زواج سوداناس

قنعوا من (بكري المدينة) وقبلوا على (الشكاوي)



شارك الموضوع :

محسن سيد وقت لقى ما في فائدة فنية منو ..قال يا معتصم محمود احسن يحلل مرتبه بالشكاوي

ناس بكري المدينة – امير كمال – ايمن سعيد – جمال سالم …ديل (موظفين)؟ ..بقيتوا تحسموا مبارياتكم في (المكاتب)

لو الكورة بلعبوها في (المكاتب) ..ميسي دا خلوه يفتح ليه (بقالة) في ود البشير..ما في داعي لي مهاراتو دي

التسجيلات القادمة سجلوا ليكم (سكرتير) اول و(سكرتير) تاني و(سكرتير) تالت ..انتوا عاوزين (سكرتارية) ما عاوزين (لاعبين)
**************************************************

· رأيكم شنو؟..الموسم القادم تعملوا معسكر مقفول لمريخاب الجنوب في (البحرين(.

· وتعملوا ليهم بالمرة كدا مباراة تجريبية مع مانيشستر يوناتيد.

· شايفينكم عصرتو كتير على (مريخاب الجنوب(.

· بقوا يجيبوا ليكم (المستندات).
· والشكاوي.

· ويعشموكم في (النقاط).

· يلعبوها ليكم مريخاب الجنوب.

· الجماعة ديل ارفعوا ليهم روحهم المعنوية ..وخلوا محسن سيد يمسك فريقهم ..اصلو في المريخ قاعد ساكت.

· برد فقط على تلفونات مريخاب الجنوب.

· محسن سيد وقت لقى ما في فائدة فنية منو ..قال يا معتصم محمود احسن يحلل مرتبه بالشكاوي.

· مريخاب الجنوب عندهم (مهاجم) خطير ..بجيبها من (المكتب).

· ضربة الجزاء عندهم (مستند).

· حالة الطرد (فائل).

· شغالين بي قوانين العمل.

· ناس بكري المدينة – امير كمال – ايمن سعيد – جمال سالم …ديل (موظفين)..بقيتوا تحسموا مبارياتكم في (المكاتب).

· مفروض تاني لو عندكم (شكوى) تمشوا بيها مكتب العمل.

· وتشوفوا موضوع التأمين.

· واللائحة ..بتاعة العمل ما بتاعة الفيفا..ما تتغشوا ساكت.

· الكورة فارقتوها فراق الطريفي لي جملو.

· كورة شنو البلعبوها بالتلفونات وفي المكاتب المكيفة؟.

· لو الكورة بلعبوها في المكاتب ..ميسي دا خلوه يفتح ليه (بقالة) في ود البشير..ما في داعي لي مهاراتو دي.

· التسجيلات القادمة سجلوا ليكم (سكرتير) اول وسكرتير تاني وسكرتير تالت ..انتوا عاوزين (سكرتارية) ما عاوزين (لاعبين).

· كورة شنو؟…انتوا شغالين (شكاوي).

· شوفوا ليكم طرف شمال (محامي)..وصانع العاب (مستشار)..ولو لقيتوا ليكم (عرضحالي) حارس مرمى احسن ليكم من جمال سالم.

· جمال سالم من معركة (ذات الترابيز) بقى يطلع من قونو.

· خايف تجيه (تربيزة) طايرة.

· يتغلبوا في عطبرة في (الملعب) ويجروا على (مكتب) اسامة عطا المنان.

· انتوا وقت بتفتشوا انتصاراتكم في (المكاتب) وعاوزين تحققوها بالشكاوي ناس بكري المدينة وضفر لزومهم شنو؟.

· دافعين اتنين مليار لبكري المدينة على شنو؟.

· مع ناس بكري المدينة ديل ما في بطولة بتحققوها في (المستطيل الاخضر).

· اقنعوا عديل كدا.

· ولا تعشموا.

· بكري المدينة في الدوري كلو جاب ليه هدفين ..هدف في مباراة لجنة الاستئنافات قررت اعادتها.

· يعني عندو هدف واحد.

· عليه روليت الهدافين في المريخ اصبح على ذلك النحو.

· بكري المدينة هدفين.

· عادل ابوجريشة (11) هدف.

· صديق علي صالح (9) اهداف.

· عبدالقادر همد بي تصريحاتو الكتيرة دي (6) اهداف.

· مزمل ابوالقاسم (13) هدف.

· سلك (13) هدف.

· هيثم كابو بتمها ضربات جزاء ساكت – لكن برضو اخطر من عبده جابر.

· ديل الناس البلعبوا ليكم ..بكري المدينة وقت تشوفو في الجرايد تقول برشلونة الاسبوع القادم بفتح معاهو الخط.

· رونالدو بس.

· لعب في الاعمدة ..وبطولات في الجرايد ..وخسارة اليوم والتاني في الملعب.

· يمشوا (النقعة) يقولوا الملعب كعب.

· كادوقلي الملعب كعب.

· شندي …الحكم.

· والمريخ في (الرد كسل) خسر مرتين ..متل خساراتو في الولايات.

· يهاجموا في (التحكيم)..وضربة الجزاء للمريخ في مبارياته مكتوبة في (تذاكر المباراة).

· مرة يضيعها بكري المدينة.

· ومرة بضيعها عبده جابر.

· الحكام يعملوا ليكم شنو اكتر من كدا؟.

· عبده جابر بطلعها من (القون)…عاوز يكسبها بالشكوى ما بالقون.

· وبكري بضيّع..وعبده جابر بضيّع.

· انتوا ضربات الجزاء دي ما تخلوها لي مامون ابوشيبة.

· ابوشيبة اخطر زول في ضربات الجزاء.

· تخصص ضربات جزاء.

· بحسبوا ليه في كل مباراة ضربة جزاء ..ومرات بحسبوا ليه ضربيتن جزاء في المباراة زي ما حدث امام الخرطوم الوطني وامام وفاق سطيف ..وبعد دا بحتج.

· ابوشيبة آخر ما توصل ليه ..قال هدف بشه في مرمى الرابطة كوستي لو كان (صحيح) لو سجلو لاعب من المريخ الحكم ما بحسبو.

· شوفوا الافتراضات دي كيف؟.

· يعني اهداف الهلال (الصحيحة) ابوشيبة عندو معاها (مشكلة).

· يقوم يتخيلها للمريخ والحكم ما يحتسبها.

· وبشه دا ذاتو عندو هدف اصح من الصاح في شباك المريخ ..الحكم ما احتسبو.

· لو على مراد ابوشيبة (بشه) دا لو سجل في (التمرين) ما يحسبو ليه (الهدف).

· ابوشيبة يقعد يفترض ليك كدا وكدا ويقول ليك الهدف دا لو جابو لاعب مريخابي ما بحسبوه ليه.

· الكلام دا في الافلام الهندية ما قاعدين نشوفو.

· يا جماعة في (توجس) اكتر من كدا.

· يا ابوشيبة بي طريقتك دي المريخ (الوصافة) السنة دي ما يعشم فيها.

· الكتابة عن الحكام او مهاجمتهم او محاولة ارهاب سيحة عشان يطلع يقول هدف الهلال ما صحيح ..والمريخ عندو ضربة جزاء ما بتحقق بطولات.

· البطولات لا تحقق بهذه الاساليب ..شكاوي وهجوم على الحكام عمال على بطال.

· لو البطولات تحقق بهذه الوسيلة المريخ كان في الاسبوع بحقق ليه (15) بطولة.

· المريخ كان بشيل الدوري الانجليزي والاسباني والايطالي رغم من انو بيلعب معانا هنا في دورينا دا.

· البطولات ما بتتحقق كدا.

· استغرب جدا من سعادة اعلام المريخ في ان يجعلوا دائما المريخ (ضحية)…ودائما المريخ (مستهدف).

· والـله نحن لو بصرفوا للهلال مية ضربة جزاء في المباراة ما بنقبل نظهر الهلال بهذا الهوان.

· ما عارف المريخاب عاوزين شنو؟.

· والاتحاد منهم.

· والسلطة تابعة ليهم.

· جمال الوالي علاقتو بالسلطة قوية او هو جزء من السلطة ذاتها..ومعتصم جعفر واسامة عطا المنان ومجدي شغالين زي (الكورس) مع جمال الوالي.

· نازلين وطالعين.

· ومريخية معتصم جعفر واسامة عطا وفيصل سيحة ..اقوى من مريخية (زيكو) الشال الكورة وفات.

· وقال انا ما هربت.

· في زول بهرب بقول انا هربت.

· وانا جيت اعاين.

· حركتك دي بلة جابر ما بعملها يا زيكو.

· الحكام (افريقيا) بختارهم مجدي شمس الدين بجيبهم بالاسم والسيرة الذاتية – ومحليا بختارهم المريخ براهو.

· وضربات جزاء.

· وحالة طرد.

· و6 دقائق زمن بدل ضائع.

· ولا شيء يذكر.

· برضو بخسروا.

· بخسروا على طول.

· الذي يجده المريخ من السلطة ومن الاتحاد ومن مريخاب الجنوب لو وجدوا فريق (النسور) كان شال في الموسم الواحد بطولة الممتاز خمس مرات.

· اعلام المريخ يضع فريقه دائما في هذه الحالة من الضعف والهوان ويظهره بلا انياب وبلا قوة.

· مشكلة المريخ في هذا الهوان …يا الـله اعلام المريخ ما يطلع من هذه الحالة.

· خلوهم يغشوا الناس كدا…ويضعفوا المريخ بهذه الصورة.

· اعلام الهلال عليه ان ينتبه ..عليه ألا يهاجم (الحكام)….اخطاء الحكام او حتى استهدافهم نحن نعرف انهم جزء من اللعبة.

· الظلم الذي يتعرض له الهلال من الحكام ومن الاتحاد يقوي الهلال لا يضعفه.

· نحن نلعب ضد المنافسين والاتحاد والحكام ومريخاب الجنوب.

· لولا اخطاء الحكام لما وصل المريخ افريقيا الى هذه المرحلة.

· كانوا طلعوا من دور الـ (64).

· عشان كدا مفروض اعلام المريخ يكون اسعد فريق في العالم بهذه الاخطاء فهو المستفيد الاول من هذه الاخطاء.

· ضربة جزاء ثابتة في كل مباراة.

· وبعد دا بهاجموا في (الحكام).

· الجيلاني يعمل شنو؟.

· الجيلاني يبقى ليكم (لامبيتي).

· كورتكم دي لا كورة قدم ولا حاجة.

· دي كورة (شكاوي).

· والشكاوي ما بتنفع ليها زول.

· لو بتنفعكم كانت من والي قطر شكاوي مطر عملتوا ليكم بطولة مع الناس.

· ديل بقوموا من الصباح..اول حاجة بعملوها بمشوا يشتكوا.

· ………….

· ملحوظة : رأيكم شنو بعد الكلام دا تشربوا ليكم عصير ليمون بارد كدا؟.

هوامش

· قالوا ليك المريخاب قنعوا من الممتاز لكن عندهم (امل) في كاس السودان.

· عليك الـله الجماعة ديل ما تجيب ليهم سيرة (الامل).

· الامل في كاس السودان ما عاوزنو.

· ما غريبة عليهم …العلمة في الدرجة التانية وبتلعب في المجموعات.

· المريخ ثالث الدوري الممتاز وصيف المجموعة التانية.

· عادي.

· طبيعي.

· ما في اي مشكلة.

· انتوا يا جماعة مع شكاويكم الكتيرة دي ..جهزوا ليكم شكوي افريقية.

· ما معقول شكاويكم تكون كلها (محلية).

· لا بد من شكوى افريقية.

· عشان تطلعوا من المحلية في الموضوع دا.

· احلى ممتاز للهلال.

· الـلهم ديمها نعمة واحفظها للهلال من الزوال.

· يا الكاردينال ابقى رتب للممتاز القادم.

· التسجيلات يا كاردينال.

· الناس ديل ما يشغولك ساكت.

· التسجيلات باقى ليها شهرين.

· احسم يا كاردينال.

· عاوزين نلقط اي بطولة.

· معاك الهلال الى الآن بحمد الـله لم يفقد بطولة للممتاز.

· ولم نخسر بعد.

· كسبنا ممتاز الموسم الماضي ..وعلى بعد خطوات ان شاءالـله من ممتاز هذا العام.

· ………..

· عاجل : اشتكوا حافظ حارس هلال الابيض ..اتسجل في هلال كردفان من غير يعمل (كشف طبي).

شارك الموضوع :

تعليقات الفيسبوك

تعليقات


2 التعليقات

      1. 1
        مريخابي شديد

        كدي خلينا من الفصاحة .. سموحة كيف ! لاعبنها باللاعبين و لاّ بالأوراق برضو ؟؟

        الرد
      2. 2
        مريخابي و كدا

        خطوات ؟ خطوات تنظيم !!
        خطواتك دي حاسب فيها الخمس نقاط بتاعة الشكاوي أم لا !
        يعنى هسا انتو لو لقيتوا ليكم طريقة شكوى ح تسكتوا … يا خ انتو أهل الشكاوي .. شكاويكم دولية .. وصلتوها (لوزان) .. صحيح اللي بيختشوا ماتوا !

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *