زواج سوداناس

كوفي شوب


شارك الموضوع :

> امس اتكلمنا عن جبنة اوكرا
> وقلنا معناها سكر زياده
> وممنوعه علي ناس السكري
> الخواجات ما بقولوا جبنه
> بقولوا كوفي
> يجيك خواجه متضايق
> والمره قافلاها معاهو
> كربتك كربتك كربتك بالحصان
> يصل محل القهوه
> يربط ليك الحصان في الباركينج
> ويلز ليك الباب البفتح جوه وبره داك
> الباب القصير زي العراقي
> يخيم صمت على الجميع
> الناس القاعده كلها تعاين ليهو
> في سرهم يقولوا اللهم اجعلو خير
> صاحبنا يمشي طوالي علي ست الشاي
> تقول ليهو «تي»؟
> يقول ليها دي حالة تي؟؟؟
> كبي كوفي
> لما يشفطها ليك يتغير من حال لي حال
> كوفي زبط المزاج
> باقي الخواجات القاعدين لمن يحتاروا
> يقوموا يقولوا لي ست الشاي ادينا كوفي
> تقول ليهم كوفي وااااحد وشالو الكاوبوي داك
> كوفي متعه
> مهارة وفن وادب
> لذا من يبحث عن المتعه
> يمشي ست الشاي
> يقول ليها جبنه اوكرا
> ولو حبشيه ما بتعرف عربي
> يقول ليها كوفي
> المريخ عالم ممتع
> عالم خيال جميل
> خيالو واقع وواقعو خيال
> جبنة اوكرا وكوفي وغرزه
> نحمدك يا رب
> كل اسباب الكيف عندنا
> ايها الناس
> هلالابي شاف اوكرا يوم هلال الفاشر
> قال لي بالله ده الاحتياطي بتاعكم؟؟
> قلت ليهو لا ده الاحتياطي المركزي
> الابداع متوفر في المريخ
> الكنبه والتشكيله وااااحد
> شكراً لله كثيراً على هذه النعمة
> المهم
> اليوم نرحل للفاشر
> لننثر فنوننا عليها
> فشفوت الفاشر اولى بالمتعه
> وروابط المريخ بالفاشر من فيس وواتس اكبر روابط المريخ في السودان والعالم العربي
> من حقهم ان يستمتعوا
> من حقهم ان يطمئنوا على مشوار المطار
> ومن حقهم ان يتقدموا الصفوف يوم المطار
> نتوقع لها مباراة قويه ورائعه
> لأن مريخ الفاشر كبير
> وشفت ومجضمها
> وعقبال مريخ نيالا
> فدارفور بتتعرف بالاسر الكبيره والممتده
> وليس بغريب علي السلاطين
> انهم ابناء سلاطين وامهاتهم ميرمات
> ديار للكرم مفتوحه علي مصراعيها
> اسر كريمه
> لذا كلهم مريخاب
> لكن النصر حليفنا بإذن الله
> لنبعد الشقه عن الورانا
> الناس الورانا تعبانه
> وما مفروض تكون ورانا
> بالمستوى كده مفروض تكون ورا الورانا
> المهم
> اكتب قبل مباراة هلال الابيض
> فريق قوي
> واتوقع لناس عنكبه شنكبه شديده
> بس اتمني ان يكون التحكيم قد اعطى لكل صاحب حق حقه
> يكون ما اخطأ
> عشان مافي زول يتظلم
> ايها الناس
> على القطاعات الجماهيريه ان تعد العدة من اسي
> سطيف ما هين
> ومباراة سطيف تعني لنا المطار
> لأنها تعني التأهل
> والتأهل هو المضي قدماً بشارع المطار
> المهم
> هلالابي قال لي سطيف بطيركم
> قلت ليهو قول طيرنا لا قدر الله
> وقابلكم
> بتمشوا الجزائر كيف؟؟؟
> والله الا بالانتربول
> يودوكم بالانتربول للجزائر
> قال لي كان كدي اخير نطير نحنا
> قلت ليهو وراده
> ما تستعجل
> ولما تطلع الحوش فرش سرير واحد
وارقد فيهو
> السرير التاني السنه دي ما عندو زول
> زولو في المطار بكون
> ولما الشمس تجيك
> دخل فرشك
> وحصلنا في المطار عشان تتفرج
> اقيف جمب جاد مع امجاد
> كان في زول سألك
> قول ليهو نحنا تبع بكري المدينه
> ايها الناس
> احر التعازي للفريق طارق الامين العام في وفاة والدته
> جعلها الله من اصحاب اليمين وادخلها فسيح جناته
> كما نهنئ الاخ علي الفادني بعقد قران كريمته
> وبيت مال وعيال يا فادني
> ايها الناس
> ان تنصروا الله ينصركم
> اها
> نجي لي شمارات والي الخرتوم
> والينا
> كلمنا وقول لينا
> الباعوض ده بقي هوائي يا والينا ؟؟؟
> مويه مافي والباعوض حايم فينا
> الباعوض ده بودينا يا والينا
> وكان مشينا
> وين تاني تلقوا ناس تحكموهم ونلقي لينا زول يتحكم فينا؟!
سلك كهربا
ننساك كيف والدنيا صيف والكلب واقف في القيف ونحنا في صف الرغيف
والى لقاء
سلك

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *