زواج سوداناس

ندي القلعة تكشف أسباب رفت (4) عازفين عبر الواتساب



شارك الموضوع :

تحصلت مجموعات ( أوتار الأصيل ) علي مقطع تسجيل صوتي بعثت به الفنانة ندي القلعة عبر ( الواتساب ) إلي فرقتها الموسيقية .. تشرح من خلاله أسباب رفت أربعة من العازفين من بينهم الشقيقين مع الإبقاء علي شقيقهم الثالث.

وقالت القلعة في التسجيل الصوتي الحصري علي ( أوتار الأصيل ) : أن شاء الله طيبين.. يا جماعة.. أنا بشكر كل زول وقف معاي.. وقدم لي جميل.. وما بنكر جمائلكم.. وما في زول قصر معاي.. لكن الفترات الأخيرة بقي في تهاون في الشغل.. وأنا ما الزولة البتغدر بالناس.. أو تجي بي ورا.. وزي ما أنتوا عارفين دا شغل.. ولو ندي ما بتقدمكم لي قدام.. حاتشوفوا غيري.. وأكيد لو شغلي بقلل من وضعكم كموسيقيين.. لن تتهاونوا.. وأنا ما بقلل بمقدراتكم الفنية.. لكن احتمال ما قدرنا تتوافق في حاجات فنية بفهمها أنا.. وأنا زولة فنانة شعبية.. غناي بسيط غني سيرة.. قدر ما لمحت من ناحية الإيقاعات.. ما في زول انتبه للحاجة دي.. وقدر يعالجها.. لذا بقيت لما أغني في الحفلة بغني نفسي قايم.. وتعبانه.. وحتي أنني أعاني من وقفتي علي خشبة المسرح زايد الانتقادات اللقيتها في الحفل الأخير.. حفل مول ( الواحة )..

وأنا الكلام كلو ما دايره اقولو انتوا اخواني.. وعلي عيني وراسي.. لكن هسع لو مسكنا آدم.. يا آدم انتا ايقاعاتك.. وطريقة الشغل بتاعتك ما حقتي.. احتمال تنجح مع زول تاني.. غناه غير غناي.. يمكن تنفع معاهو.

وواصلت في تقييم العازفين في تسجيلها الصوتي الذي تحصلت ( أوتار الأصيل ) علي نسخه منه.. قائلة : رامي أنت شغلك ( حديث ).. وأنا شغلي ( شعبي ).. عشان كده ما بنفع معاي.. ونفس الشي تامر.. أما بالنسبة لاسامة فالشغل ميت شديد.. وما في تجديد.. وما في شغل موسيقي.. والشغل كلو بقي بارد.. وأنا جد ما بقدر اجامل في الحتة دي.. عشان كده الناس الحاتتلغي من الفرقة هم ( تامر ).. و( رامي ).. و( أسامة ).. و( آدم ).. وبالتالي يفضل الباقين معاي.. والماعندو رغبة يواصل يكون صريح.. زي ما أنا كنتا صريحة معاكم.. والداير يواصل معاي يواصل بالطريقة اللي انا عايزاها.. وبالطريقة حقة ( ندي ).. وبالشغل المتجدد.. اللي بقدمني لي قدم.. ويقدمكم انتوا معاي.. أنا بقول الكلام دا.. زي ما طلبتكم تجوا تشتغلوا معاي.. وأنا بكون معاكم واضحة في كلامي دا.. الشغل بتاعي ما بقبل فيهو اللعب.. ما بقبل فيهو التهاون.. والماحيكون جادي في شغلي من هنا.. ولي قدم بقول ليهو أي إنسان يحاول يتهاون.. أو يبرد طريقة الشغل في الحفلات البقت جامدة.. وما فيها احساس بتاع موسيقي.. وأنا طريقة الشغل دي ما بتنفع معاي.

واسترسلت في التسجيل الصوتي الحصري علي ( أوتار الأصيل ) قائلة : اللي حايبقوا في الفرقة أشرف البوسنة.. ومدثر.. وختم.. ورامز.. ونادر.. وبالنسبة للناس البقوا خارج الفرقة.. أنا بكن لهم كل الإحترام.. واخواني لو احتجتوا لي أنا اختكم.. وأنا لو احتجت ليكم حاجيكم.. واتاكدوا انو كلامي دا كلو من أجل الشغل.. ما من أجل حاجة تانية.

توثيق : سراج النعيم

شارك الموضوع :

تعليقات الفيسبوك

تعليقات


8 التعليقات

إنتقل إلى نموذج التعليقات

      1. 1
        متغربة 2

        الله عليك يا سراج الله يفتح عليك في التنوير المهم دة من ندوووووووووية . الله يديك قدر عمايلك قول أميييييييييييين

        الرد
      2. 2
        عطبراوي

        انا زاتو نفسي قاعد يقوم لمن اسمعك بتغني يا ندويه كيف السبيل لرفتك من الغنا

        الرد
      3. 3
        البنجوس

        موقع النيلين …. توثيق : سراج النعيم :

        ” ندي القلعة تكشف أسباب رفت (4) عازفين عبر الواتساب ”

        والله يا سراج النعيم نسيت اقول ليك الجماعة ديل بصراحة … أكلو الكفتة حقتي .. ومصيرهم حيكون زي مصير السواق بتاعي

        الرد
      4. 4
        خالد الخليفة

        سلام يا عطبراوى ياخ ندى سليلة بتهوفن وباخ ويانى وخريجة معهد الكونسر فتوار كيف تترفت من الغناء ؟ ما سمعت اخر كونشرتو عملتوا والذى تمت الاشادة به من الجمعية الملكية البريطانية لعلوم الموسيقى واعتقد تمت التوصية بوضع كونشرتو ندى من ضمن المقرر الدراسى للدراسات العليا في الموسيقى باروبا

        الرد
      5. 5
        ِالسوداني

        نقول لندى .. خلاص كفاية ” وكل زمن ليه غناي ….”

        الرد
      6. 6
        محمد الامام على

        والله طلعت منى زفرات حرى اه ياوطن اه يا بلد وين الموسيقى وين الشغل والله انا مستغرب اشدالاستغراب الى اين نحن مساوقون

        الرد
      7. 7
        حسن

        توبئ وارجعي الي الله

        الرد
      8. 8
        المتعجب

        ندأ … من أجل ندى
        يا تامر ورامي وأسامة وآدم
        طوروا من أنفسكم لكي تكونوا في مستوى الفنانة العالمية ندى
        ولكي تواكبوا ما وصلت إليه من مكانة فنية
        وهذا زمانك يا مهازل فأمرحي !!!

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *