زواج سوداناس

مباراة على طريقة (هل سكر زيادة ام سكر خفيف؟)


شارك الموضوع :

مرات وقت اسمع وردي بغني في (جميلة ومستحيلة) لمحجوب شريف – بقول بعد الاغنية دي مفروض (اطهر الطاهر) يجيبها من (الكورنر)
مرات بتحصل يجيبوا ليك (شاي) بدون (شاي) وقت تشوف هدف بشه في مجموعة من حراس المريخ …(اكرم – رمزي – الحضري)
هدف قدامو (مزيرة) ووراهو شجرة (نيمة)..ولستك بتاع عربية مدفون للنص ، وشفع بيلعبوا في (فسحة)
الشفع متلخبطين – ظاهر عليهم من عيونهم (المجدعة) برة وشيهم – ما اشتغلوا الواجب المدرسي
**************************************

· ما بتمشي لي (دكان) – وتقيف قدامو وتقول ليه عاوز لي ربع كيلو (فرحة).
· ما تقولوا نسيت النقطة وقاصد ربع كيلو (فرخة).
· ابدا.
· قاصدها…قاصد ربع كيلو (فرحة).
· عاوزها كدا.
· طحنية ممكن – صلصلة – زيت بي جنيه.
· ممكن تطلب الحاجات دي من الدكان – لكن (فرحة) لا.
· اوصف ليكم…القون الاول.
· اول شارع خليه – تاني شارع خليه بتلقى ليك مدافع واقع – تالت شارع بتلقى صلاح الجزولي جاب هدف الهلال الاول.
· الحارس عاوز يشرب وما عاوز.
· عاوز يكورك في المدافع وما قادر يكورك.
· بقوم بحركة غير ارادية كدا ينزل يربط (الكدارة).
· بالوصف.
· الشغل كدا – جيبوا ليكم ورقة وقلم ودكتور امتياز.
· هدف قدامو (مزيرة) ووراهو شجرة (نيمة)..و(لستك) بتاع عربية مدفون للنص ، وشفع بيلعبوا في فسحة.
· الشفع متلخبطين – ظاهر عليهم من عيونهم (المجدعة) برة وشيّهم – ما اشتغلوا الواجب المدرسي.
· بتلقى نزار الصاقعة واقف براهو – ما تسألو – ما تقول ليه حاجة – هو عارف اي شيء.
· الحاجات كدا في الهلال – دي (الفرحة) البنسأل منها في الدكان – بنلقاها عند نزار حامد.
· نزار الصاقعة – بجيب في (الاقوان) متل كراسات الاملاء – بتلقاها مردومة في تربيزة استاذ اللغة العربية.
· الحكاية واضحة.
· ولو عاوزين تغالطوا – خلاص ما واضحة – على كيفكم.
· ما في زول بتقدم شوية – يوقف عربيتو وينزل على (المول) ويشيل ليه (طبق بهجة).
· علبة ساردين ممكن.
· كيس حلاوة ما فيه شيء.
· لكن (طبق بهجة) – دي ما سمعنا بيها.
· دكان ناصية – قدامو شجرة دوم كبيرة ، فيها عش قمرية– بتلقى هدف صلاح الجزولي التاني.
· شنو يعني؟.
· الليلة عاوز تعملها لينا كلها صلاح الجزولي.
· الليلة مباراة صلاح الجزولي ..راجعوا (كتاب الجغرافيا) الدرس الخامس عشر.
· في القهوة – او في البيت….(هل سكر زيادة ام سكر خفيف؟)…انا حايم على الناس بي العبارة دي.
· محجوب شريف عندو علاقة غريبة مع (الشاي) زي علاقة كاريكا لمن يتقدم – بقيف ..يقول يمشي – لا يجي راجع – تاني يفكر يكمل.
· يكمل.
· اللخبطة ما ضروري تكون باللبن.
· واللبن ذاتو ما شرط يكون مفور.
· والموز لو طلع من (الفواكه) – كان زاحم (البامية) في حلة الملاح.
· والفرحة بتقوم وتقع.
· خلونا نفرح.
· مرات بتحصل يجيبو ليك (شاي) بدون (شاي) وقت تشوف هدف (بشه) في مجموعة من حراس المريخ …(اكرم – رمزي – الحضري).
· عيييك – مجموعة من الحراس.
· الاتحاد العام لحراس مرمي المريخ – كلهم انضربوا من محمد أحمد بشه.
· بشه ما خلى ليه جنسية.
· اخير شيء جابوها (يمنية) وخلوطها مع (يوغندية)
· قون بشه بقى لينا زي (الشاي).
· لا استغفر الـلـه العظيم – الشاي بقى لينا زي قون بشه في المريخ.
· عادي شديد.
· ما في (فرحة) بيبعوها.
· ما في (بهجة) بيشتروها بالقروش.
· دا الكلام البقولو ليكم من بداية العمود – الباب فاتح على القلب.
· تدخل بتلقى ليك (قون).
· ما بتمشي السوق – وتخش سوق الفواكه عشان تجيب ليك (ضحكة) وتجي راجع.
· ممكن تلقى ليك (بطيخة) بالطريقة دي.
· شمامة.
· قرعة بيبعو فيها في سوق الفواكه.
· ما عارف (القرع) البجيبو سوق الفواكه شنو؟.
· فوضى بس.
· الفواكه ما عندها قوانين.
· ما عندها لوائح – ولا جوازات سفر.
· لكن (ضحكة) بالقروش الدنيا كلها ما بتلقاها.
· ولا بتطلع بـ (بسمة).
· ما في ضحكة بتشتريها بي قروشك.
· لكن الهلال يمكن ان يمنحك كل هذه الاشياء.
· يمكن ان يمنحك البهجة والفرحة والضحكة.
· مساوي على بشه.
· كاريكا على نزار.
· ما في اكتر من كدا.
· ادخل مباراة للهلال – ح تلقى (الفرحة) كلها في الطرف الشمال للهلال.
· من زمن تنقا وزاهر مركز ومحمد حمدان الى زمن عبداللطيف بويا ومحمود ام بدة.
· لو عاوز (البهجة)..شوف (الثعلب).
· من جيل لي جيل.
· من جمال الثعلب الى جيل صهيب الثعلب.
· في الهلال في (تجايل).
· بشه الصغير بيلعب في حضرة بشه الكبير.
· ولا غلطة.
· مرات وقت اسمع وردي بغني في (جميلة ومستحيلة) لمحجوب شريف – بقول بعد الاغنية دي مفروض (اطهر الطاهر) يجيبها من (الكورنر).
· عاوزين شنو اكتر من كدا.
· مرة دخلت مباراة للهلال – لقيت ليك الجماهير دي تهدر زي (الـلـهب).
· رحت في الاستاد.
· ضعت في المدرجات.
· المدرجات كانت بتغلي…زي القروش الفكة وقت تكون في جيبك – بتكركب كركبة شديدة.
· بتغلي بدون تعصب.
· بدون ضغط على اللاعبين.
· وبتشجع – وتساند.
· واحد اجنبي شاف الجماهير بتهدر كدا – قال لي الهلال دا ما عاوز ليه (مدرب) مع الجماهير دي.
· الجماهير تاني جاطت وشجعت.
· اضانك ما بتشوفها من (التشجيع).
· وتشجيعك ما بتسمع مع الاضانين.
· الاجنبي اتلفت علي وقال لي الهلال دا ما عاوز ليه (حارس مرمى)…الجمهور براهو حارس الهلال.
· وقت التشجيع زاد – الاجنبي قال لي : ولا عاوز ليه طرف شمال.
· زولكم بقى كل خمسة دقائق يقول لي الهلال ما محتاج طرف يمين.
· الهلال ما عاوز ليه ارتكاز.
· ارتكاز مع الجمهور دا.
· ولا صانع العاب.
· لمن وصلنا الدقيقة (70) – كنا وصلنا لي (رأس الحربة).
· ما في غير (رأس الحربة).
· الاجنبي عاين لي كدا – وقال لي الهلال دا ما عاوز ليه (رأس حربة)..جمهور الهلال دا وقت يكورك (القون) راهو بيجي.
· اصلو ا محتاجين لينا لي لاعب.
· الجمهور براهو غالب.
· براهو بدافع.
· وبراهو بهاجم.
· بطلع القون.
· وبجيب قون للهلال.
· الدقيقة تسعين جاءت …الهلال غالب ..والجماهير حاجة مبالغة.
· الدخل وصل المليار.
· عاينت للاجنبي وانا بعاين في المقصورة – قلت ليه الهلال دا ولا عاوز ليه (رئيس).
· صلاح ادريس جاء عملها لينا كلها (ديون).
· الامين البرير عملها لينا كلها (دكاكين).
· والكاردينال عملها لينا كلها (بكري المدينة).
· ما عاوزين لينا رئيس.
· ولا عاوزين لنا (اعلام) وناس تكتب عن الهلال وجرايد تمجد في سيد البلاد.
· الناس براها عارفة.
· والجمهور براهو واعي.
· شجعوهم.
· وساندوهم.
· وقابلوني ان شاءالـلـه بكرة في هذه المساحة.
· بنحددها مع (الفرحة).
· ونقطعها ليكم.
· ………………
· ملحوظة : يا صلاح الجزولي كمل الجملة.

هوامش
· اندرزينهو عندو (هندسة) براهو.
· غير هندسة جامعة الخرطوم.
· اندرزينهو عندو فلهمة خاصة بيه.
· قسمها كدا.
· واجمعها.
· واطرحها.
· وارجع لينا.
· اصلو ما في مشكلة.
· الوصول للنقطة الثامنة ان شاءالـلـه يعني تأهل الهلال رسميا من مرحلة المجموعات.
· اهم تلاتة نقاط في البطولة.
· عاوزين نصل للنقطة التامنة.
· عشان نشوف بعد كدا البحصل شنو؟.
· والنقطة التامنة بتجي بي الجمهور.
· الاعصاب الهادية والتشجيع المستمر.
· الهلالاب لو عاوزين يجيبوا ليهم بطولة – يشجعوا من الليلة بطريقة راقية وجميلة وقوية.
· اهم شيء القوا في التشجيع.
· الفرجة ملحوقة.
· اتفرجوا في مباراة الهلال والميرغني.
· في مباراة الهلال والرابطة.
· نظروا في مباراة النسور.
· لكن مباراة (التطواني) شجعوا ساي.
· ساندوا ..وما تعترضوا.
· ما تحبطوا اي لاعب.
· ابقوا (الريح) في وجه خصوم الهلال.
· المقبرة سعيدة بان تضم (ضحية) جديدة لضحايا الهلال.
· ما تقعوا في المحظور – عشان ما نفقد الجمهور.
· الهلال معرض لأن يفقد (9) من لاعبيه في المباراة القادمة.
· ومهدد ايضا بان يفقد جماهيره.
· الشماريخ مرفوضة.
· ابقوا فرحانين.
· الهلال الليلة ان شاءالـلـه مية المية.
· الثلاثية – ما بعيدة عن العين.
· نسأل الـلـه ان يتم شفاء الحبيب داؤود مصطفى صاحب القلب الابيض والقلم الازرق.
· داؤود – احد الذين جمّلوا لنا الهلال وقدموه لنا بكل هذا الحب.
· الشفاء العاجل الـلـهم لاكثر الصحفيين نقاء وصفاء وجمال.
· كما نسأل الشفاء العاجل للحبيب معاوية الجاك ..(فارس المريخ المغوار).
· معاوية اصابته (عين)…وسلامتك يا زول يا رائع.
· الديبة عايش في القرن السابع عشر.
· الديبة قال امس في قناة النيل الازرق ..مفروض تتوقف الصحف الرياضية ..عشان الهلال والمريخ يمشوا في البطولة.
· الزول دا عايش وين؟.
· انت قايل الدنيا دي هلال مريخ.
· لا برشلونة ولا الريال.
· لا الاهلي ولا الزمالك – وقفوا ليهم الجرايد عشان يحققوا بطولات.
· اتخيلوا بعد الثورة التكنلوجيا دي كلها ..وعلوم الاتصالات التى جعلت العالم (غرفة) – الديبة يطالب بايقاف الصحف الرياضية.
· يا الديبة لو عاوزها تقيف ..شجع ليك اي فريق درجة تانية في ام درمان ..(ما في اي تغطية صحفية عليه).
· اتخيلوا بس زول يقولوا شيلوا الكهربة.
· او اقطعوا (النت).
· …………
· عاجل : بكرة ان شاءالـلـه تعالوا لي بي جركانات العسل – في نفس الحتة.

شارك الموضوع :

تعليقات الفيسبوك

تعليقات


4 التعليقات

إنتقل إلى نموذج التعليقات

      1. 1
        الخابور

        وقابلوني ان شاءالـلـه بكرة في هذه المساحة.· بنحددها مع (الفرحة).· ونقطعها ليكم

        عاجل : بكرة ان شاءالـلـه تعالوا لي بي جركانات العسل – في نفس الحتة

        أهديك أغنية (جيتو ومالقيتو .. جاني وما لقاني)

        بالمناسبة (“جالك” كلام الديبة؟) وقع لك؟ فهمتو؟ عرفتو؟

        الرد
      2. 2
        دجانقو

        دى شنو الهرجلة دى ؟ انت بتغش في نفسك ولا بتكابر ولا بتكتب شنو ياخوى هلالك انضرب شوف ليك حاجة تانية

        الرد
      3. 3
        حام وسام

        حمام طقش حمام
        اظنك تبينت كلام الديبة … هو بيعني عينتك دي

        الرد
      4. 4
        محمد القانوني

        أهـــا يا العشا بلبن : إن شاء الله السكر بتاعك ما يكون طار السما مع (الضغط) المغاربي ده؟

        قال سكر خفيف قال؟؟ من متين هليكم ده ببرد بطن؟؟

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *