إنه شرف النزال

> مباراة الامس بالنقعه انتهت بخيرها وليس فيها شر
> فلا السلاطين تعرف التواطؤ ولا الزعيم يسعى للتواطؤ
> ولا حتى استمالة الحكام
> فالتحكيم بالامس على غير العاده كان فوق للممتاز
> ويا ريت كل الحكام يؤدون بالطريقه التي ادي بها حكام الامس
> اخطاء نهي
> عشان لا يظلم ولا يؤلم
> شكرا حكام الامس
> والله لي اسي ما عارفهم هم منو
> المهم
> من حق السلاطين ان يتعادلوا
> ومن حقهم ان يفوزوا
> فهم فريق كبير وعريق ونحبه
> ونتمنى له التقدم دوماً
> ولكن اعتمادهم على سوء ارضيه ملعب النقعه لا يؤدي للتطوير
> واعتماد المدينه الكبيره على هكذا ملعب لا يساعد المواهب علي التفجير
> شكراً السلاطين على النزاهه
> وعلى التجربه الكبيره التي قدمتموها للزعيم
> ليس امامنا وقت للوم
> نحتاج للوقت في تصحيح الاخطاء وتخطي الوفاق
> ونعذر اولادنا
> من سفر لي سفر
> من مباراة لمباراة
> لملعب سيئ
> كلها عوامل يمكن ان تؤثر علي الاداء
> فالزعيم لم يظهر بهذا الشكل منذ شهر خمسه الفات
> لا نبحث لهم عن الاعذار
> لكن نهيئ لهم الجو الصحي الذي يقودهم لتخطي الوفاق براحه بال كبيره
> فكلنا يعلم ان المريخ لا يهزمه الا المريخ
> وان المريخ لا يهزه الا المريخ
> يعني اولادنا ما بحطمهم وبحبطهم الا الجمهور لو طلع عن طورو
> ولان الشفوت شفوت
> نعتقد انهم قد تخطوا مرحلة الضغط على اللاعبين
> لمرحلة اعدادهم نفسياً بالتشجيع القوي
> هم اسلحتنا
> ويجب علينا ان نحافظ على اسلحتنا
> ويجب علينا ان نصينها جيداً
> وطلقه واحده تصيب يوم سطيف تعلن تأهلنا
> وتعلن زيادة المليون شهيد لشهيد جديد
> يبقوا مليون وواحد
> ايها الناس ما بوصوكم
> المهم
> ما راح شيء
> ولا تهزكم فرحة زناطير
> اليوم في مباراه
> حتي لو فازوا فيها
> لن يتخطونا في النقاط
> ونتصدر برضو بفارق الاهداف
> لانهم لن يستطيعوا ان يفوزوا علي النسور سته صفر
> فارق السته اهداف ما بتعوض
> وان كان النسور قد ظلموا في مباراتهم بالدورة الاولي ضد الجماعه ديل
> فإن دعوة المظلوم مجابه
> وربك رب الخير برفع عنهم الظلم
> احتمال كبير الليله
> المهم
> كلنا خلف الزعيم
> قلناها ونصر عليها
> من عزام ولي قدام
> وقدام دي تعني عندنا المطار
> لا يستحق البطوله اي زول غيرنا
> البطوله بطولة فريق كبير ما لعب زناطير
> والعتره بتصلح المشي
> المهم
> دار بيني وبين صديق لي حوار بالواتس
> هو مغترب بالدوحه
> وكان مشي لمهمة عمل ماليزيا
> لقيتو مرسل لي في الواتس
> سلك وينك
> انت الوين ؟؟؟ في قطر ؟؟؟؟
> قطر وين يا عمك ؟؟؟ في خطر يا ابو السلوك
> حمد الله علي السلامه رجعت البلد دي متين
> امس
> وحانشوفك متين ؟؟؟
> كنداكة امس دي كالت الترابه في خشمي لكن اول بستحمي وبعدين امرق عليكم
> يانا الماشفناك ….في البلد دي الا تستحمي بي كلونيا
> قام النت قطع
> اظنو اسي في حي الريان وسط الدوحه
> بختك يا صاحبي
> نحنا زاتنا الماسكنا من الجيه ليكم عدم الحمام ده
> وكان سمعتوا بينا استحمينا
> ارجونا في المطار
> اها
> نرجع لي كورة امس
> المستوي الشفناهوا امس ده
> بالذات من بعض اللاعبين
> نعلم جيدا انه ما مستواهم
> نعذرهم ليعتذروا لنا يوم الوفاق بهدفين حلوين ملعوبين
> وتستمر الافراح
> ولو كورة بكري المدينه في الشوط الاول لم ترتطم بالعارضه
> ودخلت قون
> ما اظن في زول كان بلوم الاولاد
> قدر الله وما شاء الله فعل
> كلنا في التمارين
> بي دفوفنا
> وننظم صفوفنا
> وصدقوني العدو قبل الحبيب في المطار بشوفنا
> ولكن الملفت للنظر
> المعز محجوب برغم الكور البسيطه التي وصلته
> الا انه ابدع وتعامل معها بيقظه وخبره
> عزو ماشي تمام
> كيف ما يمشي تمام وهو ماشي المطار بحول الله
> ايها الناس
> ان تنصروا الله ينصركم
> اها
> نجي لي شمارات والي الخرتوم
> والينا
> سمعنا وجابوهو لينا وقالوا لينا
> وكان قالوا ليك سلك قالو يا والينا
> قتتتتتتتو
> قطيعتي ما بنكرها يا والينا
> السمعناهو والجابوهو لينا قالوا يا والينا
> احتمال ترفعوا الدعم عن الخبز الدخل الحيره فينا
> هو بيني وبينك خبزنا الخفيف ده
> الاخف من مناديل الورق ده
> التلاته بي الف ده
> العيشه قدر كده
> كان حشيتها طعميه يا والينا
> الطعميه تمرق بالجمبات كده وكده
> معقوله ده رغيف مدعوم يا والينا؟
> طيب لو ما مدعوم كان حا تعوسوا لينا ولا شنو يا والينا؟!
سلك كهربا
ننساك كيف والكلب لما يجي قبل العربيه ويشوف كيس العيش بضحك فينا
يفرفر في واطات الله دي من الضحك علينا يا والينا
والى لقاء.
سلك