نفسك في إيه؟
• اللحمه يا أستاذ ثبت علمياً إنها مضرة بالصحة وبتجيب أمراض كتيره خاصة اللحمة (الكيرى) الأنتا بتاكل منها دى لأنها ما معروفه لحمة شنو؟ والناس بقت ما عندها ذمة ممكن تضبح (أى حاجة) عشان كده خليك فى السليم وأبعد عن الحاجة دى ! وبعدين ياخى الفول ده مالو؟ عيبو ليا ؟ ما برضو فيهو )بروطين(
• نفسك تلاقي وظيفة؟
• والله إنتا بتبااالغ … وظيفة مرة واحدة
• نفسك تتفسح إنتا وخطيبتك ؟
• ما عندك أى مشكلة طوااالى وعلى حدائق (حبيبى مفلس) ما ح تكلفك الشغلانه خمسة جنيه .. كيسين تسالى .. كيسين فول حاجات .. كبايتين شاى .. إتنين حاجة باردة .. بس لو لموا فيك ناس النظام العام إحتمال المسألة تكلفك أكتر شوية !
• نفسك فى قروش كتيرة؟
• ياخى القروش دى فتنة أخير ليكا الفقر الإنتا فيهو ده .. لو هسه عملتا ليكا شوية قريشات وبقيت غنى ح ترتكب آثام وح تدخل النار
• نفسك تتزوج؟
• ما تتزوج ليه؟ مش ما عندك التكتح ؟ تتزوج ونص وخمسة وأهو أخوانا العلماء بارك الله فيهم وأثابهم ثواباً كثيراً سهلوا ليكا المسألة وعندك زواج المصواب وزواج المسيار وزواج المصياف ، وزواج المسفار، وزواج المطيار ، وزواج المصياع وزواج المحجاج ، وزواج المسياق .. المهم ما مطلوب منك فى كل (الأنكحة) المشروعة دى غير (مجهودك الفردى(
• نفسك يكون عندك قطعة سكنية؟
• ياخى والله إنتا متفائل جداً .. هو لمن السودان كان مليون )ميل( مربع ما لقيت ليكا قطعة فى الخطة السكنية عاوز تلاقى ليكا قطعه بعد ما بقى مليون )متر( مربع ؟
• نفسك فى تلفزيون ملون؟
• والله الظاهر إنتا ح تجيبوا لى نفسك براك .. ح تجيك المذيعة أم كشاكيش كتيرة ديك وتقعد كل دقيقة تأشر ليك بى أيدا عشان تشوف نقشة الحنة ويجيك بعدها المذيع القاعد يسبل فى عيونو وكل دقيقتين يقعد يقهى ليكا فى سقف الأستديو .. والمصيبة تقوم تشاهد ليك مباراة (غمة(
• نفسك تتعالج ؟ يا أستاذ الشافى الله .. خليك من مسألة الأطباء والمستوصفات دى عشان ممكن يعالجوا ليكا حاجة ويبوظوا ليكا عشرين حاجه ! المهم لو ما سمعتا كلامى وربنا سهل ليكا ومشيت ودخلتا عملية فنصيحة أخوية أعمل جرد لأعضائك قبل العملية وأكتبهم (للورثة) عشان يراجعوا (العدد) وهم بيغسلوا فيك !
• نفسك تلبس كويس؟ : طوااالى يمم وجهك شطر (خلف الجامع الكبير) حيث سوق الحرامية وألبس من (المرحوم كان قدرك) .هدوم مستعملة وآخر وجاهة..و رخيصه.. وقدر ميزانيتك (ده لو عندك ميزانية) من أساسو
• نفسك أولادك يتعلموا؟
• ح تجيب ليهم كل يوم قروش طباشير وقروش كهرباء للمدرسة وموية للمدرسة وقروش فطور للأساتذة وقروش طباعة إمتحانات وقروش مش عارف ايه من وين؟ وبعدين أفرض قعدت تصرف كده لحدة ما إتخرجوا ح يشتغلوا وين؟ أسمع كلامى خليك من مسألة التعليم دى خلى الأولاد يكبروا شوية وبعدين يترشحوا للبرلمان !
• نفسك تسافر ؟ ممكن بس لازم تدخل ليكا صندوق وتشيل الصرفة الأولى .. إنتا عارف إستخراج الجنسية والبطاقة والجواز والرقم الوطني بى كم؟ خليك من تذاكر الطيارة .. ياخ قول سافرتا أها الإعاشة كيف؟
• نفسك تغترب ؟ شيل الفكرة دى من راسك بأسرع ما يمكن .. هو مرتبك هناك ده (لو إشتغلتا) ح يكفى ال ح ترسلو للأسرة وللا الح تدفع منو للقسط بتاع الفيزا الجيت بيها وللا طلبات الأقارب والأهل والجيران وللا تجديد الوثائق والضرائب والمساهمة (الإلزامية) والزكاة وترعة كنانة والرهد وقناة الخرطوم ودمغة الشهيد و الجريح والغريق … والما عرف شنووو؟ يا أسمع كلامي وأقعد في حتتك
• نفسك تكون مسؤول؟
• لازم تراجع الطبيب النفسى .. ده هسه كلام يقولوا زول عاقل ؟
• كسرة :
• نفسك تموت وترتاح من الدنيا دى؟
• استمع لتصريحات بعض المسؤولين من نوعية (نحنا مستهدفين عشان مشروعنا الحضاري)!!
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و
• كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة