الفاتح جبرا

واسعة شوية


بينما كنت أقوم بتسخين العربة أمام المنزل في صباح أمس الباكر إذ بجاري الحاج (عبدالمجيد) يهرول نحوي وهو ممسك بإحدي الصحف وهو يخاطبني في حرقة قائلاً :
– بالله ده إسمو كلام يا أستاذ … بالله ده إسمو كلام يا أستاذ
بعد أن هدأ شويه .. فتح باب العربة وجلس إلى جانبي وأعطاني الصحيفة التي كان يمسك بها قائلاً : أقرأ يا أستاذ .. أقرأ وشوف جنس الكلام ده

وقرأت الخبر االذي أشار لي عليه والذي يقول :
(تم مساء اليوم بقصر الشعب بالعاصمة الصينية بكين مراسم التوقيع على اتفاقية للتعاون في مجال الفضاء وأبحاثه ، حيث وقع عن السودان صلاح ونسي وزير رئاسة الجمهورية فيما وقع عن الجانب الصيني وزير التجارة) !!
بعد أن قرأت الخبر تلفت يمنة ويسري خوفا من أن أكون ضحية من ضحايا (الكاميرا الخفية) وبعد أن تأكدت من إنو الكلام (جد جد) إلتفت إلي حاج عبدالمجيد قائلاً :
– وفيها شنووو يا حاج؟
– (في حنق) : فيها شنووو ؟؟ كدي أول حاجة اليلمو لينا (الوسخ) الفي الشوارع دي محل ما تقبل تلاقي ليك (تل) بتاع نفايات ريحتو ضاربة .. وللا يحاربو لينا (البعوض) الكرهنا العيشة ده !
– يعني إنتا يا حاج معترض على حكاية الفضاء دي ؟
– لا أنا ما معترض بس قبل (الفضاء) الينضفو لينا (الواطة)
– تقصد شنوو يا حاج؟
– أقصد بدل إتفاقية أبحاث الفضاء دي والشعر الما عندنا ليهو رقبة ده كان يتعاقدو مع شركة صينية (للنظافة) .. تجيب الأليات والعربات والموظفين والعمال .. بي قرض بي منحة بي زفت بي أي حاجة !! يا أستاذ خليك من ده كوووولو .. مش كان أحسن وأولي يوقعوا لينا عقد لي صيانة المستشفيات الراقدة سلطة دي ويؤهلوها بالأجهزة والمعدات ؟ قال أيه : أبحاث فضاء !!
– والله يا حاج كلامك برضو معقول (الفضاء) والفلك والحاجات دي عندها (ناسا) !
– هس عليك الله يا استاذ (أبحاث الفضاء)؟ ولا تغيير شبكة الموية المن زمن الإنجليز دي ؟ أكان إتعاقدو لينا مع الصينيين ديل على عمل شبكة متكاملة في العاصمة دي (للموية) مش كان أحسن بدل تقطع لينا بالأيام والناس راسا يضرب لا تقدر تغسل وللاا تنضف وللا تستحما
– (مواصلا) : يا أستاذ هو بلد عاصمتو ما فيها شيكة صرف صحي والناس فيها بتقضي حاجتا في (الحفر) و (الإدبخانات) شن أبحاث االفضاء العليها .. هسه بدل عقد (الفضاء) ده كان أخدو منهم تمويل وعملو لينا (شبة صرف صحي) مش كان صحتنا ذاااتا إتحسنت بدل التلوث الحاصل ده؟
– يا حاج ياخ الناس المسؤولين ديل أكيد عارفين مصلحتنا أكتر مننا .. والظاهر مصلحتنا في (الفضاء) .. مش إحتمال يكونو خاتين في بالهم إنو البلد دي (تضيق) نقوم (نوسع) في كوكب تاني !
– البلد دي يا استاذ مش ح (تضيق) .. دي ح (توسع)
– كيف يا حاج ؟
– عشان بالطريقة دي نص السكان مرارتهم ح تنفقع ويروحو (أحمد شرفي) !

كسرة :

أبحاث فضاء ؟؟ لا دي واسعة شوية .. كدي شوفو لينا الموية أم (دود) دي !!

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و
• كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و


‫4 تعليقات

  1. دي مش واسعة بكترة ماواسعة اي واحد بخش ويطلع منها م ن غير حسيب ورقيب يا استاذ لذلك الجماعة فكرو في الفضاء عشان لمن تحصل عكة يكون عندهم البديل يمشو علي

  2. كلامك دائما في الصميم بس ياربي في زول من المسؤلين بيقرا كلامك ده بقو شغالين بسياسه طنش طنش

  3. ((تم مساء اليوم بقصر الشعب بالعاصمة الصينية بكين مراسم التوقيع على اتفاقية للتعاون في مجال الفضاء وأبحاثه ، حيث وقع عن السودان صلاح ونسي وزير رئاسة الجمهورية فيما وقع عن الجانب الصيني وزير التجارة) !!) !!!!!!!!!!!! كدى يا جبرة يا صاحبي خلينا من دا كووووولو، عندي سؤآلين ثلاثة كدا، إيه علاقة عوضية سمك بحواني البوستة؟ وإيه علاقة شريف الفحيل بأمراض الكلى؟؟ وإيه علاقة عنكبة بكرة القدم؟؟ ودا بيقودني للسؤآل الأخير ….. ما علاقة وزير التجارة الصيني ووزير رئاسة جمهورية دولة أمازونيا بمجال الفضاء وأبحاثه؟؟؟؟ شكله الموضوع كدا حاجة تايوانية خالص

  4. فى حاجه فى السياسه العالميه اسمها تكبير كيمان.
    يعنى الصينين ديرين يعملو ليهم حاجه كده ضد ناس كده ديل…. يقوم يقول ليهم … يا اخونا هوى ياس شنق شان جاى….شنو الحكايه
    الكوكب ده فوضى تعملو سكت على كيفكم.
    اخونا ناس شنق شان جاى يقول ليهم …. هوى السما دى حقتنا ذى ما ما هو حقكم ….. بعدين نحن ذاتو ما برانا معانا ناس فلان و علان و السودان و اولاد عثمان بعدين كان دايرين حساب بالراس نتحداكم و كان دايرين نعبرلكم الوطه بالضراع ساكت برضو معاكم
    اه يااخونا ما تخافوا نحن تمامت جرتق يعنى المساعله كلها سياسه و كدى……