داليا الياس

كسور وبواقي


عيش متوقع من الدنيا تشوف وتلاقي..
ولو حاولت تجمع ريدك من خلق الله،
بيطلع ليك كسور وبواقي..
في الحاسدنك
في القاصدنك
في الراصدنك
وناس بتنافق باسم الريدة
ويا ما كتير وكتير كارهنك..
وفي التاكلين أحزانهم فيك
إلا كتير أفراحهم منك…
وفي البتبسم
وكم قال ليك بهواك بتنسم
إلا وراك عقرب لادغنك..
وفي التبنيلو مسيد الريدة
يزرب جنو يزيدلك جنك..
وفي التديهو الحيز في فكرك
ويسلب عقلك..
وعادي اتوقع خانتك داش ولا فاكرنك
وخت في بالك
انو الدنيا كتير بتوري
وماتتهز لو خابلك ظنك
وناس بتقصر كم في حقك
برضو وراك أسفا لايمنك
وعادي تلاقي البحزنو فرحك
وبفرح لما تكون متشاقي
ولو حاولت تجمع ريدك من خلق الله
بيطلع ليك كسور وبواقي
***********
وعادي اتوقع من خلق الله الفعل الشين
بي مرواد الحب والريدة
ياما في ناسا طابزة العين
وناس تنعد بصوابع اليد
ديل الخوة التملا العين
وبين الشامت وبين الكاره
ياما تلاقي في ناس حاسدين..
عمداً ناس تطعن جواك
كم بتعزرو ما قاصدين
بالبهتان والقول الزيف
عاااادي بيحلفو بسم الدين
في البتنكر ليك لفضلك
ديل بالجملة كتاار راقدين
ديل شاربين من دمك ياما
وعطشو قلبك وإنت الساقي
ولو حاولت تجمع ريدك من خلق الله
بيطلع ليك كسور وبواقي
**********
برضو في ناس جواها جميلة
تعطش شان تسقيك من نيلا
ناس بتلاقي خطاك التائهة
بي تحنانا وتبقى دليلا
ناس تبقالك تاجك وعزك
وتحلم يوم لو تبقى إكليلا
ورغم متاهة الدنيا ضيقى
يمشو معاك خطاوي عديلة
وخت في بالك
شأن ما تمر بنقاوة خلقو
كان لابد ما تمر بحثالة
وذي ما الدنيا تحرم ليك
عادي بتبهل ليك حلالة
إنو الناس
القالت عنك وشالت منك وخيبو ظنك
بينك بينهم الله تعالى
وفيك جبال سانداها عزيمة
ما بتندك يوم بزلزالة
ولسة في ناس بتريد في الله
سوقه خطاك وقوي وصاله
والياباك كتير جماك
نفسا تابه دي مالك ومالا
وبرضو في ناس جواها في طيبة
إلا دواخل الخير مرات
تحمل في طياتها مصيبة
ونفس الناس الطيبو خاطرك
عاااادي اتوقع قلبك أعيبه
ناس تاباك وانت تقرب
وناس تابها وليك قريبة
وناس من سككك عمدا ترحل
إلا السكة هي عمد تجيبه
ناس كارهنك ساي دون سبه
وانت مناك يوم تبقى حبيبة
وناس تدفقلك سم في الريدة
وانت البلسم باقي طبيبة
وناس وسواسه وناس خناسة
ناس لضرك يكوسو كواسة
وناس بتخصصو ليك في الغيبة
ناس تهلك جواك دون إذنك
وبرضو بتدفع ليها ضريبة
ولسه بيحلمو ياخدو الباقي
ولو حاولت تجمع ريدك من خلق الله
بيطلع ليك كسور وبواقي
الشاعرة/ امتثال عبدالله حسين