محمد عبد الماجد

رزاق يا كريـــم


جمال الوالي صدق..وطلع يتكلم…ويعمل في الحوارات..زولكم بقى زي صلاح ادريس..فاضل ليه بس يعمل ليه (عمود)
“”””””””””””””””””””””””””””””””””””
والله البطولة الافريقية لو حكامها بجيبوهم من اوروبا …كان طلعتوا من ايام (عزام)
“””””””””””””””””””””””””””””””
امير كمال (رزاق) بفوت فيه زي (فلاش) الكاميرا ..وامير كمال واقف في حتتو
“”””””””””””””””””””””””””””””””””””
انتوا جنيتوا…تظلموهم في المباراة الاولى وتمشوا ليهم في عطبرة..في قوة عين اكتر من كدا
“””””””””””””””””””””””””””””””””
• شفتوا الموضوع من يظهر ليك فيه (تحالف المريخ) اقنع منو.
• جماعتكم لقوا (بياناتهم) البتطلع متل (صواني الخبيز) من وقت لآخر ما فيها فائدة.
• قالوا احسن نلحق السوق.
• احسن نمشي نقعد مع جمال الوالي ..ويكون لينا من الكعكة نصيب.
• خافوا المريخ يمشي لي قدام ..وهم برة الشبكة.
• قاموا عملوا شنو؟.
• شوفوا جماعتكم بتوع التحالف : (استقبل السيد جمال الوالي رئيس مجلس الإدارة بمنزله مساء الأربعاء بحضور نائب الرئيس عبدالصمد محمد عثمان والأمين العام الفريق طارق عثمان الطاهر ونائب الامين العام متوكل احمد علي وعضو المجلس حمد السيد مضوي استقبل وفد التحالف بقيادة السيد نادر إبراهيم مالك والسيد عمر حجوج والمهندس محمد بشارة والسيد عمر محمد عبدالله والسيد فيصل صلاح والسيد طارق أبو العائلة . وكان اللقاء وديا للغاية تناقش فيه الجميع حول الهم المريخي . وقدم وفد التحالف التهنئة لمجلس الإدارة بمناسبة الانتصارات التى حققها الفريق مثمنا دور رئيس المجلس واعضاءه في دعم الفريق مؤكدين مساندتهم للفريق حتى نهاية المشوار . مجلس الإدارة ثمن الخطوة من قبل قيادات التحالف وأكد أن الأنتصارات تحققت بتضافر كل منسوبي الكيان).
• يا جماعة الضيق شنو؟.
• كان تنتظروا المريخ يصعد لنصف النهائي.
• الخفة ما كويسة.
• كان تتقلوا شوية.
• قالوا نلحق المولد.
• قاموا مشوا بي نادر مالك.
• نادر مالك ذاتو جابوه ليك في الصورة قاعد.
• خلاص الموضوع من يبقى فيه (تحالف) اقنعو منو.
• الموضوع بايظ من تحالفو.
• واصلا الموضوع من يبقى فيه (تحالف) اعرف طوالي الموضوع ما بمشي لي قدام.
• ولا سنتمتر.
• تحالف نحن في جامعة الدول العربية ..دا شنو البتعملوا فيه دا؟.
• عشان كدا جات هزيمة المريخ من الامل.
• اما جمال الوالي صدق.
• صدق عديل كدا.
• وطلع يتكلم…ويعمل في الحوارات.
• زولكم بقى زي صلاح ادريس..فاضل ليه بس يعمل ليه (عمود).
• ويلحن.
• ممكن بعد كدا يلحن.
• عادي..ما ناقصه شيء بعد (التنظير) الكتير دا.
• والفصاحة الما في ليها داعي.
• نحن قلنا ما نقول اي شيء.
• قلنا نسكت.
• عارفين الجماعة مغشوشين.
• مخدوعين.
• ما عندهم اي شيء.
• دي الخسارة التالتة في الممتاز..وبتكلموا عن البطولة الافريقية.
• والله البطولة الافريقية لو حكامها بجيبوهم من اوروبا …كان طلعتوا من ايام (عزام).
• ما كان بتصلوا للمرحلة دي.
• الردح ظهر في عطبرة.
• الحقيقة بانت هناك.
• ليكم حق تقولوا ما بنعيدها.
• ليكم حق تعملوا (زغبير).
• لو عادوها ليكم اشترطوا ما يلعبوا (رزاق).
• رزاق ..يخيط ليك في (المعز محجوب) متل (الحلو مر).
• المعز محجوب يطلع يلقى ليك الكورة جوة.
• المعز في شندي اتهزم امام الاهلي شندي.
• وفي عطبرة اتهزم امام الامل عطبرة.
• يعني نهر النيل طلع منها ساكت.
• المريخ في الفاشر اتعادل في النقعة.
• في عطبرة اتهزم عديل كدا
• وبتكلموا ليك عن البطولة الافريقية.
• البطولة الجابت ناس التحالف جاريين.
• ونحن عارفين برضو ان جمال الوالي من يقعد يصرح ..الموضوع بيمشي لي تحت.
• ما بمشي لي قدام.
• بقى على المريخ التحالف وتصريحات جمال الوالي.
• شوفوا جمال الوالي من الفرحة قال شنو؟.
• (قال رئيس نادي المريخ جمال الوالي ان المريخ الان يمتلك فريقا متميزا ويضم عددا من النجوم الكبار على غرار احمد الباشا وراجي عبدالعاطي ورمضان عجب وضفر وقال أيضاً يضم الفريق محترفين متميزين ساهموا في دعم مسيرة الفريق بشكل متميز).
• الكلام دا في المريخ.
• في مريخ ضفر.
• والمعز محجوب.
• وامير كمال.
• امير كمال (رزاق) بفوت فيه زي (فلاش) الكاميرا ..وامير كمال واقف في حتتو.
• بالمناسبة ليه جمال الوالي تحدث عن الباشا وراجي ورمضان والمحترفين وما جاب سيرة لي بكرى المدينة.
• بكري المدينة يشيل ويقع ليكم.
• والحكم يشيل ويحسب في (ضربات الجزاء) – تقول سايق ليه (لوري).
• عارفين الفضل برجع للحكم.
• بكري المدينة ما قاعد يعمل شيء.
• لا عمل في النقعة.
• ولا عمل في عطبرة.
• بعد كدا جايبنو لي شنو؟..يصور ليكم الحفلة.
• (وقال رئيس نادي المريخ الى انهم في مجلس الإدارة يقفون بكل قوة خلف الجهاز الفني بقيادة غارزيتو وقال في حوار عبر الاذاعة الرياضية :نفذنا كل ما طلبه الجهاز وسننفذ كل ما يطلبه في المراحل القادمة ايضا ومضي رئيس نادي المريخ السيد جمال الوالي في الحديث حول حظوظ فريقه للترقي للمربع الذهبي قائلا : موقف الفريق جيد ويملك امكانية العبور للمربع الذهبي في المباراتين القادمتين امام العلمة واتحاد العاصمة و نأمل في انتزاع صدارة المجموعة بالفوز في الجزائر على العلمة والانتصار كذلك على اتحاد العاصمة الجزائري واستبعد السيد جمال حدوث التواطؤ بين الاندية الجزائرية وعد رئيس نادي المريخ بإقامة معسكر تحضيري بإحدى الدول الأوربية لو تمكن المريخ من تكرار انجاز بطولة مانديلا).
• شفتوا الكلام دا..والخسارة الوقعت دي جابو الحديث معسكر اوروبا.
• معسكر في اوروبا مرة واحدة.
• الكلام دا قالوه قبل (عطبرة).
• غارزيتو الزول العاقل..الزول الفاهم فيهم كورة تصوروا برضو بعد مباراة المريخ ووفاق سطيف طلع يتكلم عن (البطولة).
• بطولة شنو؟.
• كدا امرق من (عطبرة) اول حاجة.
• غارزيتو من كسيّر التلج بقى يلبس في الجلاليب والعمة.
• جابوه ليك استاد المريخ ..تقول ماشي على دار فلاح زي ما قال الهلالي عصام السنوسي.
• طلعوا يكلمونا عن اكرا.
• وعن كوفي.
• وعن شيبوب.
• وبكري المدينة.
• ديل لو كانوا في الهلال ..مباريات الهلال بيتابعوها من (المقصورة).
• يا حليل ايمن سعيد.
• يمكن ايمن سعيد لو كان لاعب كان بضرب ليه لاعب من الامل.
• لكن ناس عطبرة صعبين.
• ما في حكم بيقدر يظلمهم.
• كفاية عليهم انكم ما اعدتوا مباراة الدورة الاولى…كمان بتمشوا ليهم بعد كدا في دارهم.
• بتمشوا ليهم في عطبرة.
• انتوا جنيتوا.
• تظلموهم في المباراة الاولى وتشموا ليهم في عطبرة.
• في قوة عين اكتر من كدا.
• بي سبب المعز محجوب ..(رزاق) عاوز يبقى هداف الممتاز.
• قالوا ليك المباراة لو استمرت دقيقة زيادة..رزاق كان جاب هدفو التالت.
• هدف بالقدم.
• وهدف بالرأس.
• فضل شنو تاني.
• الهدف الاول ..دفاع المريخ امير كمال وعلي الريح ..واقفين زي البفتشوا في (شليل).
• امير كمال لاعب تقيل ..اي مهاجم سريع ممكن يفوت منو.
• عمق المريخ اسهل للاختراق.
• الهدف التاني ..(رزاق) عمل الحاجة الفي رأسو.
• نزل للكورة في الواطة.
• الكورة وصلت المعز محجوب زي (الرصيد).
• ما قدر يعمل اي حاجة.
• المعز اصلو كدا.
• على العموم هذا هو المريخ.
• ودي حقيقتو.
• يمكن المباراة لو حاكمها (لامبيتي) كان حسب ليكم ضربة جزاء.
• تقوموا تحلفوا طلاق.
• يقوم تاني يحسب ليكم ضربة جزاء.
• تقولوا ضربات الجزاء الكتيرة دي ما كفاية.
• يقوم يطرد ليكم لاعب.
• لامبيتي ما فاضل ليه في مباراة المريخ ووفاق سيطف …إلّا يشيل ليه (رق) ويقعد يغني ليكم (يا جميل يا راقي احساسك).
• قبل مباراة المريخ ووفاق سطيف واحد شاف ليك غارزيتو لابس ليه جلابية وعمة.
• قلت ليهم دا شنو (التلج) دا؟.
• زولكم قال لي غارزيتو ساهل …انا خايف المريخاب ديل يلبسوا ليكم الحكم (جلابية وعمة).
• خايف يجيبوه ليكم المباراة القادمة بي جلابيتو وعمتو.
• بعملوها.
• ممكن يعملوها مع ضربات جزاءكم الكتيرة دي.
• ………….
• ملحوظة : ملعب عطبرة مشكلتو نجيلته ما طبيعية ..وحكمو ما افريقي.
هوامش
• مدني امس فقدت الشاب الهلالي .عبدالمنعم عبدالله بعد معاناة طويلة مع المرض.
• الراحل عبدالمنعم عبدالله رغم معاناته مع المرض ..كان يتابع مباريات الهلال وهو في غرف العناية.
• فقدناه وهو زهو الشباب.
• نسأل الله له الرحمة والمغفرة.
• الاحزان تمتد هذه الايام لتحصد اعز الناس ..واكثرهم حياة ونضارة ونشاط.
• الهلال حقق انتصارا سهلاس على الميرغني كسلا.
• مطلوب من الهلال ان يلعب مباريات الممتاز بمسؤولية.
• الممتاز بطولة ليس للتجريب.
• وما بنقبل فيها اي خسارة.
• الكوكي يفترض ان يعلم ذلك.
• مباراة مازيمبي الاعداد النفسي اهم من الاعداد البدني.
• الدعم الجمهوري هو ما يحتاجه الهلال الآن.
• الهلال لا بمرض ولا بموت.
• ……………
• عاجل : لامبيتي قالوا ضرب من بلدو قال هدف رزاق الاول (تسلل) والتاني لمست ايد.


‫4 تعليقات

  1. بركه الليله المرقتا من جحرك … لكن ابشر بطول سلامه ح ترجع قرييييبب و ما اظنك بتمرق منو تانى …

  2. مرقتا من جحرك اشتغل في فريقك وخلي اللماطة بتاعتك دي ليك اسبوعين ساكت زي الولية انتقد فريقك وشوف سبب مشكلتكم شنو مالك ومال المريخ دا شعر ما عندك ليهو رقبة يا بتاع الصحافة الصفراء

  3. (عاجل : لامبيتي قالوا ضرب من بلدو قال هدف رزاق الاول (تسلل) والتاني لمست ايد.)

    يا للجهل , لمسة يد بكتبوها كده أيها الجاهل؟ , إنت يا كافي البلاء لا بتعرف كورة , ولا بتعرف عربي؟؟؟

    قال (لمست) ايد قال!!!

    يا أمة ضحت من جهلها الأمم!!!

  4. أولاً يا ود عبد الماجد المفروض إنك صحفي كبير عيب والله تقع في أخطاء إملائية لا يقع فيها أطفال رابعة إبتدائيه ( لمسة) يد وليس ( لمست) يد كما كتبت والله يرحم العربيه ، وبعدين كلامك فطير وبتاع مشجعين درجه ( خامسة) معقوله بس ديل صحفيين ( كان الله في عون السودان) .