلوا بالخير تجدوه ). وكان رسول الله يحب الفآل الحسن .ويقول الله تعالي في محكم التنزيل وان ليس للانسان الا ماسعي.
    فلنتوكل علي الله ونسعي ونعمل وفقا للمنهج الاسلامي الوسطي, وسنصل الي الي مراتب التطور والرقي لامحاله لاننا شعب له تاريخ مشرق ومنبت للحضارات الانسانيه.ودنبق.

  8. يا مغترب اسمعها مني نصيحة الزم رغبتك وتزوج قبلك ولو ختيت السودانيات يكون احسن
    أهلك برهم بالمصلريف ولو قدرت تساعدهم ب عمرة أو حجة كويس
    تعرف يلمها النمل وياطاها الفيل دي قروشك لو جيت السودان

  9. بوب. . وش النحس.. الله لا يطمئنك..قل خيرا او اصمت..نفهم مشاكل السودان حتتحل فقط لمن تبقى وزير مالية. . دي بعدك..

  10. الكلام ده اذا ما ضر ما يفيد لان الدكتور قال كلام عام يمكن اي واحد زهجان يقولو فهل يريد ان يقول انه لا امل لنا ما دمنا سودانيين ام ما هو الحل بنظره ننتحر ام نغادر كلنا الى غير رجعة .. طبعا من وجهة نظر المعارضة الكلام ده مرحب به و لكن لاحظو هو يتكلم عن السودانيين كلهم و ليس الحكومة ..
    يا اخي تذكر ان بلادنا رغم ظروفها ما زالت قبلة للجائع و الخائف من كل دول الجوار تقريبا.. المهم لا بد من اذكاء روح الفخر بوطننا و التفاؤل بمستقبله الذي هو انشاء الله مشرق ىاذا كفانا الله شر المثبطين و المخذلين.

  11. والله يا أهلنا البلد دة لو دايرنها تنطق لابد أولا بالأخلاق ودة تعاليم ديننا الحنيف ومن ثم التربية الوطنية وتعليم حب الغير كحب النفس لانو ببساطة ذهبو الكيزان وجاء غيرهم في النهاية كلنا تعلمنا علي حب النفس ومل البطون والجيوب وبعد دة حريقة في السودان ودة الحاصل في الخدمة المدنية حتي علي مؤسسات الدولة الواحد همو نفسو وبس وكيف يغني وما همو انو قاعد في منصب سوف يسأل بة أمام الله قبل الناس

  12. يا أخ مغترب في أمريكا ما هو ده الشئ اللي مخليني متردد أي زول يقول لي نفس كلامك ! السعوديه بقت ما مجديه و ما في توفير الإيجار و المصاريف و الباقي ناس البيت في السودان و خلاص نهاية الشهر تطلع خالي الوفاض تقريبا! ما في توفير و غربه و الناس فاكره إنو أنا نايم في العسل!
    يا أخي رشدي الی متی و أنا هسع داخل علی السنه ال خمسطاشر الی متی ؟؟؟؟؟؟
    يا أخوانا المعلقين بروفسير بوب من علماء الإقتصاد في السودان و هو حاول يبسط الأمور قال أنحنا بنفخ في قربه مقدوده ! ما دام عندنا هاويه سحيقه إسمها الفساد المالي و الإداري و الأخلاقي عمرها البلد ما ح تنصلح ! مهما جاتنا قروض أو طلع دهب أو بترول كلام منطقي و ما في داعي للإساءه و اللعن

  13. (( البلد إذا ظلت النظرة النهمة الشبقة إلي المال بدون أخلاق تحكم كل تصرفاتنا بدون اصلاح النفوس.))……..وهذا أُساس البلاء الذي إستحكم في الكبير( المسؤول المُتنفِذ) قبل( الموظف الصغير)).

  14. التحيه لكم جميعا الواحد دائما يتفاءل بالخير وربنا هو الرازق و أن شاء الله يعم الخير كل ارجاء السودان لينعم به المساكين و الأيتام و الضعفاء و الأغنياء كذلك و بالله التوفيق

  15. اخوي مغترب السعودية الأهل مهما تفعل تجاهم هذا الواجب لكن ينبغي لك ان تحسب الأمور بدراسة دون العاطفة في حدود المعقول والدين يسر ما تيسر لك وانت ادري بحال جيبك لا الأهل لأنهم وكما ذكرت النوم في العسل برمجها برمجة كمبيوتر أولى فأولى والمبلغ الثمانية الف دولار فرضنا حوالي الثمانين الف بسعر اليوم لا يسمن ولا يغني من جوع ليس بالمبلغ الكبير حال السودان اليوم الاقتصادي متردي وكل شي مرتفع او بمعنى اخر اذا وجدت من تثق فيه كثير الثقه وهذا نادر جدا لكن بقدر المستطاع رتب اوضاعك في السعودية تماماً واحسب خطواتك تماماً ولا تأخذك العاطفة والاندفاع وعليك بالمهله وعليك بالاستخارة الشرعية وفكر مليون مرة والله هذه النصائح من واقع التجربه وقيل اسأل مجرب ولا تسال طبيب

  16. يا ود نبق السودان يرجع كل يوم للخلف منذ 89
    ولكن انتمائك الحزبي يمنعك من الاعتراف بهذا
    لا تأتي وتستدل بالهواتف النقالة وامور التطور البشري العالمية لصالح الانقاذ
    غير كده هم لصوص واخوان شياطين وحتى لو صلحوا البلد يجب التخلص منخم لانهم عبدة ابليس

  17. يا مغترب
    الزم اغترابك واذا جابتك الظروف مطار الخرطوم فادخله برجلك اليسار وتعوذ بالله من الكيزان والكوزات والعساكر والعسكريات واتزوج وسوق مرتك ولا ترجع الا للشديد القوي

  18. كل مغترب امه حية يكثر ليها من الزيارات ويحاول يعمل ليها اقامة لأن الجنة تحت اقدام الامهات