عدوى الطلاق
بعد التخطيط.. شهور.. وربما سنين.. لعروسين لي ليلة زفافهما.. مع التخطيط لباقي مستلزمات الزواج.. ولكن التركيز بيكون علي يوم الزفاف.. وبعد خلاااااااص يعقدو.. ويجو ماشين علي الحفلة.. عشان يفرحو.. ويفرحو ويونسو المعازيم.. تحصل مشكلة العريس يطلق العروس.. والمعازيم يتعشو.. ويتونسو.. ويرجعو يتمو ونستهم فوق حفلة الطلاق.. يتموها عند أهلهم.. وكل مرة واحد يصفق ايديهو مستعجب “والله حكاية!!”.. وينقسم المتونسون إلى فريقين فريق مؤيد للعروس المطلقة والمسخو عليها فرحتها.. وفريق مؤيد للعريس الخسر الخسارة دي كلها.. وطلق.. وفي الفريقين ديل زاتم.. يتلقو راجل ومرا وخلقهم ضايقة وزهجانين.. تقيف المرا مع العروس ويقيف الراجل مع العريس.. والنقاش يحتد ويمكن يصلو مرحلة الطلاق.. وديل زاااااااتهم يبقو ونسة وبرضو يتلقو راجل ومرا ويتقسمو قسمين بخصوصهم ويقع طلاق.. ويصبح طلاق عنقودي.. معدي.. تجي واحدة شايلة الشمار لي راجلها الما مشى الحفلة وما حضر دراما الطلاق تجي خامة الشمار “اسكت اسكت.. الليلة وووب علي.. العريس طلق العروس وهي قاعدة في الكوشة؟”.. الراجل يعاين لها من فوق لي تحت “طلقها؟ مما شفتك محننة ايديكي وكرعيكي وراسك.. ومكيسة كلك رابطة اكياس في الكرعين واكياس في الايدين ومدخلة قنقونك في كيس.. التقول داخلة أوضة عمليات.. عرفتك ح تطلقيهم وتجي”.. وتقوم الشكلة ويقع طلاق.. أو واحد برضو يكون زهجان تجي مرتو الجات من حفلة الطلاق تلقاهو راقد ومقبل علي الحيطة وتقول ليهو “نمت؟.. الليلة حصلت جنس دراما.. انسى بس.. العريس طلق العروس في المكرفون وفي الحفلة”.. ولا يقبل عليها وهو في نفس رقدتو يقول ليها “أحسن ليهو يتخارج بدري بدري”.. وتكون عاقلة تلم خشما عليها وتحس إنو يدو علي الزناد وممكن تطلع طلقة..!
الأخبار من الأردن “عريس يطلق عروسه في ليلة الزفاف بسبب صالون” والصالون المقصود هو الكوافير.. وذكر الخبر أن العروس أبت تتصور مع العريس في الصالون.. العريس زعل واتحرق.. حرد مرق.. وطلقها.. وهي ماشة علي الصالة.. كارة فستانها والشباين مشالبات ضنب الفستان جاها خبر السواد دا!!!!!!.. ويردف الخبر إنو أبو العريس لما سمع إنو ولدو طلق عروستو.. رفع بندقيتو في الهواء وضرب واحد وعشرين طلقة ابتهاجا بالطلاق.. وأبو العريس راجل أحمق.. فرحان بطلاق ولدو وهو عريس يضرب رصاص؟.. حسي افرض طلقة زاغت وضربت ليها زول كتلتو؟؟؟؟؟؟؟
أما الطلاق العدوى المو خمج.. من جنين بفلسطين.. في الصالة.. العريس وأم العروس اتلاسنو.. بسبب ترتيبات الصالة.. قوم يا العريس ازعل وطلق العروس في صمة خشما.. مسكينة شلاليفا ما فتحتن.. أها رجعو كل زول مشى علي أهلو.. أبو العروس يقوم يتناقش مع أم العروس.. وهي براها زهجانة من طلاق بنتها.. يناقشها ويقولها انتي غلطانة ومتلومة.. نفسهم يحر.. يقوم الراجل أبو العروس يطلق مرتو أم العروس.. يعني العروس وأمها الاتنين اطلقو في ليلة واحدة مفروض تكون ليلة فرح.. اطلقن وتراهن متقابلات كل واحدة راقدة فوق عنقريب وترعى بي غنم إبليس!!!!!.. المحيرني الفلسطينيين ديل في البشوف فيهو في القنوات الفضائية وحات الله أنا كنت قايل إسرائيل دي ما مدياهم فرقة يغنو ويهيصو فيها..!!!!!
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة