بابكر سلك

عراقي البيت ما زي جلابية المرقه


> والله يا هو البضحك
> يتشدقون ويختالون ويتحدثون عن فارق نقاط الممتاز
> عن اي نقاط يتحدث الناس؟!!
> عن النقاط التي يجلبها الناس بعرقهم وقدرتهم الفنيه؟
> ام عن المكاوشات الساكت؟
> ايها الناس
> سيحه وضح ان هدف عبده جابر صحيح
> يبقي الفرق بقى تلاته
> وقال سيحه ان ضربة جزاء المدلل علي اهلي مدني غير صحيحه
> كده مافي فرق
> وذكر سيحه ان هناك ضربة جزاء اوضح من الشمس للمريخ في عطبره
> كده المريخ فايتكم يا روشا بي تلاته وقال سيحه ان هدف هلال الابيض الاول خطأ على مهاجم هلال الأبيض
> كده سته يا روشا
> وبالرجوع لمباراتكم ضد النسور في الدوره الاولى
> نجد ضربة جزاء اوضح من الشمس من سيمبو مع مهاجم النسور في الدقيقه سبعه
> عرقلة مهاجم مواجه للمرمى من الخلف
> يعني بلنت ومعاها طرد
> وفي الحاله دي الحكم مفروض يستدعي متحري شرطة المرور لرسم الحادث ويقبضو على سيمبو ولا يطلق سراحه الا بعد التأكد من صحة تأمينو
> ده غير ضربة جزاء غير محتسبه برغم صحتها للنسور في الشوط التاني
> الحكم دائما يخطئ ولا يظلم
> كده فضل ليكم كم؟
> تلتين نقطه !!!
> وما ببنسى ضربة الجزاء التي ارتكبتوها يا روشا مع كوفي في الدوره الاولى
> الباقي سبعه وعشرين
> السبعه وعشرين زاتها فيها قولان
> لكن بنعتمدها ليكم
> شدوا حيلكم عشان ما تنافسوا الأمل وهلال كادوقلي على الهبوط
> طبعاً ده كلو بصرف النظر عن استغناء هلال الابيض عن طاقمه عقب الخساره الغريبه منكم
> يوم غيرو عنكبه وهو مصدر الخطورة الوحيد
> نظن أن الجهاز الفني وقتها قد اخطأ
> ولكنه لم يظلم هلال الرمال
> ايها الناس
> التحكيم يخطئ ولا يظلم
> ارجعوا معاي عشره سنين لي ورا
> وروني حاله واحده في الممتاز اخطأ فيها التحكيم في حق الهلال؟
> الموسم الماضي نقض الحكم هدفاً صحيحاً لمحمد موسى
> كان الثاني له في المباراه
> وبقدرة قادر خرج الخرطوم الوطني مهزوماً
> قبل كم موسم كانت فضيحة الماسوره الشات البلنت في الماسوره ورجعت ليهو وعدوها قون
> انتهت عليه المباراة وكفل للهلال الفوز بالممتاز
> والفضيحه الاكبر ما سمعناهو عن قيام ناس التحكيم باستفتاء الفيفا حول الحاله
> يا ربي لسه ما افتت؟؟
> والذكريات كثيره
> على ملعب المريخ
> المعز محجوب يوقف كرة مصعب الماشه للشبكه بيده خارج الخط
> وأبو شنب وقتها تبسم ولم يطرد المعز
> خطأ غير مقصود طبعاً من ابو شنب
> وعلى ذكرى طيب الذكر ابو شنب
> في مباراة الهلال وحي العرب ببورتسودان
> سادومبا يعتدي بدون كره على لاعب العرب الذي اعتدى عليه
> الحكم يشهر البطاقه الحمراء للاعب العرب
> ويتغاضى عن سادومبا
> خطأ غير مقصود طبعاً
> بس كانت كورة الهلال البعدها طوالي ضد المريخ
> وكان الحكم الرائع دوماً ابو شنب
> فاشاد البعض بابو شنب
> وقال البعض لابو شنب وتب
> هذا هو الممتاز يا ناس
> لو ما اهلي مدني اتغلب في الدقيقه سبعه وتسعين
> كان تكون لي اسي لاعبه
> خطأ تحكيمي غير مقصود
> فالحكم يخطئ ولا يظلم
> ولكنه لا يخطئ في حق الهلال ابداً ابداً ابداً
> خلونا من خطأ التحكيم
> حصل نادي اشتكي الهلال كسب؟!
> تتذكروا لما الاتحاد رفض تأجيل مباراة المريخ في مدني
> ولعبها والملعب ترعه عديل كده
> واول زول وقع في الحفره التي حفرها الاتحاد للمريخ كان الحكم
> وصدقوني برضو كان ابو شنب
> في اليوم البعدو اجل الاتحاد مباراه دوريه للهلال
> ليلعب مباراه وديه مع انيمبا لزوم زخرفة الكندشه وقتها
> موضوع كندشة الاعاراة داك
> والحكم كان كيني ولا يوغندي ما عارف وطالما المباراه معلنه
> يبقى الكروت فيها معتبره
> عمر بخيت اخد كرت
> وكان التالت ليهو في الحساب
> ولعب اول مباراه دوريه مع الهلال
> الفريق التاني اشتكي
> فكان الرد غريب ومضحك
> الحكم شال معاهو التقرير لي بلدو وما ادانا ليهو
> وقالوا حا نضرب ليهو يرسلوا لينا وطبعا لي اسي ما رسلو
> والهلال شال الممتاز
> طيب كان يصورو ليكم ويرسلو بالواتساب
> ولا الوكت داك النت في شارع البلديه كان ضعيف
> ايها الناس
> عن اي عدالة يتكلمون
> عن اي شرف للمنافسه يتحدثون
> عن اي تطور للكرة ننشده في هذا البلد الغريب في اي شيء
> ايها الناس
> لاقاكم حكم ما اخطأ في حق فريق؟
> طيب لاقاكم حكم اخطأ في حق الهلال ؟؟؟
> طيب لاقاكم هلال خسر بالشكوى في البلد دي؟
> لو لاقاكم حبيبي سلمولي عليه
> المهم
> عثرات الممتاز لم تفقدنا الممتاز
> عين حمراء للتحكيم عشان ما يخطئ
> والكاس كاسنا
> قرارات قويه وعادله في الشكاوى التي قدمناها
> تعيد الأمور لنصابها
> ولكن قرارات ارضاء الجماعه اياهم ما بتنفع
> وفي ناس اخلاقهم جات هنا
> شايفني؟؟؟
> ديل تاني ما بسكتوا
> ادوا كل زول حقه
> ايها الناس
> افريقياً نحن كده
> محلياً برغم الاسباب اياها
> الا أننا لم نشارك بكل قوتنا
> ومحلياً بنفرق من افريقيا
> عراقي البيت ما زي جلابية المرقه
> كعب الزول البمرق بالعراقي ويعمل فيها قاشر
> عراقي البيت ده يا روشا ما بوديكم لي قدام
> بضحكوا فيكم في مصر
> المهم
> قالوا للهلال تلاته وخمسين نقطه
> في الواقع للهلال خمسه وتلاته من عشره من النقاط
> ده حقو
> الباقي يخطئ ولا يظلم
> أيها الناس
> روشا يتحدث عن رضا
> رضا بتاع التلفزيون
> يا روشا
> رضا هلالابي هلالابي هلالابي
> رضا قدم للهلال من زمنا بدري
> وأذكر له موقفاً يتشرف به هو في ونساته الخاصه
> قبل تسجيل والي الدين عليه رحمة الله
> حضر لاستاد الهلال وشارك في مباراه
> ما كان في فنيله
> ما عارف ظروف الهلال كانت كده
> ولا عمك شبشه مشي نوش
> لكن ده الحصل
> فما كان من رضا الهلالابي الذي يلبس وقتها تي شيرت بالوان الهلال
> ما كان منه الا ان خلع التي شيرت والبسه لوالي الدين حتى يشارك
> رضا خدم الهلال كثير
> منو منكم الخدم الهلال قدر رضا يا روشا؟؟
> وعن اي رضا تتحدث يا روشا
> عن رضا البقاطع خبير التحكيم لما يكون بشرح في حاله على الهلال
> ويقول ليهو خليك من الحاله دي
> قبلها موش في عرقله للاعب الهلال؟
> يا هو رضا زاتو ولا رضا تاني؟
> ايها الناس
> ان تنصروا الله ينصركم
> ان تذكروا الله يذكركم
> قولوا دائماً سبحان الله وبحمده سبحان الله العظيم
> أها
> نجي لي شمارات والي الخرتوم
> كان شفت يا والينا
> آخرتها قالوا رضا محسوب علينا
> ده تمن سكاتنا يا والينا
سلك كهربا
ننساك كيف والكلب بضحك لمن يفتفت في الواطه دي لما يسمع انو رضا مريخابي.. احرجتونا مع الكلب
والى لقاء.
سلك


‫2 تعليقات