زواج سوداناس

الجواك (بطل)…جواك (شقلوب).!



شارك الموضوع :

*الحمد لله.
*برغم الامطار والظروف والمطبات جينا بالتلاتة نقاط.
*ياجماعة.
*انا اول امبارح لما قلت ليكم في احساس (شقلبة) جواي ماكنت غلطان.
*الجواك بطل…جواك (شقلوب).
*تلاتة نقاط رجالة وحمرة عين.
*قلت ليكم نحنا ماناس (هدايا).
*نحنا ناس (دواس) عدييييييل كدا.
*لابنعرف تحكيم ولاتنجيم ولا حسابات ولا (مطرة) ذاتو.
*ياغرزتة.
*برغم الانتصار نحنا عاتبين عليك.
*بالله كوفي دا لاعب يختوهو في الاحتياطي.
*دخل كوفي…فأنكفى الجزائريين على وجوههم.
*ود لعاب…وكراعو (طرشاء) وفيها (البركة).
*اها.
*هسي بكرة الجزائريين يقولوا ليك ناس المريخ دخلوا لينا الشوط التاني (قندراني).
*يا(القندراني)..عليك الله قوم ارقص تاني.
*ياجماعة.
*برغم الانتصار وحلاوتو…بس النصيحة لازم نقولها.
*جمال سالم دا مفروض الناس تقعد معاهو وتتكلم شوية.
*حكاية مرقاتو السااااكت دي يوم بتكتل ليها زول.
*ياجمال المرقة دي قلل منها ياخي.
*الجزائريين الكورة كلها شغالين (شنق).
*بس ربنا ستر.
*ياناس.
*الفريق البطل كلمناكم وقلنا ليكم مابرضى بالميتات.
*والاسد مابياكل (الفطيسة).
*دي بس معلومة للناس البتتكلم وتقول المريخ (محظوظ).
*نحنا ماناس (حظ)…نحنا ناس (هز).
*والداير (الهز) يجي عندنا.
باص بيني:
*التحية لمشجعي المريخ الذين آزروا الزعيم من داخل ملعب المباراة.
*تحدوا رهق السفر…والمطر…وشجعوا حتى اخر نفس.
*عشرة مشجعين بس خلوا ليك جمهور العلمة (يتبلم).
*وديل الصفوة…المنهم الناس بتأخد…وتتعلم.
باص طويل:
*عظمة يازعيم…هيبة يانجمة.
باص قون:
*اتشقلب شقلب….ياعقرب.
خانة:
*كالعادة لاحقين المطبعة…بس بكرة تعالوا بدري لسه عندنا باقي (منضمة).

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *