زواج سوداناس

تكريم الزعيم



شارك الموضوع :

> جماهير المريخ مبدعه وخلاقه
> والدليل ان الآخرين يقلدونها فيما تبدع فيه
> وآخر التقليدات استعمال كلمة الشفوت
> ونحنا في المريخ لاننا من اطلقناها
> ننطقها حقيقة
> وغيرنا ينطقها مجازاً
> التقليد بكون مجاز
> المهم
> نحنا كشعب متفردين جداً
> موديلنا واااااحد بس
> ماجا موديل زينا
> شعب متفرد في الصفات والسحنات بل وفي الكلمات
> المعني الواحد عندنا له مية كلمة تعبر عنه
> زول يقول ليك لأ
> وزول يقول ليك هوء
> وزول يقول ليك كو
> وزول يقول ليك هوئو
> وزول يقول ليك ابدا
> تختلف الكلمات والمعني واحد
> نحنا شعب برانا
> ما عندنا صبر
> تجي المخبز
> تلقي قدامك خمسه سته انفار
> وانت وراهم تمد قروشك بي فوقهم لبتاع المخبز
> ادينا يا
> التقول الواقفين ديل راجين الامنيه
> تجي سايق
> تلقي الناس واقفين في التقاطع
> تخرم بي يمينهم تقفل الشارع التاني
> توقف الحركة ساعه
> والناس تقعد تفتش ليك في مخرج
> صبر مافي
> الكورة لاعبه
> من الدقيقه تمنين
> الاستاد كلو يقيف حيلو
> ويمشوا خطوه خطوه نحو بوابات الخروج وعينهم على المباراه
> صبر مافي
> الطلبه بعد الحصه الاخيره
> يتسابقوا في الخروج وهم يصيحون
> بيووووت بيووووت
> ما بمرقوا براحه
> صبر مافي
> في البص ده
> الناس كلها مكومه جمب السلم والبص فاضي
> مستعجلين للزول
> الزول يركب من صابرين
> يقيف جمب الباب
> تقول ليهو خش لي جوه
> يقول ليك نازل قريب قاعة الصداقه هنا
> صبر مافي
> الشيء الوحيد الصابر عليهو الشعب ده هو الحكومه
> عمرنا كلو صبورين على الحكومات
> الاتراك استعمرونا في سنة 1821م
> صبرنا عليهم لي سنة 1885م
> بالنا طويل
> والانجليز من سنة 1898م
> مرقوا سنة 1956م
> صبورين علي الحكومات نحنا
> وفي حتت الصبر دي
> اخوتنا الاهله بتميزو شويه عن باقي الشعب السوداني
> سيدنا ايوب عليه السلام
> مضرب المثل في الصبر
> صبر طمنطاشر سنة
> اخوتنا الاهله فاتوهوا
> سبعه وتمنين سنه ولسه صابرين
> خمسه اضعاف صبر ايوب ولسه
> قد يصل الامر الى خمسين ضعفاً
> المهم
> ابداعات الشعب المريخي في تسعه وتمنين كانت حاضره
> تعادل وقتها المريخ في الدوري
> فهتفت الجماهير
> الدوري في داهيه المهم قورماهيا
> ووقتها كان لنا لقاء هام مع قورماهيا الكيني في الطريق لمانديلا
> وقد كان
> والآن التاريخ يعيد نفسه
> تعادل الفاشر خلانا نهتف
> الدوري في القيف المهم سطيف
> لذا اعدت الجماهير الشفته
> اعدت معيناتها وسنت حناجرها ليوم سطيف
> ولسان حالها يقول
> نقطع ديل توتي ونجيكم ارجونا في القيف
> ايها الناس
> في مباراة سطيف هناك تنافس كبير بين شفوت الاستاد
> والشفوت خارج الاستاد
> الناس الظروفهم ما بتسمح ليهم يدخلوا الكوره
> ناس ولايات او خارج السودان او حتي المرضي بالخرطوم
> عليهم يقع تنافس خطير مع شفوت الاستاد
> كلو زول يرسل قيمة تذكرتو علي الرقم 2870
> البدخل شعبي يرسل قيمة التذكره
> والبدخل شاخور
> والبدخل جانبيه
> كلو زول يرسل قيمة تذكرتو
> عشان نشوف من دعم الزعيم اكتر
> الشفوت داخل الاستاد ام الشفوت خارج الاستاد؟
> عشان الكورة تجيب اربعه مليار تعيننا في مشوار المطار
> اما المقصوره
> التذكرة مليون
> عضو مجلس عضو برلمان بي مليون
> حتى الاقطاب مليون
> مليون ما كتيره علي المريخ
> وما كتيره على متعة تخطي سطيف
> تلتمية كرسي مفروض تجيب تلتمية مليون
> عليها سبعمائة مليون دخل الشفوت تبقي مليار
> عليها مليار يرسله شفوت الخارج تبقي مليارين
> ومليار شفوت خارج الاستاد تبق تلاته مليار
> قول اربعه مليار
> اربعه مليار كتيره علي مشية المطار؟؟
> ايها الشفوت
> الما بقدر يدخل يرسل تمن تذكرتو على الرقم 2870
> خلونا ننافس بعضنا
> دايرين نقول لي جمال
> علي الطلاق ما تدفع
> نحنا في وش المدفع
> المهم
> قروب شفوت المريخ يكرم الاستاذ الرائع اسماعيل حسن بدار النادي امسية الجمعة
> فعلا شفوت
> احسنوا اختيار ابن الاكابر المكرم
> فالاستاذ اسماعيل يستحق التكريم
> يلقاك باسماً هاشاً باشاً
> يصل الأرحام
> لو جاياك ملاريا
> يجيك قبالها
> يتفقد حالك واحوالك
> ابو السباع رجل طويل الباع
> سمح الطباع
> وهو للتاريخ من اطلق لقب الصفوة
> وهو للتاريخ من اطلق لقب الزعيم
> وبالمناسبه لما جا يعمل صحيفتو وهج الصفوه
> اختار لها اسم الزعيم
> فرفضت الجهات المعنيه الاسم في ذلك الوقت
> وعادت وصدقت به لدكتور الباقر
> ولكن لأن الحقوق تعود لاهلها
> استعاد جمال الزعيم للمريخ
> وثبت الاسم والأجر للاستاذ اسماعيل
> ايها الناس
> أقل تكريم للاستاذ اسماعيل ان نشرفه بالحضور
> الرجل يستحق تمثالاً على باب الاستاد
> نجي كلنا لنكرم الزعيم صاحب لقب الزعيم
> ايها الناس
> ان تنصروا الله ينصركم
> أها
> نجي لي شمارات والي الخرتوم
> كان شفت يا والينا
> المويه وكت تجينا
> بتجينا بي طينها
> سمع وشوف يا والينا
> تشبعنا وتروينا
> كتر خيركم يا والينا
> بس خايفين نفتح الماسوره تمساح يجينا
> او مسؤول كبير في نص بطوننا يقترح كبري يتعمل فينا
> عاد تاني بنتحمل كباري يا والينا؟
سلك كهربا
ننساك كيف والكلب خلى الجيه قال ما جايبه حقها
وإلى لقاء
سلك

شارك الموضوع :

تعليقات الفيسبوك

تعليقات


1 التعليقات

      1. 1
        احمد

        أبو صلعه شفت..انت قاعد تدخل.. اشتري أبو مليون..خايف تكون الاستاد ما بتصلو. .قال شفت. ?

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *