زواج سوداناس

عايزة.. حقي


د. ناهد قرناص: احتمال ان تترأس السودان أمراة ...كتب هذا الكلام صديق اسفيري فانفتحت عليه كما يقول المصريون (طاقة جهنم)

شارك الموضوع :

فيلم (عايز حقي ) ..للممثل المصري هاني رمزي ..فيلم كوميدي ..يناقش بطريقة ساخرة قضية المال العام ماله وما عليه ..اذ يكتشف الممثل فجأة وبعد قراءة متأنية للدستور المصري ..بأنه كمواطن له حق (حتى ولو كان صغيرا) في كل المؤسسات العامة المملوكة للدولة .. ويمضي الفيلم في مفارقات مضحكة ومواقف كوميدية ..بعد قرار البطل ان يأخذ حقه عنوة واقتدارا ….وحكينا القصة دي لييييه؟؟؟ …لاني قررت بكامل قواي العقلية ..ان اطالب بحقي كمواطنة سودانية …أقوم بواجبي كاملا كموظفة دولة ..ادفع ضرائب عن يد وانا صاغرة ..وتؤخذ الزكاة شهريا من مرتبي قبل ان يوضع في حسابي وحتى قبل ان يسمع به (اولاد عمه)..بالرغم من أنهم عارفين اني عارفة انهم عارفين ..ان مرتبي لو جمع الى بعضه لمدة خمسة سنوات لن يبلغ النصاب ..لكن برضو (ما فوكها شئ )… … انا فقط أريد حقي في المؤسسات (الباقية) والتي لم تصلها يد الخصخصة بعد ..
. طبعا فكرت وبصرت كثيرا ..لكني لم اجد مكانا لم تمتد اليه يد الخصخصة ..كل الحاجات الكبيرة تمت خصخصتها ……لكن لمبة عبقرينو (جزاها لله عني خيرا )…اجتهدت وبحثت ونقبت ..عن اماكن وأشياء لا تزال في ملكيتنا ..(حلوة ملكيتنا دي مش كدا ).. فكان هذا التصريح :

بالاشارة الى الموضوع أعلاه واستنادا الى حقي الدستوري كمواطنة كاملة الاهلية وسودانية الجنسية بالميلاد .. اطالب بحقي كاملا ليس في سودان لاين …قبل ان تكتمل قصة بيعها …. كذلك لا اطالب بحقي في قاعة الصداقة (ما تقولوا لي خصخصوها؟؟).. ولا حتى (قصر الشباب والأطفال ) !!.. ما يكون تم بيعه وانا نايمة في العسل …ليس أيضا في معمل استاك ؟؟؟ .. .. دا كلو انا عافية ليكم …لكني وحتى لا اطيل حيرتكم … … ..في الحقيقة وبي صراحة ..انا عايزة نصيبي من مياه النيل..ايوة.. النيل سليل الفراديس ..الواحد دا ..قبل ان تمتد اليه يد الخصخصة ونصحو ذات يوم لنجده قد احيط بسياج ووركبت امامه لافتة تفيد بوضع يد الشركة الفلانية عليه ..اريد حقي من النيل …وعشان أسهل الموضوع عليكم …ادوني ليهو موية عديل كدا .. …وانا ان شا الله حأتصرف وابيع هذه المياه …لا ليس في الصحراء الكبرى..ولا في بلاد الواق الواق ..بل هنا في احياء العاصمة الحضارية …وعندما تجتمع لدي كثير أموال ان شا الله تعالى ….سأهاجر الى ذلك الكوكب شبيه الكرة الأرضية المكتشف حديثا ..الواقع على بعد الاف السنين الضوئية…لا ما تحلفوا علي …اني مغادرة …..هناك سأحط الرحال بأذنه تعالى .. وأشتري قطعة أرض ناصية ..في منطقة مرموقة في الخرطوم بتاعة الكوكب داك …طبعا اكيد بتكون فيها كافة الخدمات من مياه وكهرباء وصرف صحي ..وشارع ظلط قدام البيت …ووووو انا في قمة سعادتي ب (قزازة السمن ) هذه ..اذا بصوت سعدية النكدية يهمس لي (وين انت يا زولة …انتي ما سمعتي ؟؟ما قالوا ليك … الحتات كلها باعوها )….صباحكم خير

د. ناهد قرناص

شارك الموضوع :

تعليقات الفيسبوك

تعليقات


1 التعليقات

      1. 1
        إندستين

        الناس شغالين بيع وشراء واجار من بدرى خلاص .

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *