حالتــها دي بــدون (كِــــبر)
· يمكن عدم موضوع مني…ويمكن (نقطة) النقعة بتخلي ليك الزول بدون ما يشعر يقعد يفتش عن (معجون الاسنان)
· عشان اثبت ليكم (النظرية) – الموضوع دا ممكن يجيب ليه مقصورة (طايرة)
· امس بكري المدينة قالوا ليك حايم في (النقعة) متل (بلة جابر) في بداياته مع المريخ
· مزمل الليلة ح يتعب عشان يثبت ليهم نقطة النقعة بي اربعة نقاط في (الرد كاسل)
· ما عارف ليه بالحس الصحفي ..(كمان دا عاوزين تغالطوني فيها) – ما عارف ليه جاني احساس كدا – انو الجماعة ديل (انتوا عارفنهم ونحن عارفنهم) تاني ح يرجعوا لي حكاية (اي دمعة حزن لا لا).
· اقصد (اي نقطة حزن لا لا).
· او (اي نقعة حزن لا لا).
· ما عارف ليه – حسيت بي (عبدالحليم حافظ) في الحتة دي؟.
· ابيض واسود.
· وفيلم ابي فوق الشجرة.
· وايامنا الحلوة.
· شعرت ليك بي الموضوع بجيب ليه (دمعة).
· وبجيب تاني (لا لا)..مباراة وفاق سطيف قربت ..واي دمعة في هذا التوقيت مرفوضة.
· يمكن عدم موضوع مني…ويمكن (نقطة) النقعة بتخلي ليك الزول بدون ما يشعر يقعد يفتش عن (معجون الاسنان).
· رغم انو ما في اي علاقة بين الموضوع دا ومعجون الاسنان.
· إلّا اذا كانوا عاوزين يطلعوا ليهم (رسوم) جديدة للمعجون.
· انتوا قايلينهم ما بعملوها.
· ويمكن دي حركات (هلالاب) ساكت.
· الليلة مزمل ابوالقاسم بكون بحاول يقنع في المريخ ان التعادل ما مشكلة ..وان التفكير الاساسي في البطولة الافريقية.
· مزمل الليلة ح يتعب عشان يثبت ليهم نقطة النقعة بي اربع نقاط في (الرد كاسل).
· بابكر سلك الليلة بكون هارد نفسو عديل كدا.
· سلك بكون قال ليهم ارضية الملعب.
· زي كأنو مريخ الفاشر كان بلعب في ميدان تاني.
· يعني المريخ العاصمي بيلعب في النقعة ومريخ الفاشر بيلعب في (الكامب نو).
· انتوا يا سلك الجماعة ديل في (الرد كاسل) عملوا معاكم شنو؟.
· مريخ الفاشر في ام درمان طلع بالنقاط التلات.
· الكلام دا حصل في الرد كاسل.
· وقفتوا المباراة ما نفع.
· طلعتوا الشرطة برة الاستاد – ما نفع.
· ادوكم ضربة جزاء ما نفع.
· الكلام دا كلو حصل في استاد المريخ – الاستغراب ليكم في شنو؟.
· يمكن (المطرة).
· قالوا ليك الفاشر فيها (مطرة) قوية ..وضفر ما بعرف يلعب في (المطر).
· وبكري المدينة من تجيب ليه سيرة المطرة ..الفي رأسو بتطير.
· المطر.
· غايتو بالغتوا يا سلك.
· من سطيف تجيبوا (نقطة) ومن النقعة تجيبوا (نقطة).
· ح تلقطوها – نقطة – نقطة كدا.
· يمكن ناس مصعب عمر ديل ما قادرين يفصلو.
· ناس مصعب عمر يكونوا لخبطوا ..وفاكرين المباراة في (المجموعات).
· عشان كدا قفلوا.
· وقعدوا يضيعوا في الزمن.
· ناس مصعب عمر مباراة في الممتاز ومباراة في المجموعات ما بقدروا يفصلوا بينهم.
· بلخبطوا.
· الجماعة ديل بيلخبطوا بين الكورة الطلعت ..والقون.
· واللخبطة بتجيب الكلام القديم.
· اي دمعة حزن لا لا.
· نحن الآن على بعد ايام من (اي دمعة حزن لا لا).
· قربتو للحكاية دي.
· شعرت ليك بي (نهواه في كل الظروف) حايمة في الجرايد الايامات دي متل (الكرت الدبل).
· قدر ما تفكو – يجيك راجع تاني.
· انتوا الكوتشينة بتاعة المريخ دي فيها كم (دو).
· امير كمال – رمضان – شيبون – اكرا – كوفي – ضفر – بكري المدينة – مصعب عمر.
· الورق كلو صغار.
· الورق دا إلّا تلعبوا بيه (حريق).
· (وست) ما بجيب ليكم حاجة.
· كلو دوهات.
· ما عارف ليه ..(في السخانة دي).
· شعرت ليك بي (عمر محمود خالد).
· شعرت ليك بي (السر أحمد قدور) ذاتو.
· الموضوع دا بجيب ليه (سيكافا).
· لو اتعصروا شوية ..بيجروا على (سيكافا).
· ما تسمعوا لي كلام الجرايد دي – والمجموعات ..وخاتم غارزيتو.
· ملامح سيكافا ظهرت.
· وعشان اثبت ليكم النظرية – الموضوع دا ممكن يجيب ليه مقصورة (طايرة).
· النقعة دي عاوزة ليها مقصورة طايرة.
· عاوزة ليها (تصبيرة).
· شابكننا السنة كلها (نقة).
· قلت (نقة) ما قلت (نقعة) – عشان ناس سلك متسببين ممكن اي كلمة هنا يشوفها (نقعة).
· وانا لا جبت سيرة (النقعة) ولا قلت حاجة.
· شابكننا السنة كلها ..المريخ متصدر.
· والمريخ عندو هجوم قوي – المريخ صاحب اقوى هجوم.
· امس بكري المدينة قالوا ليك حايم في (النقعة) متل (بلة جابر) في بداياته مع المريخ.
· ما في اي فرق.
· تقول حايم في الميناء البري.
· كأنو عاوز ليه تذاكر.
· انت يا بكري المدينة عاوز تجيب قون متين؟.
· زمان قلنا (لوزان) عاملة ليك (لخبطة).
· لوزان ملفها اتقفل ..مالك؟.
· الكشافات خليتها.
· بقينا ما بنشوف ليك اي حاجة.
· ورمضان عجب بعد ما قبض (المليارات) بقى تفكيرو كلو في انتهاء فترة قيده مع المريخ.
· بفكر في المليارات.
· الموضوع بتاع (النقعة) دا ما بفوت ساكت.
· قالوا ليك استاذ (لغة عربية) – النوع البكون حافظ الشعر الجاهلي داك بيت بيت.
· استاذ اللغة العربية دخل ليك الفصل ..قال للطلاب – طلعوا كراس الانشاء.
· الطلاب طلعوا كراس الانشاء.
· الاستاذ قال ليهم اكتبوا موضوع في الخريف.
· في الخريف تحديدا.
· اختاروا اي موضوع كدا في الخريف واكتبوا فيه.
· الكتب عن المطر.
· والكتب عن الجو جميل والعصافير مبتهجة.
· والكتب عن زغزغة العصافير.
· والكتب عن الزهور ..والزراعة.
· اي طالب كتب ليه في حاجة عن الخريف.
· واحد من الطلاب الشفوت ما كضب وكتب ليك عن (نقطة النقعة).
· دخل ليك في تعادل المريخ مع مريخ الفاشر طوالي.
· ولا كضب.
· الاستاذ قبضو ليك ..قال ليه دا شنو البتكب فيه دا. ..علاقة الخريف بي نقطة النقعة شنو؟.
· الطالب حنكو سنين ..قال للاستاذ ..يا استاذ موش مرات الجو لمن يكون لطيف بقولوا ليك الجو الليلة (اوروبي).
· الاستاذ قال ليه فعلا.
· الطالب قال ليه في علاقة بينا وبين اوروبا.
· الاستاذ قال ليه ابدا.
· الطالب قال ليه طيب مالك؟..بعدين يا استاذ انا متأكد اعلام المريخ الليلة كلو بكتب لينا عن (الخريف).
· وعن المطر التى كانت سببا في تعادل المريخ مع مريخ الفاشر.
· الليلة جرايد المريخ ح تكون كلها (مطر).
· الاستاذ ما قدر يقول حاجة …سكت ساي.
· جرس الحصة ضرب – الاستاذ اتخارج.
· الناس العاقلة في المريخ ..ح يقولوا اقفلوا ملف النقعة.
· المريخ كان كعب ..ما مشكلة ارضية الملعب اكعب.
· الجماعة عندهم الاحد القادم مباراة مع وفاق سطيف ..والشغل البتعملوا فيه في النقعة دا ..لو عملتوه مع (وفاق سطيف) ح تشربوا ما تروا.
· انا خايف يقوموا تاني يجيبوا ليهم (خرفان).
· ويضبحوا من اول وجديد.
· ويجيبوا ليك (شيوخ).
· استاد المريخ دا ما مضمون.
· الخرفان وجبت.
· المريخ دا ما براهو.
· ……………
· ملحوظة : كورتكم ما كورة مجموعات.
· هوامش
· الغريبة مريخ الفاشر بلعب بدون مدرب بعد استقالة المدرب القدير شرف الدين أحمد موسى.
· ومريخ الفاشر بلعب بدون (كبر).
· الوالي ذاتو شالوه.
· مع ذلك مريخ الفاشر اتعادل مع المريخ الاب.
· حالتها دي بدون كبر.
· يعني لو الوالي السابق عثمان يوسف كبر.
· لو كبر موجود كانوا انضربوا خمسة.
· فريق الفاشر يفقد فيصل العجب وحسن كمال وأحمد آدم ومحمد جياد.
· مع ذلك شال نقطتو.
· مريخ الفاشر في اجازة مفتوحة.
· رمضان ما في زول فيهم ادرب.
· كانوا كلهم في بيوت.
· وعندهم مشاكل وحقوق ومرتبات لم تصرف.
· بعد هذا تعادلوا مع المريخ الذي فاز على هلال الفاشر ..وتعادل مع وفاق سطيف وهو قد عاد من الجزائر بعد معسكر استمر (21) يوم.
· واتعادلوا مع المريخ.
· ويقولوا ليك المريخ صاحب اقوى هجوم.
· والمريخ قوي.
· لا شفنا كوفي – ولا شفنا اكرا.
· ولا بكري المدينة.
· الجماعة ديل كلهم بلعبوا في الجرايد.
· بلعبوا في الاعمدة.
· ناس المريخ ديل لو لقوا (اندرزينهو) كانوا طلعوا ليه مع اي عدد ملحق خاص.
· الهلال يلعب اليوم امام النسور.
· وفريق النسور فريق ممتاز وجيد ..وممكن يشكل خطر على الهلال.
· خاصة اذا ركز الهلال في مباراة الجمعة.
· ركزوا في مباراة اليوم ..وما تفكروا في مباراة الجمعة.
· احسموا (النسور).
· اللعب باستهتار وعدم مسؤولية يمكن ان يعرض لاعبي الهلال للاصابات.
· لذلك ألعبوا بقوة.
· الكوكي عليه ان يتعامل مع المباراة مثلما يتعامل في المباريات الافريقية.
· نحن الدوري الممتاز عندنا مهم.
· وما بنقبل فيه اي تعثر.
· ألعبوا كورتكم.
· وتعالوا عشان تشاهدوا اندرزينهو ووليد الشعلة.
· تعالوا شوفوا كاريكا بقدم في اجمل العروض.
· شوفوا بشه.
· اما نزار حامد ..قولوا ما شاءالـلـه.
· ……….
· عاجل : المريخ يستعين بي بلة جابر لهزيمة وفاق سطيف.
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة