زواج سوداناس

بكري الدين زيدان



شارك الموضوع :

> كالعادة أكتب قبل الكورة
> كورة ابن عمي ومازيمبي
> انا وابن عمي علي الغريب
> مشكلة ابن عمي انو ما ببقى معاي علي الغريب
> لكن كلو زول بي ظروفو
> انا وابن عمي علي الغريب
> بعد مرات تجي تساعد زول في دفن ابوهو
> يدس المحافير
> الخسران طبعاً ابوهو
> المهم
> اكتب قبل المباراة
> اتمنى ان تكون فرحة الشعب السوداني قد اكتملت
> فهذا الشعب يحتاج للفرحه
> يحتاج لتجدد البسمه
> يحتاج للنسمه
> يحتاج لاستقرار الكهرباء
> يحتاج لانسياب المويه
> يحتاج لنزول سعر الدولار
> يحتاج لعاصمة نظيفه وجميله
> يحتاج لتعليم راقي وغير مكلف
> يحتاج لدخول جميع الادويه في منظومة التأمين
> يحتاج لتخفيض في الجمارك
> يحتاج لمغريات تجبر شبابه على البقاء في الوطن
> يحتاج إلى أن تصبح صالة المغادره آخر ما يفكر فيه المواطن
> ايها الناس
> نحتاج لمواطن يفكر في أن يقدم لوطنه
> قبل أن يسأل السؤال التقليدي
> البلد دي قدمت لينا شنو؟
> نحتاج لقياديين يؤمنون بأن الأمر امانه
> وهناك سؤال يوم القيامه
> نحتاج لاشياء كثيره حتى ترتسم البسمه على شفاه الوطن
> ايها الناس
> بالأمس اعلن والي الخرطوم حكومته الجديده
> من يحكم الخرطوم يحكم السودان الا ربع
> والقصه صعبه يا والينا
> القصه صعبه يا معتمدينا
> القصه صعبه يا من لقيت منصباً فينا
> تعالوا نقرر ان نجعل من هذا العام
> عاماً لخدمة الوطن
> كلنا
> تنفيذيين ومواطنين
> نقدم للبلد السبت
> وما نستنى منه الأحد
> فما نقدمه له واجب
> وما يقدمه لنا كتر خيره
> ايها الناس
> البلد مثل الوالده
> نحن مجبورين على بره
> يكفيه فخراً أنه أعطانا هواء نتنفسه
> وتعليم مجاني في حينه
> وجواز باسمه
> والشعب حبيبي وشرياني اداني بطاقة شخصية
> حقوق الوطن علينا كثيره
> لن نوفيه حقه
> ما قدمه لنا مثل ما تقدمه الأم لابنائها
> لا يستطيعون رده
> رد الجميل للبلد مستحيل
> ولكن أن ترد بعضه بنيه خالصه
> يجعل الأم البلد تعتبر باقي دينها عليك ديناً هالكاً
> فتتنازل عنه
> مجرد النيه الطيبه تجاه الوطن
> يسقط من على عاتقنا دين البلد السمحه
> المهم
> الشفوت وصلوا البلد
> بي الطياره الخاصه
> المطره نزلت في الجزائر
> وقفتها كده
> العقارب مرقت
> وعينك ما تشوف الا الشبكه
> بكرينا أرجنتينا
> بكري الدين زيدان
> ضربة الجزاء لعبها في حلق المرمى
> حلق شنو؟
> في لهاة المرمى
> حبال الشبكه الصوتيه التهبت
> لعبها بي طريقه ما لعبها بيها الا زين الدين زيدان في مرمى ايطاليا
> والغريبه القون التاني
> لافي نص دائره
> باي نق تربيع
> لكن تقسم على اتنين
> نص دائره القصه
> بكري الدين زيدان ده ما كان بعرف الحركات دي هناك
> جبناهو خامه وبقي قامه
> ايها الناس
> ريحة المطار فاحت
> والتعبئه بدت
> تلاته عبوات
> حمراء ومركبه من ورد سطيف بالجزائر
> وصفراء من اعشاب انغولا الجبليه
> أما الخضراء فمن زهور تونس الخضراء
> شخصيا عاجباني الخضراء دي
> ايها الناس
> كورتنا ضد العلمة بديناها باستهتار غريب جداً
> وحقو نعرف انو القصه ما لعب
> القصه شغل
> الاستهتار ما حبابو
> وتاني مره لن نقبل هذا الشكل من الاستهتار من اولادنا
> فبمثل ما وقفنا معكم من المدرجات دون ان نوتركم
> اسألكم بالله ان تقيفوا معانا وما توترونا
> بعد نجيب الاميره
> والسوبر الجميله
> ونمشي اليابان
> بعد داك تعالوا العبوا كونكان ما سائلينكم
> بس تاني ما تختونا في حته زي دي
> وانا متأكد انو غرزه قام بالواجب كاملا
> غرزه ما بحب التهاون
> شعاره زي ما قال قدورة المجنون العاقل
> لا تهاون بل بالهاون
> أيها الناس
> أوصانا رسولنا الكريم عليه أفضل الصلاة والتسليم
> أوصانا علي اخونا المؤمن
> اذا مرض نعوده
> وإذا عطس وحمد الله نشمته
> واذا مات نتبعه
> الدافنه واجب
> والصلاة على الجنازه فيها خير كثير
> أيها الناس
> إن تنصروا الله ينصركم
> اها
> نجي لي شمارات والي الخرتوم
> والينا
> إعلانك للحكومه الجديده لينا
> ضربة بدايه للعمل من اجل المواطن والمدينه
> حقو يا والينا
> تعمل ليك مجلس شورى من شعبك لينا
> تشاورهم في الجاي والفات والاسي فينا
> حقو يا والينا
> تراعي للرسوم الأصلاً مفروضه علينا
> اسي رسوم الاراضي دي رسوم نصاح يا والينا؟
> تجديد الحكر وفرق التحسين لي بيت في العباسيه في لندن براحه شقه يجيب لينا
> خلي الرسوم منطقيه يا والينا
> خلوها بتنقدر لينا
> وفتشوا عن مصادر للايرادات من اي حته
> بس ما تحددوا ربط وترموهو علينا
سلك كهربا
ننساك كيف والكلب حايم في الشارع رافض يشتري بيت.. خايف من رسوم التسجيل العلينا يا والينا
والى لقاء
سلك

شارك الموضوع :

تعليقات الفيسبوك

تعليقات


3 التعليقات

      1. 1
        الرباطابي 71

        مبروك للزعيم ومزيدا من الانتصارات وريحه المطار شميناها خلاص

        الرد
      2. 2
        صلاح الشخ

        فى النص الاول اتبهدلنا وفى التانى شقلبة شفلبة السرور وعينك مانشوف الا النور ومين زينا

        الرد
      3. 3
        سرور

        تأهل بالبلنتات ومحاباة حكام ،، دفع رباعي ،، دا ما لعب بودي لقدام

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *