بابكر سلك

الحمام الرقاص


> انا من هواة تربية الحمام
> مربي لي زناطير وحبة طير
> والهوايه دي عندي من بدري
> حاجه جميله جدا
> تقعد في وسط الحمام وتتفرج
> يجيك الروماني يقدل
> بالوانو المختلفه
> واحجامه المميزه
> والقطاوي اليومين دي قاطي
> القطاوي ده عندو ريش طواااال في القدمين
> ناس الحمام بسموا الريش ده الشرابات
> والمالطي برضو ماشايفو
> لكن الكنج في
> وكمان في انواع جيده اليومين دي
> الحمام آلاف الاصناف والانواع
> وفي الكشكات والبوازه
> الكشكات زاته خشوم بيوت
> في الامري والعنبري
> في البي كرفته والبدون كرفته
> والبي قمبور والبدون قمبور
> والمودينا حمام جميل وانيق
> اشهر انواع الحمام الحمام الزاجل والحمام الرقاص
> الحمام الرقاص ده بكون ريش ضنبو عامل زي الشمسيه
> وطوالي مفنوس وبرقص
> مرات لما يجي ياكل الا يرقد
> مصنقع السنه كلها
> في منو نوع بي قمبور
> وفي نوع بشرابات
> وفي النوع الهندي بي قمبور وشرابات
> دنيا تربية الحمام والطيور دنيا براها
> دنيا ممتعه وجميله
> المهم
> الجماعه قالوا عزام حمام
> قام عزام شال سيكافا
> والجماعه التكتحهم في سيكافا ما عندهم
> يبقي عزام جاب كاس فضل الحمام الرقاص
> واترقصي
> المهم
> مستوى الزعيم يوم الفاشر لم يكن هو المستوى المعهود
> مهما كانت الاسباب ده ما مستوانا
> لذلك لا نخاف لقاء سطيف
> والذين كتبوا من باب المنطق عما يدعونه من رداءة مستوى الزعيم
> نقول لهم لا يمكن ان تكون جميع مستويات الزعيم محض صدفه
> ومستوى مباراه واحده هو المستوى الحقيقي
> لا وقت لجدالهم الآن
> لأننا نثق في قدرات الفريق
> ولأننا ننشغل باعداد العده لتخطي الوفاق
> الوفاق فريق كبير ما من الزناطير
> لذا نحترمه ونعد له ما استطعنا من مهارات وخطط ومواهب
> وبعد ان نجتازه بحول الله
> نعمل على ابعاد اتحاد الجزائر عن دربنا
> انه طريق المطار
> ايها الناس
> الشفوت موعدهم مع نصر كبير ان شاء الله
> بشرط ان نقدم عملاً كبيراً للفريق الكبير
> شفوت ما زناطير
> عشان كده نشتغل بي شفتنه
> كلو زول يقوم بي واجبو كاملا
> لتكتمل اللوحه
> مافي زول يدخل في شغل زول
> انه طريق المطار
> يحتاج لتخصص في العمل
> فالتخصص وتقسيم العمل من اسباب نجاح الاعمال الكبيره
> وما بوصوكم يا ناس
> المهم
> تعادل الفاشر لن يحبطنا
> انها زكاة النصف الأخير من الموسم
> الحمد لله اخرجناها بالسوداني
> ما طلعناها بالدولار
> لو كان سددناها بالدولار
> كان السداد بكون يوم الاحد القادم
> سداد بالسوداني يساعدنا نمشي المطار تاني
> المهم
> عندنا القاب وكنيات كتيره في البلد دي
> حتى البضائع بنسميها بي سعرها ايام الاسعار مستقره والناس مستقره
> بدري الكلام ده قبل الوجوه تبقي مكفهره
> يعني يقول ليك قلم ابو تمنيه قروش
> قلم ابو خمسطاشر
> وحتي الناس
> اب أحمد
> اب اربعه «ده لوري»
> اب صلعه
> اب سته
> حتى في الترع في اب عشرين
> المحيرني الناس الالقابها بي الاعداد دي
> زي اب سته
> ده بكون لقب ولا سعر؟
> المهم
> هلالابي عجبوا اداء الهلال يوم النسور
> قال لي شفت هلال المستقبل
> قلت ليهو ناس فيصل موسى وجمعه وكانوتيه والجزولي وبويا ووليد الشعله ووليد علاء؟
> بمناسبة وليد علاء
> كيف لاعب مسجل في التيم الكبير بلعب مع الاولمبي؟؟
> الزول ده دحين موش كمل العمر الافتراضي عندنا؟
> المهم
> قال لي لكن الباقين رديف
> قلت ليهو وكمان معظمهم بلعب في المنتخب الاولمبي بتاعنا
> قال لي ايوه
> قلت ليهو المنتخب الاولمبي بتاعنا الاتغلب من نظيره التونسي في الابيض اتنين
> قال لي صاح
> قلت ليهو حتى المستقبل ما معاكم
> لما يكبروا يكون اولاد تونس كبروا
> يقابلوكم في الترجي يطيروكم
> ويظل الصفر حتى في المستقبل
> تطير عيشة الزناطير
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> قبل الكلب البجي قبل العربيه بنجي بقينا
> يمكن نلقى في نفاياتنا شيء يرضينا
> يمكن نلقى طماطمايه تسعدنا وتشبعنا وتغنينا
> يمكن نلقى قطعة خبز مجاني توفر علينا
> يمكن نلقى رقم وطني وجواز سفري يخارجنا يودينا
> الناس يا والينا
> كانت جاريه علي شيء
> بقت جاريه من شيء
> ليه ورينا !!!!
سلك كهربا
ننساك كيف والكلب بقى يغيب يوم ويجي يوم قال جية كلو يوم ما جايبه حقها ما بتغطي معاهو
والى لقاء
سلك


‫2 تعليقات

  1. انت عندك خفة دم عجيبة زي صلعتك دي ياسلك . والله حارقك غلب الهلال للنسور لان ليس لديك فريق شباب مثل هولاي الصغار
    فكل عواجيزك تتراوح اعمارهم بين ال 28 وال 35 سنه . اخجل علي جنايزك ديل . عندك ابراهومة وشمس الفلاح وانت دمرتهم
    وانت منبع دمار المواهب . خلي بكري ينفعك وبقية العواجيز يا ……….. سلك .
    هاك قطعة الكهرباء دي اقصد قطعة السلاك .

    ارجـــــــــى الــــــــــراجــــــــيــــــــــك يـــــــــــوم الــــــاحــــــــــد.

  2. الحبيب سلك يحب ان نشحذ الهمم وان يكون يوم الاحد يوم للعبور .الممتاز ملحوق ونقاطنا حا نشيله من القلعه الحمراء يوم نلاقي الصفراب . اوكرا بيجيب الفلايت لي عمنا مساوي واثير هدايا واتصفري