احمد دندش

بإيجاز…المريخ (دفع) فاتورة الدوري الممتاز.!


*ياجماعة.
*المساحة دي اسمها مساحة (رأي).
*يعني الزول بكتب فيها الرأي الخاص بيهو، والناس يااتفقت معاهو او اختلفت.
*وانا لي مدة بكرر وبقول انو التركيز مع الدوري الممتاز على حساب الابطال (مضيعة زمن) ليس الا.
*والدليل مباراة المريخ مع هلال الابيض امس.
*بالامس شاهدنا جميعاً (الضرر البالغ) الذى احدثته مباريات الدوري الممتاز في فريق المريخ.
*غياب بالجملة لنجوم الفريق بسبب الاصابات وإشراك اضطراري للاعبين لم يشاركوا لفترات طويلة الى جانب (المهازل) التحكيمية التى يحظى بها هذا الدوري المسمى بـ(الممتاز) على الفاضي.!
*غاب ايمن وبكري وعلاء بسبب الاصابات التى تعرضوا لها في مباريات الدوري الممتاز وملاعبه (ام الحفرية).
*ياناس.
*فريق لاعب في نصف النهائي بتاع الابطال في داعي تلعبوهو في (فسحة) بقت ميدان بـ(الصدفة).؟
*دفع المريخ امس فاتورة باهظة الثمن و(ماتبقى) من لاعبيه بالامس يتعرضون لاصابات متفاوتة للمرة الثالثة.
*بالامس اصيب شيبون وسلمون.
*ونسأل الله ان يخفف المصاب.
*بالطريقة دي المريخ حيلعب مع اتحاد العاصمة بابوجريشة ومحسن سيد.
*والله جد.!
*معقولة…اصابات في الفريق بنسبة 70% من اجمالي الاساسيين..؟؟
*دي مابتحصل في (دافوري) خليك من دوري (ممتاز).
*غايتو نسأل الله اللطف.
*اصلاً غير الدعوات تاني ماعندنا حاجة.
*وين الناس الكانوا شابكننا (لاتفريط في الدوري الممتاز).؟
*اها كدا كويس..؟
* يامريخاب (الممتاز)…انشاء الله مبسوطين كدا..؟
*يلا….خموا وصروا.
باص بيني:
*تغاضى حكم الامس عن مخالفة واضحة ارتكبها عنكبة ونتج منها هدف الهلال الاول.
*ياحكم…(الفاول) دا كيف..؟..عليك النبي اشرح لينا..؟
باص طويل:
*الطريف ان بعض (المحاميح) احتجوا على ركلة جزاء المريخ وقالوا بانها ماصحيحة.؟
*انتو يا(محاميح) تعالوا اسألكم..يعني لعيبة المريخ ديل الا (يكتلوهم) عشان يدوهم (بلنتي).؟
باص قون:
*بإيجاز…دفع المريخ فاتورة الدوري الممتاز.
خانة:
*ياعبدو جابر…بدون زعل ولاتجريح…انت لاعب (اقل) بكتير من المريخ.!


‫4 تعليقات

  1. يا راجل بلاش فلسفة فارغة معاك، لاعبي المريخ البتتكلم عنهم ديل، نصفهم قبل سنة واحدة أو سنتين كانوا في فرق تلعب في مثل هذه الملاعب، و بعدين هم جايين من وين يعني؟؟؟ ما كلهم كانوا لاعبي حواري، يعني كانوا بيلعبوا في الكامب نو؟؟؟؟؟ ثم أن فريق هلال الأبيض أو هلال كادوقلي نصف لاعبيهم كانوا لاعبين في الهلال و المريخ و الخلاصة باختصار لاعبي المريخ أصبحوا يتوهمون أنهم في برشلونة أو بايرن ميونيخ لكن صدقني السنة الجاية حاتسرحوا نصفهم و يمشوا لمريخ الفاشر أو هلال الضعين و يجوا برضوا يهزموا المريخ، يعني عنكبة دا قبل شهرين بس مش كان مع المريخ؟ إش معنى الآن بقى يلعب في الحفرة دي، صحيح الاختشوا ماتوا.

  2. كيف لمثل هذا المسمي صحفي ان يكتب وهو بعيد عن المهنية والالمام ببطولات كرة القدم في السودان وخارجه ، قلنا اللاعبين والاداريين والاجهزة الفنية فاقد تربوي الآن اصبح الصحفيين فاقد تربوي فيا سبحان الله

  3. هذا الرجل قال هذه العبارة
    *ياجماعة.
    *المساحة دي اسمها مساحة (رأي).
    *يعني الزول بكتب فيها الرأي الخاص بيهو، والناس يااتفقت معاهو او اختلفت
    وبدورى اقول لهذ الرجل .. كتاباتك رائعة ..لا داعى ابدا الى ان تلتف الى الوراء ..امضى فى ما انت فيه ماض .. واترك خلفك كثيرا من الكتابات التى لا دور لها … تعقيب ..تعقيب ما هذا
    قل معى استغفر الله العظيم .. استغفر الله العظيم … استغفر الله العظيم