محمد عبد الماجد

يا زيكو (الجري) لا يسقط بالتقادم


بعد (طلوع) الكورة في مباراة الاتحاد والمريخ – طلعوا يحدثونا عن (طلوع) زيكو في مباراة الهلال والمريخ

الواقعة كانت سنة 1995 يعني بعد استقلال السودان بي (39) سنة … زيكو (منتصر الزاكي) خرج الآن عشان يقول انا ما شلت الكورة

في مليون لاعب ارتكب (ضربة جزاء) في مباريات الهلال والمريخ وفي مباريات ريال مدريد وبرشلونة..لكن في لاعب واحد شال الكورة واتخارج وهو (زيكو)

واضح ان زيكو بيحاول ان (يتحلل) من الواقعة وان يجمّل تاريخه من اغرب واقعة في تاريخ كورة القدم ليس في السودان فقط بل في العالم كله

*****************************************

· بعد عشرين سنة (ربع قرن إلّا شوية) – طلع منتصر زيكو ليقول انو ما جرى وما شال الكورة.

· طلع – ما طلع..(لقيتو الحكاية ماشة كويس معاكم).

· قمتوا عملتوها كبيرة المرة دي ..وقلتوا زيكو ذاتو ما (طلع).

· بعد (طلوع) الكورة في مباراة الاتحاد والمريخ – طلعوا يحدثونا عن (طلوع) زيكو في مباراة الهلال والمريخ.

· نهائي ما شال الكورة.

· نهائي ما طلع.

· زيكو دا كان قاعد وين؟.

· عشرين سنة ساكت مالو؟.

· زيكو لمن اتكلم وقال كلامه (المشاتر) هذا ..لم تنشره حتى صحف المريخ وانما قاله في صفحته على الفيس بوك.

· يعني ناس المريخ كلامك دا ذاتو يا زيكو ما مقتنعين بيه.

· لكن ما مشكلة يا زيكو.

· ما بيناتنا (جرية).

· فداك (900) كورة – يعني شنو لو شلت الكورة؟ ..بتحصل في ارقى العائلات.

· نحن الهلالاب قاعدين نتخيل ساكت يا زيكو …بنتوهم اشياء لا وجود لها.

· لكن الغريبة – المريخاب هم ذاتهم بشاركونا في هذا (الوهم).

· وهم مقتنعين اكتر مننا ان زيكو شال الكورة وقام (جاري) ..ولولا (السواري) – كان زيكو مرقها للدمازين.

· بالمناسبة وين الكورة؟.

· الاتحاد قال عندو كورة (رايحة).

· زيكو طلع بعد عشرين سنة عشان يقول لينا (الجري دا ما حقي).

· طيب (الجري) دا حق منو؟.

· يا ربي الشال الكورة داك منو؟….عثمان ود الشلهيب؟.

· الشال الكورة منو؟.

· الطيب ود المفتيل؟.

· عاوزين نعرف.

· الواقعة كانت سنة 1995 يعني بعد استقلال السودان بي (39) سنة … زيكو (منتصر الزاكي) خرج الآن عشان يقول انا ما شلت الكورة.

· الكورة اتشالت براها.

· انا ما جريت.

· الجري دا محمد المهدي الفادني؟.

· شالها التاكسي التعاوني؟.

· شالتها (امجاد)؟.

· زيكو على ما يبدو ان (الواقعة) مؤثرة في نفسياته وعاملة ليه (ازمة) ..في كثير من الحوارات والنقاشات حاول زيكو ان يتهرب من الواقعة وان يتملص من الموضوع.

· الواقعة ظلت تطارد زيكو ..وظلت نقطة سوداء في تاريخ منتصر زيكو…ما ان يذكر زيكو إلّا يذكر هروبه.

· الآن اي مريخابي لا يستطيع ان يجيب سيرة (زيكو) رغم الاهداف الكثيرة التى سجلها زيكو في شباك الهلال.

· كل هذه الاهداف اتمسحت بي (استيكة) بعد هروب زيكو.

· موسى الزومة سجل في الهلال.

· ايمن سعيد سجل في الهلال.

· عادي ..ما تعمل ليك بطولات ساكت يا زيكو.

· افياني سجل في المريخ.

· اقجي سجل اجمل اهداف القمة في المريخ.

· بويا سجل في المريخ في شباك الحضري من الحدود الشرقية.

· لكن ديل كلهم ما في واحد فيهم (جرى).

· ما في واحد فيهم شال الكورة واتخارج وقال (ضربة الجزاء) ما بتتنفذ.

· ما بتتلعب.

· واضح ان زيكو بحاول ان (يتحلل) من الواقعة وان يجمّل تاريخه من اغرب واقعة في تاريخ كورة القدم ليس في السودان فقط بل في العالم كله.

· ما شفنا لينا حكم احتسب ضربة جزاء ..اللاعب الذي احتسبت ضربة الجزاء ضده يشيل الكورة ويطلع.

· زيكو مرات برمي الواقعة على ابراهومة باعتباره كابتن المريخ ..(يا زيكو اول القال انك كنت كابتن المريخ منو؟)..عشان تطلع تنكر (الكابتنية).

· في ذلك الوقت انت كنت اقل من ان تكون كابتنا للمريخ.

· هل كابتنية المريخ بقت (منكورة) لهذه الدرجة يا كابتن؟.

· الاكيد ان (الجرية) منكورة.

· يحاول زيكو ان يحمل المسؤولية كابتن المريخ وقتها (ابراهومة) ويقول في كل حواراته عن هذه الواقعة ان الكاتبن كان (ابراهومة).

· يعني.

· ابراهومة كان (الكابتن) – لكن الشال الكورة هو منتصر زيكو.

· نحن بنعرف زيكو.

· بنعرف الزول الهرب بي الكورة.

· سمعت زيكو في اكثر من مناسبة يلهج بعتابه ولومه على حاتم محمد أحمد ..اللاعب الذي ارتكب ضربة الجزاء.

· ونحن ما مختلفين في ذلك ..حاتم محمد أحمد ارتكب ضربة الجزاء مع زاهر مركز – لكن الشال الكورة واتخارج هو منتصر وزيكو.

· شلتها انت يا زيكو.

· نحن بنعرف (زيكو).

· في مليون لاعب ارتكب (ضربة جزاء) في مباريات الهلال والمريخ – وفي مباريات ريال مدريد وبرشلونة..لكن في لاعب واحد شال الكورة واتخارج وهو زيكو.

· بالمناسبة نحن ما مستغربين من تهرب زيكو هذا ..اذا كان زيكو قد شال الكورة (وهرب) امام اكثر من عشرين الف متفرج ..ح تفرق عليه ان يهرب الآن من الواقعة وان ينكرها.

· كلو هروب.

· هرب قبل عشرين سنة.

· وهو يهرب الآن.

· الزول الهرب في الميدان يمكن ان يهرب من تحمل مسؤولية الواقعة بعد (20) سنة.

· الزول الاتولد في تلك السنة – الآن على اعتاب التخرج من الجامعة.

· وزيكو يخرج الآن عشان يبرر الواقعة ويورد معلومات لا علاقة لها بالهروب.

· زيكو قال ان كابتن المريخ في تلك المباراة كان ابراهومة – ولا ادري ما قيمة هذه المعلومة في هروب زيكو.

· زيكو حاول ان يلعب على عواطف المريخاب ويقول ان تقرير المراقب السر محمد علي هو الذي ظلم المريخ.

· تقرير شنو؟.

· التقرير بكون بعد المباراة – بعد (الهروب) – نحن نتحدث عن زيكو الشال الكورة وطلع من الملعب.

· نحن لا نتحدث عن المباراة من ناحية قانوينة ..ومتى يعلن الحكم عن إلغاء المباراة؟.

· دا ما موضوعنا بعد عشرين سنة.

· نحن يا زيكو لا نتحدث عن ذلك – ولن نقبل ان يحدثنا عن هذا الامر شخص بعد ما يقرب من ربع القرن.

· إلّا اذا اراد زيكو ان يطلع نفسو من التهمة وان يرمي باللائمة على كابتن المريخ وجهازه الفني ومجلس ادارته الذي لم يعرف وقتها ان يثبت حقه القانوني ان كان للمريخ حق قانوني.

· تفتكروا ناس ود الياس والمرحوم فيصل عبداللـه له الرحمة والمغفرة – اشطر سكرتير في تاريخ المريخ وفتحي أحمد عيسي وغيرهم من فطاحلة المريخ واقطابه ..فات عليهم في ذلك الوقت حكاية ان المباراة (تم الالغاء) قبل مرور الزمن القانوني لالغاء المباراة.

· يا زيكو عشان تطلع انت (بطل) ما ممكن تجرّم المريخ كله – وبعد عشرين سنة كمان.

· الاثر القانوني للمباراة هذا مسؤولية لقطاع المريخ وجهازه الفني في المباراة ومن بعد مسؤولية مجلس الادارة وقتها.

· نحن نتحدث عن هروب زيكو وعن انو شال الكورة واتخارج ورفض تنفيذ ضربة الجزاء لصالح الهلال ..هذه الاشياء تكون بمفردها كدا حكاية (هروب زيكو).

· اما حكاية الهجوم بعد ربع قرن على مراقب المباراة السر أحمد علي وحكم المباراة سليمان حسين ..وحتى كابتن المريخ ابراهومة امر لا قيمة له ولا اثر.

· خاصة ان زيكو خرج بذلك القول بعد فوات الآوان.

· العجيب في الامر ان زيكو استنكر واستغرب من عدم استنطاق سليمان حسين حكم المباراة.

· لا اعرف لماذا استنكر زيكو عدم كلام سليمان حسين واستنطاقه في الصحف والمريخ يملك اكثر من ثلاثة صحف رياضية.

· وعندكم قنوات واذاعات ..لو عندكم شك في الواقعة جيبوه وأسألوه.

· استنطقوه – في حد حايشكم.

· لا اظن ان زيكو يطلب من الهلال ان يستنطقوا سليمان حسين بعد العمر دا كلو.

· اسألوه براكم.

· اذا كان بطل الواقعة والزول الشال الكورة طلع بعد ما شاب وفي صفحته على الفيس بوك يتحدث عن اشياء وهمية.

· طلعت ..ما طلعت.

· عبرت ..لا ما عبرت.

· على كدا بكرة فاروق جبرة لمن (بونيته) لحكم مباراة المريخ والتاكا كسلا تتم عشرين سنة ممكن يطلع ويقول انا ما ضربت الحكم ..الحكم ضرب نفسو براهو.

· ومراقب المباراة اورد اشياء غير حقيقية.

· مثل هذه الفضائح لا تسقط بالتقادم.

· على العموم نحن لا نستبعد هذا (الانكار) من المريخاب ..فهم قد سبق ليهم ان نكروا (البصمة) ..ما ينكروا (البونية).

· بصمة علاء.

· بونية بكري المدينة نكروها ..وهذا زيكو ينكر (الجرية).

· ومباراة الامل رفضو يلعبوها.

· يا زيكو اذا ذاكرتك خربت بعد عشرين سنة عليك ان تكتب (هروب زيكو) في (غوغل) او في (اليوتيوب) سوف يأتي (منتصر الزاكي) الشهير بي (زيكو) بي شحمو ولحمو وهو شايل (الكورة) ومتخارج.

· بجيبوك (جاري).

· شايل الكورة زي الحكم ..لكن طالع بيها.

· وبعد دا كلو يقول ليك انا ما هربت.

· انت قايل الهروب في كورة القدم كيف؟.

· الهروب في كورة القدم انك تشيل الكورة وتتخارج هذا يسمى هروب ..ما شرط تقد السلك.

· او تتلب حيطة الاستاد.

· زيكو في (روايته) قال ان نتيجة المباراة كانت 2 / صفر لصالح الهلال وانه لم يهرب خوفا من تضاعف نتيجة المباراة.

· ونسى زيكو ان الهلال عندو ضربة جزاء لم تنفذ ..كان سوف ترفع النتيجة الى ثلاثة اهداف.

· تفتكروا بعد الهدف الثالث الهدف الرابع ما بجي…مع ناس حاتم البجلو فيها واقفة.

· انتوا يا زيكو (الفضيحة) عندكم كيف؟.

· يمكن الحاجات دي عندكم عادية.

· تشيلوا الكورة.

· تتغلبوا تلاتة ..او (سبعة) الموضوع ..عادي عندكم شديد.

· ………..

· ملحوظة : عملتها ظاهرة يا زيكو.

هوامش

· امانة فيكم يا هلالاب خشوا اليوتيوب واكتبوا (هروب زيكو) شوفوا بجيكم شنو؟.

· لو ما هرب ارجعوا لي.

· نحن في الهلال ما عندنا زول بهرب.

· جري ما عندنا.

· ما عاوز اتقل في الهوامش تقلت في (هروب زيكو).

· لكن برضو ما بهرب.

· برجع ليكم.

· ……….

· عاجل : يا زيكو بتفتكر ليه ما بنتخبوك عضو مجلس او يجيبوك في القطاع الرياضي …المريخاب ما قادرين ينسوا حكاية هروبك دا…بتذكرهم واقعة حزينة في تاريخهم.


‫5 تعليقات

  1. هروب زيكو من وجهة نظري المتواضعه كان ينمّ عن حب وغيره على الشعار
    وهذه اشياء إختفت في هذا الزمن ( الزمن المكندك ) .. ربنا يرحم محجوب شريف
    شكراً يا حبيب الاهلّـه أ / محمد عبدالماجد ..

  2. لو سلمنا بحقيقة هروب زيكو فيجب التسليم بهروب الهلال من كثير من المواجهات فقد هرب جمهور الهلال في مباراة مامون صابون بعد أن رجموا الملعب الحجارة فأنهى الحكم المباراة قبل موعدها ثم الهروب في مباراة صلاح بمبان والهروب في مباراة ذات المراتب وكل هذا كان هروبا جماعيا أثناء سير المباراة ثم هناك الهروب من قبل ان تبدأ المباراة من الهروب من مباراة الرد أمام وفاق سطيف والهروب من مواجهة المريخ في الدمازين

    1. لو سلمتووو؟!!!!!!….
      والله طبعكم دا مابتخلوهو، بعدين جري المباريات والهروب فيها دا حقكم، كدي أسألو الأمل عطبرة، هلال كادقلي، ديل شردتو منهم عدييل، والاتحاد العام (مشكورا) حول المباريات خارج عطبرة وكادقلي،
      اما بالنسبة لعملية زيكو بالمجازفة الكروية دي ماحصلت في ملاعب الكرة الارضيّة، دي شبهها مافي،كلموهو بالله يرجع الكورة

  3. هروبكم من السطايفه وهروبكم من الدمازين وين دا كلوا جاي تحدثنا عن زيكو ابقي في الهروب واقعدوا في صفركم ياوهم