زواج سوداناس

غارزيتو دا يبقى ليكم (حاوي) ولا شنو..؟



شارك الموضوع :

*هجوم بعض الاقلام المريخية امس على مدرب المريخ غارزيتو غير مبرر على الاطلاق.!
*انتو ياجماعة دايرين الزول دا يعمل شنو مثلاً.؟
*مدرب عندو اكتر من (4) لاعبين اساسيين مصابين، ومواجه بمباريات من العيار الثقيل في نصف نهائي الابطال، وقبل ذلك المواجهة (الثأرية) مع اتحاد العاصمة الجزائري.!!
*غارزيتو تصرف بـ(حكمة) وليس بـ(غرور) وهو يحتفظ بكوفي ورمضان عجب، قبل ان (يضطر) لاشراكهما في الشوط الثاني.
*اختار الفرنسي (الخيار المُر) في سبيل ان يخرج من تلك المباراة بأقل (نسبة اصابات) في دوري (بائس) يسهم في تعطيل طموحات الفرق السودانية في المناسبات العالمية والافريقية بدلاً من ان يسهم في دعمها.
*دا دوري (لغم) واخير منو (العدم).
*لامت الاقلام الحمراء غارزيتو مع انه ليس بالامكان افضل مما كان.
*ولامت ذات الاقلام غارزيتو الذى (اضطر) لاشراك علي جعفر (المرتبك) وعبدو جابر (المتواضع الامكانيات).
*ياجماعة…غارزيتو دا يجيب ليكم (لعيبة) من وين..؟؟
*يعني يشارك ليكم بـ(المصابين) ولا يمشي (يشحد) ليكم لعيبة عشان يلعب بيهم قدام هلال الابيض.؟
*ديل (بدائل) المريخ المتوفرين وافتكر الناس لو ركزت في تأمين (البدلاء) افضل بكتير من الهجوم على غارزيتو.
*فتشوا لينا ياناس عن لعيبة نقدر نستعين بيهم في (وقت الشدة).
*لكن الهجوم على غارزيتو ماعندو اي (منطق).
*ياجماعة.
*في مباراة هلال الابيض تعرض شيبون وسلمون لاصابات (متفاوتة).
*وتعرض الثنائي للاصابة في هذا التوقيت يرفع رقم المصابين الاساسيين الى سقف (مخيف).!
*اها…ليه ماعلقتو على الكلام دا..؟
*ولا انتو شايفين انو الدوري الممتاز اهم من كأس الابطال..؟
*غايتو لو في واحد فيكم شايف كدا…احسن (اسكت).
*الكلام في اللحظات الزي دي ببقى (خارم بارم).
*وبقى كلام ماليهو اي (داعي).
*اصلو الزول الشايف انو الممتاز اهم من الابطال دا زول (ماواعي).
*ياناس.
*امبارح في زول قال لي انت بتقول الممتاز مامهم ليه.؟..مع انو الممتاز هو البخليك تشارك في الابطال.
*الزول دا انا اقنعتو بحسابات بسيطة.
*قلت ليهو انا بشارك في الممتاز ليه.؟…قال لي عشان تشارك في الابطال.!…قلت ليهو طيب واشارك في الابطال ليه..؟..قال لي عشان تشيل الكأس…قلت ليهو طيب لما يكون بيني وبين الكأس (بونط) اركز مع الممتاز ولا اشيل الكأس..؟
*صاحبنا (سكت).!
باص بيني:
*البحث عن (بدائل) يفيدو… افضل من الهجوم على غارزيتو.
باص طويل:
*(اضطر) غارزيتو لاشراك الريح وعلي جعفر وعبدو جابر…و(المضطر) بركب (الصعب).
باص قون:
*الهجوم على الفرنسي في هذا التوقيت مسآلة (خطيرة) ينبغي ان يتداركها الاعلام الاحمر.
خانة:
*ياجماعة…نحنا ما(علماء) ولا (اساتذة) في الصحافة الرياضية…بس بنتعامل مع المعطيات بـ(واقعية).!…انتهينا.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *