بابكر سلك

الله الوطن الحكم الهلال


> امس بالليل
> اسلام قالت لي يا بابا اشتري لي كورة
> قلت ليها اشتريها ليك من وين يا بتي
> كملن
> اشتروهن كلهن
> آخر واحده اشتروها قريييييب ده
> بعد ده كورة بشتروها مافي
> كورة للبيع مافي
> العندو كورة يلعب بيها
> والماعندو كورة يقعد ساي
> الكور بتاعات البيع كملن يا بتي
> اشتروهن ما خلوا فيهن كورة
> اي زول ما عندو كورة
> اشتري ليهو كورة
> المهم
> الهلال بعد فوزه على مازيمبي لو شد حيلو بصعد
> المجموعه لسه بي لولوتها
> وحقو يا روشا تعملوا المستحيل وتجونا في دور الاربعه
> والله دور الاربعه باااااارد
> لكن لازم تشدوا حيلكم
> عشان تفارقوا السخانه دي
> المهم
> في ناس بقولوا الحكم صرف «بدون قصد» ضربتا جزاء لمازيمبي
> والكلام ده ما صاح
> صرف ولا لسه ما صرف
> الكلام ده ما صاح
> وفي ناس بقولوا الهدف من تسلل
> والكلام ده ما صاح
> وفي ناس بقولوا الحكم اوقف هجمات مازيمبي بالصافرات
> والكلام ده برضك ما صاح
> هجمات مازيمبي اوقفها مساوي اللعاب والشغيل الما موقوف
> وفي ناس بقولوا الحكم تونسي والدم بحن
> والكلام ده اصلو ما صاح
> حتى ولو كان الكوكي خال الحكم
> التحكيم العربي نزيه
> ايها الناس
> نسبة استحواذ مازيمبي كانت 64 في الميه
> وابو الهل 16 في الميه
> حا تقول لي والعشرين في الميه الفضلت مشت وين؟
> اقول ليك كانت استحواذ النقالة فيها عشره في الميه
> لاعبو الهلال رقدوا اكتر مما ركضوا
> واندرزينهو الحكم اتحرك اكتر منو
> واستحواذ الصافره العشره الفي الميه الفضلت
> ايها الناس
> برغم الضغط على الهلال
> والذي نتج عنه نجوميه لماكسيم
> برغم كل ما حدث
> انتصر الهلال
> وهو نصر ضروري
> اياً كانت اسبابه
> هو نصر ضروري
> فرحة الشعب السوداني اكتملت
> الفرحانين كانوا تسعين في الميه قبل كورة مازيمبي
> بعد مازيمبي بقت الفرحه ميه في الميه
> والدليل على نسبة التسعين في الميه
> والعشره في الميه
> هي دخل المريخ والوفاق الملياري
> ودخل كورة مازيمبي حالتو ادوهو بوش
> المهم الشعب اكتملت فرحته
> ايها الناس
> انتصر الهلال لأن دعم رئاسة الجمهوريه المادي والمعنوي قد دفعهم للنصر
> طبعا نحنا زاتنا رئاسة الجمهوريه بتكون دعمتنا
> لكن الاعلام ما جابها
> لانو ما ممكن تكون رئاسة الجمهوريه بوعيها الكبير ده بتتصل وتدعم الهلال بدون المريخ
> فالمريخ ليس بالفريق الاجنبي
> نحنا برضك معاكم في الجمهوريه دي
> ولا شنو؟!!
> المهم
> بعد دعم رئاسة الجمهوريه تجسدت مقوله
> الله الوطن الحكم الهلال
> فبدعم رئاسة الجمهوريه الوطن حكم الهلال بضرورة الانتصار
> الجمهوريه موش ياها الوطن !!!!
> حلوه دي
> الله الوطن الحكم الهلال
> قولها معاي يا روشا
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> المطر بحندك فينا
> يتلملم سحابو فوقنا ويرفض يجينا
> مستنيكم تحفروا الخيران يا والينا؟
> ولا محلية ما دفعت رسوم الغيث المطره فيها ما بتنزل علينا؟
> العاجبني في البلد دي يا والينا
> انها اتنظمت لينا
> زمان المطره تنزل من القطينه لي وادي سيدنا يا والينا
> تخمج بيوتنا وشوارعنا وكل اراضينا
> اسي اتنظمت يا والينا
> اتقسمت محليات علينا
> محليه ما دافعه نقطه ما بتنزل عليها يا والينا
> قرطوا علي كده يا والينا
> اصلوا مطرتنا تقول نازله من كرشه علينا
> ضبانها اكتر من المويه المنها بتجينا
> بلدنا بيئه يا والينا
سلك كهربا
ننساك كيف والكلب كلما يشوفنا يقول لينا بيئه بيئه بيئه
والى لقاء
سلك


‫6 تعليقات

  1. وهدف وانغا فى عزام كان شنو
    وعدم طرد اوغستين فى مباراة عزام كان شنو
    وبلنتى الترجى كان شنو
    وطرد لاعب وفاق فى الخرطوم كان شنو
    يا اخى انتو مفروض تطلعوا من التمهيدى

  2. ضربة الجزاء بتاعت الترجي كانت شنووووو؟؟؟؟
    والله الحكم الحسبا ماعندو ذرررررة بتاعت خجل
    وبكري رواشة ذااااااتو التمثيل دا مابعرف ليهو
    قوم لفففففففففففف ياخ
    انتو مفروض التمهيدي ماتلعبوا فيهوا

  3. ما عندك سالفة يا سلك كهرباء الحكم الحكم الحكم هو حصل فريق اخذ ست ضربات جزاء غيركم يا سلك

  4. بالله ديل كتاب مين اسلام ديه ومادخل القاري باسلام اصلا …

    والله العظيم عدم المواضيع بيعمل اكثر من كده ..

    بالله عليك اما تستحي فيما تكتب … على فكرة اعمده طلاب ابتدائية اروع وفيها فائدة للقاري مما تكتب انت وامثالك .

    قوموا لفوا انت ومن شايعك من جوقة الارزقية ..

    قال اسلام قالت قال ..

  5. يا الريدابي اظنك مزودها حبتين . قلت “على فكرة اعمده طلاب ابتدائية اروع وفيها فائدة للقاري مما تكتب انت وامثالك .” أنا أنصحك بأن تقرأ تلك الاعمدة لآنها على مستوى فكرك وخلي الكاتب في حاله ليوصل فكره للصفوة من الاساتذة و الجامعيين وكفانا الله شر الجهله وعصر الجاهلية.

    1. هههه فكرة للاساتذة الجامعين اها هو عدم الفكر وصل عندكم كمان