زواج سوداناس

بالغتو يا ناس الجمارك



شارك الموضوع :

المواطن السوداني (محمد الصديق) المقيم بمدينة لندن بعث لي برسالة ساخطة ومستغرشة وسوف تسخطون وتستغرشون تماماً عندما تلموا بالتفاصيل التي تقول :
قام المواطن المذكور بإرسال طرد بريدي صغير عبر شركة (DHL) المعروفة ببوليصة رقم 606826060 وذلك في يوم 15 /7/2015 ، محتويات الطرد يا سادتي الأفاضل كالآتي :
عدد 2 فتيل دواء شراب أطفال ، عدد 1 صندوق شاي زنة 180 جرام مع (ورقة) تحتوي على (إقرار) وورقة أخرى تحتوي على (توكيل) ..

وصل الطرد إلى مخازن ((DHL بالخرطوم م وقامت الشركة بإخطار المستلم (شقيق زوجة المواطن) ولكن عند ذهابه للإستلام في الساعة العاشرة يوم الثلاثاء 4/8/2015م أخبرته الشركة بأن الطرد (حجزوهو ناس الجمارك) فتوجه في الحال للجمارك حيث أخبروه بأن الضابط المسؤول (مشى ليهو فاتحة) وعليه الإنتظار حتى يعود, إنتظر صاحبنا حتى الساعة الثانية ولم يحضر الضابط من الفاتحة (يكون خرم على البيت) فقالوا ليهو (الضابط بعد ده ما بجي تعال بكرة) !
جاء صاحبنا تاني يوم للجمارك قالوا ليهو الضابط في الفطور ، وعندما عاد الضابط شرح له الموضوع وأعطاه (البوليصة) قال له الضابط :
– شوف قيمة الظرف ده 50 جنيه إسترليني فيهو شاي حب وفتيلين دواء شراب فلازم (نجمركو) وتشوف ليك مخلص
– (في إستغراش) : يا جماعة جمارك شنو ومخلص شنو .. وخمسين جنيه إسترليني بتاعت شنو؟
ده شاي (حب) ودايل فتيلين دواء أطفال وديل ورقتين واحدة توكيل والتانية إقرار لإستخراج جواز لي طفل ماشي القاهرة يتعالج !
– يا شيخنا ده (قانون) ولازم تدفع جمارك على الحاجات دي ما يعادل 50 جنيه إسترليني زي ما مكتوب على الظرف !
– يا جماعة المكتوب على الظرف ده دي قيمة الرسوم الإندفعت في السفرة للتوكيل والإقرار دخلها هسه شنو في الموضوع !
– شوف أنحنا ح نشيل 50 ألف جمارك لصندوق الشاي ، و 280 ألف للورقتين (التوكيل والإقرار) و 50 ألأف لي فتيلين الدواء و 20 ألف رسوم أرضية .. والمخلص بيشيل ليهو 220 ألف جنيه يعني الموضوع كدة 620 جنيه !
– (أعصابو باظت وجاب ليهو كوز فاضي) : مش الشاي ده أهو كبيتو ليكم في الكوز .. ما عايزو .. ومش فتيلين الدواء ديل برضو ما عاوزهم … بس أدوني الورقتين ديل !
– يا شيخنا مافي كلام زي ده .. يا تدفع وتشيلهم كوووولهم يا تخليهم كوووولهم !
لم يكن أمام صاحبنا إلا الإنصياع (للحكومة) ، وكسباً للوقت قام بدفع المبلغ الذي حددته (الحكومة) حتى يستلم الورقتين (التوكيل+الإقرار) ليتمكن الطفل المريض من السفر ..
نقول للمواطن السوداني (محمد الصديق) ياااخ جات سلامة فقد كان من الممكن أن تتم (جمركة) الإقرار والتوكيل عن طريق عدد الأحرف أو الكلمات أو نوعية الطباعة (ليزر ، عادي، خط يد) أو نوعية الورق (مصقول شفاف عادي) أو وزنه (80 جرام ، 90 جرام، 100 جرام) وكمان أسود وللا ملون !
بالطبع هذا مبلغ خرافي لطرد صغير قد لا يصل وزنه (نص كيلو) ولا يحتوي علي أغراض ثمينة وهذا المبلغ بالفعل يدعو للإستغراش ولكن ما يدعو للإستغراش الشديد هو إنو الورقة بتاعت الإقرار والورقة بتاعت التوكيل عليهم جمارك؟ شئ فعلا يدعو للإستغراب والتأمل ؟
دعونا نتساءل وريالة الأطفال في (أفواهنا) ما هي الأسباب المنطقية التي تجعل السلطات تاخد جمارك 120 ألف على ورقة مطبوعة واااحدة ؟ … غايتو يا ناس الجمارك بتباااالغو !!

كسرة :
سؤال غبي : الحكومة بتشيل (جمارك) على الدواء عشان ترجعا للمواطن في شنوووو يعني أحسن من صحتو ؟؟

• كسرة ثابتة (قديمة) :
• – أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و)+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و)+و

شارك الموضوع :

تعليقات الفيسبوك

تعليقات


6 التعليقات

إنتقل إلى نموذج التعليقات

      1. 1
        ABDUL

        سألت عن الاسباب ياجبرة . . .
        الاسباب هى هذا الشعب السجمان الهزلان الذى يصبر على حكومة خايسة لربع قرن . . حكومة ليس لها هم الا العيش على أكتاف المساكين . . حكومة امتهنت واحترفت الخداع والتضليل واكل مال السحت .
        ياجماعة الخير لاتضيعوا وقتكم فى الفاضى مع هؤلاء العسكر فلن يأتى منهم خير ابدا ولو حكموا السودان لمليون عام لأن عقليتهم مبنية على المناورة والالتفاف والخطط والكمائن والتدمير , هدا كل مايفهمونه فى الحياة . . واتحدى اى انسان ان يشير الى دولة واحدة حكمها العسكر وتقدمت خطوة واحدة .

        الرد
      2. 2
        كايدهم

        اخونا الفاضل جعفر عباس يديك الصحة والعافية
        يا اخي قدر ما حاولت ابلع القصة ابت شربت كبايتين موية برضو ابت تنزل ، لانه يا شيخينا متعودين نرسل بالبريد الممتاز اشياء كثيرة واغلى ثمنا واكثر عددا ولكن لم نسمع مثل هذا الكلام قبل فترة قصيرة ارسلت شنطة طلب صاحبها بعض الاشياء فكانت اشياء ثمينة وتكاد تصل لشيلة عرس والله وصلت بالتمام والكمال ..يل اوصلوها الى غاية محل صاحبها .. تتصور كدا…
        كما اني شاهد على اكثر من مرة البعض يرسل جوالات تصل وبدون اي جمارك .. واذكر اني كنت مرة في البريد ارسل بعض الرسائل فوجدت سوداني وزوجته يرسلون شنطتين كل شنطة بالوزن لاقصى المسموح به للطرد وهو 30 كجم .. سالتهم الا توجد مشكلة في ارسال الشنط مع الجمارك اجابوني والله عادي بتوصل وما بتكون ناقصة .. هرشت راسي وقلت معقول الجمارك السودانية بقوا كرماء كدا ؟؟لاحظ بريد ممتاز يعني يوصلوا الطرد الى صاحبه في مكانه
        والاهم من ذلك انه الان انتظمت حركة نقل سريع بين السعودية والسودان عن طريق الشاحانات او سيارات الصالون المعروفة بسيارات العوائل .يوصلون الارسالية الى بيتك دون نفصان .. وياخذون مبلغا مناسبا للبرميل او الشنطة ..
        اما قصة هذا الطرد يعلم الله قوية ولو حقيقة ما خيال كاتب علي الطلاق ما كنت اشيل اي ورقة واخلي الراجل يمشي المطار ويديهم لاي راكب جاي ..وبعدين شاي شنو البرسلوا من لندن معليش يعني الزول دا فارغ الا يكون شاي سحري وماشاي عادي
        ودواء الكحة . مافي شيء مالي الرفوف قدره في الخرطوم فايه المغزي في ارسال فتيلن يا اخي لو طلبهم من اي زول من السعودية كان اشتراهم وارسلهم مع اي مسافر..
        كدا اقرأ تاني وراجع صاحبك .. يكون كان طاشي شبكة ؟؟؟ او انتي اديتها كوز من عندك وانت اتاريك بتاع كيزان

        الرد
        1. 2.1
          شعبولا

          يا كايدهم جعفر عباس الدخلو في الموضوع دة شنو؟ دة اسمه الفاتح جبرا صاح؟؟؟

          الرد
      3. 3
        ود الحاج

        سؤال غبي : الحكومة بتشيل (جمارك) على الدواء عشان ترجعا للمواطن في شنوووو يعني أحسن من صحتو ؟؟
        اجابة ذكية:الحكومة بتشيل جمارك على الدواء عشان نرحعا له قطعة ارض بالمجان يتم الدفن بها بعد الوفاة . انت ماعارف اسعار الاراضي بالسودان وصلت كم؟ بس فالحين تنتقدوا . دي مش خدمة تشكر عليها الدولة.

        الرد
      4. 4
        weeew

        نقول حسبنا الله و نعم الوكيل زكاة – ضرائب – جبايات – شى غريب كيف يمكن ان يتطور السودان و نحنه ذاتنا بنساهم في تعقيد أمور البلد

        الرد
      5. 5
        شنداوي

        تأكيد لكلام اخونا كايدهم يعلم الله رسلنا موبايلات حديثه ولابتوبات جديده بنفس شركه ال DHL
        وصلت في تلاته او اربعه أيام كامله وتم تسليمها لاخي بالخرطوم دون حتي فتحها

        كلمه حق نقولها بالرغم من كرهنا الشديد من هذه الحكومه

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *