زواج سوداناس

حكاية البطولة اليتيمة



شارك الموضوع :

> بالأمس كتبت عن مأدبة السفير البريطاني بالخرطوم
> وقلت كنا حضوراً والحبيب محمد عبد الماجد بتشريف الريس
> لم يسقط مني سهوا ذكر الباشمهندس محمد عبد اللطيف هارون
> بل اسقطته عمداً
> لأن الرجل يحتاج لمساحات شاسعة للحديث عنه
> انسان صاحب خلق رفيع
> فاهم وهاش وباش
> رجل تحتضنك ابتسامته قبل ان تتلقفك احضانه الصادقه
> رجل تفسر بسمته نقاء معدنه وسيرته وسريرته
> لأول مره التقيه
> ولكن اشراق حناياه علي وجهه ارتسمت فابتسمت
> وابتسمت له الدنيا
> حقيقة الرجل عظيم ومسالم وفاهم ويحترم نفسه باحترامه للآخر
> تشرفت به وبمعرفته
> واقول للحقيقه
> هنيئاً للاهله بهذا الاداري الرائع
> هنيئاً للوسط الرياضي بهذا القيادي المهول
> هنيئاً لنا بك اخي المهندس محمد عبد اللطيف هارون
> فالرياضه تسامح ومحبه واخاء ونقاء واحترام متبادل
> لك مني الف تحيه
> ومأدبة السفير البريطاني كانت رائعه
> غايتو لو في سفير تاني عزمني
> ما تستغربوا لو لقيتوني غيرت لوحة عريبيتي من خ3 الي هيئه دبلوماسيه
> بعملها خلي بالك
> المهم
> كتب الرائع بابكر مختار بزاويته على صفحات جوهرة رمضان تحت مسمى حكاية البطوله اليتيمه
> قصد مانديلا
> اعترف فيها بانها البطولة الوحيدة للاندية
> ولكنه شنفها وغلفها في قالب نقدي بحيث يحط من قدرها
> وفرض بعض التساؤلات
> ولكني اواصل في موضوعك اخي بابكر مختار
> صحيح انها البطوله الوحيده للانديه السودانيه
> ويعترف بذلك الواقع والتاريخ
> والحكاية ما دايره اعتراف منك او مني او من غيرنا
> التاريخ وسجلات الاتحاد الافريقي والواقع يعترفون بمانيدلا 89م
> وفي محاولة منه لتبخيس القصه
> قال كلها تمنيه مباريات ضد اربعه فرق
> يا صديقي
> انسحب الاهلي الليبي مثل انسحاب الهلال من امام وفاق سطيف
> يعني كان نجيب اهلي ليبيا بالانتر بول؟
> وبعدين لما الهلال وصل للنهائي في سبعه وتمنين
> لعب ضد خمسين فريق ؟؟؟
> يا هن خمسه فرق يا الحبيب
> الوكت داك مافي مجموعات
> تلعب في دور الاتنين وتلتين ضد فريق
> وفي السطاشر ضد فريق وكذلك التمانيه
> كده تلاته فرق
> دور الاربعه فريق والنهائي فريق
> يا هن الخمسه
> الغريب شنو في بطولة المريخ يا بابكير ؟؟؟
> ولسه
> في محاولة منه لتبخيس مستوى الفرق
> قابل المريخ يا عزيزي البنزرتي التونسي حامل اللقب في 88م
> يعني كان يهز ويرز
> وقابل قورماهيا الكيني صاحب اللقب القبل البنزرتي
> يعني كان برضك بهز ويرز
> وللتاريخ والامانه
> البنزرتي التونسي ما زنطور
> لأنو سجل اسمو على لوح الشرف في 88م باحرف من نور
> وقورماهيا ما زنطور لانو سجل اسمو على لوح الشرف في 87م
> وشال كم سيكافا كده
> فكم سيكافا شالها الهلال البضحك علي قورماهيا الكيني؟
> مع العلم بأن قورماهيا بالذات اقصى الهلال من سيكافا قريب اربعه مرات
> فيهن تلاته في السودان الحبيب ده
> وفيهن اتنين انتهن تلاته لي قورماهيا ضد الهلال
> تبقي البطوله اليتيمه تاجاً يشرف جبين الوطن يا بابكير
> وبطولة الكؤوس التي احرزها قورماهيا تتشرف بها كينيا
> وبطولة الكؤوس التي احرزها البنزرتي التونسي تتشرف بها تونس
> فمتي يتشرف هذا البلد بانجاز قاري للزناطير يخرجهم من زمرة الزناطير الي عالم البطولات الكبير؟
> يتيمه أخير من عديمه يا بابكير يا اخوي
> كعب العدم
> ايها الناس
> اكتب قبل لقاء الزعيم بهلال التبلدي
> اتوقعها ممتعه جداً
> لأن هلال التبلدي افضل هلال بلعب كورة في البلد دي
> باقي الهلالات مع احترامنا لهم جميعاً
> يعانون ضعفاً فنياً ومهارياً وتكتيكياً
> فيهن هلال واحد يستفيد دوماً من اخطاء التحكيم
> ولولاها لنافس الهلالين الباقيين على الهبوط
> وامل عطبره شايفو قرب يودع
> وده حال الما بخت بالو في مصلحتو
> البهمل في البدايات
> المهم
> ريحة المطار عبقت شديد
> ناس امجاد يقيفوا جمب جاد ويشموا
> يشموها قدحه وبس
> لكن يتعطروا فده مستحيل
> ايها الناس
> خبر الشوم خبر الروم لو اتناقلنو الحروم في مصر
> تبقي عاد الدباره كيييييفن؟؟؟؟
> لا يلاقينا لا نلاقيهو لا نتلاقي لا نتلم
> لوح الشرف الافريقي ما بلمنا الاتنين
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> في خور عملوهو وسقفو في شارع العرضه لينا
> الدكاكين والكافتريات موصلات صرفهن فيهو يا والينا
> والخور زي القزازه مفتوح من جهة ومن جهه مقفول علينا
> بقي مستشفى ولاده للباعوض يعضعض الليل كلو فينا
> بقى مصنع روائح تقرفنا على القرف الفينا
> بقى تصنيع امراض حاتقرضنا يا والينا
> يا شوفوا الخور ده وين يكب لينا
> يا قفلوهو يا والينا
سلك كهربا
ننساك كيف والكلب لما يجي جمب خور العرضه بقفل نخرينو.. يقرب يطرش يا والينا
طرشتو الكلب زاتو
والى لقاء
سلك

شارك الموضوع :

تعليقات الفيسبوك

تعليقات


1 التعليقات

      1. 1
        هلالابى

        ولما طلعتوا من التمهيدى ولما جيتوا طيش المجموعة فى المرة الوحيدة الشاركتوا فيها
        يا اخى من فضل الهلال عليكم بانه رفع حصة السودان الى اربع فرق واداك الفرصة هذا العام
        عن الحكام بلاهى عليك الا تخجل
        انك قزم ينبح اكثر مما يفعل

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *