زواج سوداناس

د. عاصم بكري : تأملات ساخرة



شارك الموضوع :

يوم مشينا أنا و مصطفي صاحبي وزوجته هند لزيارة قريب مصطفي ، وصلنا هناك دخلت هند وقعدت جوه مع رشا زوجة محمود ،، وقعدنا نحنا في الصالون !
بعد ١١ دقيقه بالظببببط هند جات مارقه ،، وركبنا العربيه ورجعنا البيت ! ، لحدي هنا تمام ؟
يلا الماتمام القصه الجايه دي ! 👇
في الطريق مصطفي وهند زوجتو بتونسوا مع بعض :
مصطفي : طبعا رشا بتبقي لي محمود من جهة أبوهو !
هند : ااي ، بنت خالة أولاد أعمامو ،، لاقاها في عرس ود عمو
مصطفي : يعني ما اتلاقوا أول مره في الجامعه
هند : لالا هي درست محاسبه وهو درس اداره
واستمرت الونسه …… ومصطفي يحكي حاجات غلط … و هند تصلحوا
بعد وصلنا البيت اصروا ادخل معاهم
وانا داخل في السلم سألت مصطفي : أسمعني ، انت الزول المشينا ليهو زياره ده قريبك والا قريب مرتك ؟
مصطفي : قريبي انا
انا : لأ يعني ما قريب المدام ؟
ودخلت معاهم شقتهم والونسه استمرت
مصطفي : أولاد محمود ديل بقوا سُمر شديد ،،، ماكانو كده ؟
هند : شكلهم تعبوا شديد في سفرتهم الأخيره للسودان ،، و سافروا البكاء بتاعهم ، ورشا كان عندها عرس عماد ود خالها واحتمال الجري والتعب
مصطفي : عماد عرّس ؟؟
هند : ااي عرّس زميلة سلمي أختو !
وحكت هند تفاصيل العرس ،، وكيف كان أول لقاء بين عماد المذكور أعلاه وزوجته ،، ومن ثم عرّجت بنا الي سفرهم لشهر العسل في تركيا ووالخ
أنا بقيت أعاين في يد هند عاوز أشوف الموبايل احتمال بتسأل في رشا بهناك بالواتس ،، لكن مالقيت أي تلفون في يدها
وقفت علي حيلي و قلت ليهم :
هوووي أنا ماشي منكم انتو مساطيل ساكت ،، والله ونستكم دي 👆 فيها حاجه غلط
يا هند ذكرتيني كتاب اتعلم الانجليزيه في تلاته ايام ‫#‏دي_حداشر_دقية_شنو_دي‬
وانتبه مصطفي إنّو الزياره كانت لي قريبو ما قريب هند .. وأقرّت هند بإنّو ما كان عندها أيّ معلومات عنّهم قبل ماتمشي معانا … والزياره كلها كانت ١١ دقيقه بس

شارك الموضوع :

تعليقات الفيسبوك

تعليقات


6 التعليقات

إنتقل إلى نموذج التعليقات

      1. 1
        أرسطو

        بالله عليك أنت دكتور ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

        الرد
      2. 2
        السايس

        يا دكتور راسك ده فيه مخ واللا كيس دكوة !!! ياخى فقعت مرارتنا .

        الرد
      3. 3
        بلال

        الغلط ما منو من البينشرو ليهو

        الرد
      4. 4
        الصاموتي

        أول مرة أعرف إنو ممكن تأخد ليك دكتوراة في الفارغة والمقدودة بس ما عرفت ياتو جامعة البتمنح الدكتوراة دي !!! تكون جامعة (ام جلافيط ) يا ديكتووور

        الرد
      5. 5
        البطل النميري

        بصراحة لو كنت مكانه بقدّم استقالتي من الدكتوراه …. مع الاعتذار لكل من تكبدت عيناه مشقة القراء.

        الرد
      6. 6
        محمد الرشيد

        تأملات مسخرة

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *